កម្មការិនី៣នាក់របួសធ្ងន់ដោយគ្រាប់កាំភ្លើងសន្តិសុខរោងចក្រ
ការតវ៉ារបស់កម្មករកម្មការិនី នៅក្នុងរោងចក្រកៅវ៉េ ក្នុងខេត្តស្វាយរៀង បានឈានដល់ការប្រើហិង្សាដែលបណ្តាលអោយកម្មការិនី៣នាក់របួសធ្ងន់នៅព្រឹកថ្ងៃចន្ទនេះ។ ភ្នាក់ងារសមាគមសិទ្ធិមនុស្សអាដហុកបានអះអាងអោយដឹងថា នៅពេលកម្មការិនីប្រើដុំថ្មគប់ចូលទៅក្នុងរោងចក្រនោះ គេឃើញសន្តិសុខរបស់រោងចក្របានដកកាំភ្លើងបាញ់សំដៅមកកម្មការិនីអ្នកតវ៉ា។ ក្រុមកម្មករបានធ្វើកូដកម្មតវ៉ា ដើម្បីទាមទារអោយថៅកែរោងចក្របន្ថែមប្រាក់ខែ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
ករណីដែលសន្តិសុខរបស់ក្រុមហ៊ុនឯកជនប្រើប្រាស់កាំភ្លើង ដើម្បីបង្ក្រាបក្រុមអ្នកតវ៉ាប្រឆាំងនឹងថៅកែរបស់ខ្លួននោះ បានកើតឡើងសាជាថ្មីទៀត។ ករណីទីមួយពាក់ព័ន្ធនឹងការតវ៉ាក្នុងជម្លោះដីធ្លីនៅក្នុងខេត្តក្រចេះ កាលពីខែមករា បានឈានដល់មានអន្តរាគមន៍ពីលោកនាយករដ្ឋមន្ត្រី ដែលបានអំពាវនាវអោយមានការចាប់ខ្លួនជនល្មើសទៀតផង។
នៅព្រឹកថ្ងៃចន្ទទី២០កុម្ភៈនេះ បើយោងតាមរបាយការណ៍របស់ភ្នាក់ងារសមាគមការពារសិទ្ធិមនុស្សអាដហុកប្រចាំខេត្តស្វាយរៀង សន្តិសុខនៃរោងចក្រកាត់ដេរមួយ ដែលស្ថិតនៅក្នុងតំបន់សេដ្ឋកិច្ចពិសេសបាវិត បានដកកាំភ្លើងខ្លីបាញ់មកលើក្រុមអ្នកតវ៉ាជាកម្មការិនី។ ប៉ុន្តែ អ្នកសង្កេតការណ៍សិទ្ធិមនុស្សបញ្ជាក់ថា ការបាញ់រះមកលើក្រុមកម្មការិនីកើតឡើងក្រោយការតវ៉ាបានឈានដល់ការប្រើហិង្សា ដោយក្រុមកម្មការិនីបានប្រើប្រាស់ដុំថ្មគប់ចូលក្នុងអគារ ដែលធ្វើអោយបាក់បែករបស់របរមួយចំនួន។
ទោះយ៉ាងណាក៏ដោយ លោកចាន់ សូវេត មន្ត្រីស៊ើបអង្កេតរបស់សមាគមអាដហុកប្រចាំការិយាល័យកណ្តាលនៅភ្នំពេញបានថ្កោលទោសការប្រើប្រាស់អាវុធ ដើម្បីបង្ក្រាបក្រុមអ្នកតវ៉ាយ៉ាងដូច្នេះ។ លោកអំពាវនាវអោយអាជ្ញាធរតាមចាប់ខ្លួនជនល្មើសមកផ្តន្ទាទោសដូចករណីនៅខេត្តក្រចេះដែរ។
មិនអាចទាក់ទងសមត្ថកិច្ចនគរបាល ដើម្បីចង់ដឹងពីចំណាត់ការផ្លូវច្បាប់ប្រឆាំងអ្នកប្រើប្រាស់អាវុធនៅឡើយទេ នៅល្ងាចថ្ងៃចន្ទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ