ភូមាបន្តធ្លាក់ក្នុងភាពតានតឹងក្រោយអំពើហិង្សាសហគមន៍ថ្ងៃអង្គារ
នៅភូមា ក្រោយអំពើហិង្សារវាងអ្នកកាន់ពុទ្ធសាសនានិងអ្នកកាន់សាសនាអ៊ីស្លាម កាលពីល្ងាចថ្ងៃអង្គារ នៅទីក្រុងម៉ាន់ដាឡៃ ថ្ងៃសុក្រនេះ ប៉ូលិសភូមាបានបន្តល្បាតនៅតាមផ្លូវជាច្រើន ក្នុងក្រុង។ពីល្ងាចថ្ងៃព្រហស្បតិ៍ រហូតដល់ព្រឹកថ្ងៃសុក្រនេះ ស្ថានភាពហាក់ស្ងប់បន្តិច ក្រោយអាជ្ញាធរបានដាក់បំរាមគោចរក្នុងស្រុក។ អំពើហិង្សាសហគមន៍សាសនាផ្ទុះតាំងពីថ្ងៃអង្គារមក បានសម្លាប់មនុស្ស២នាក់ ពុទ្ធសាសនិកជនម្នាក់ និងអ្នកកាន់សាសនាអ៊ីស្លាមម្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ទោះជាស្ថានភាពហាក់បានស្ងប់ស្ងាត់បន្តិចវិញ នៅទីក្រុងម៉ាន់ដាឡៃ ដែលបានរងអំពើហិង្សាសហគមន៍ កាលពីល្ងាចថ្ងៃអង្គារក៏ដោយ ក៏ថ្ងៃសុក្រនេះ ប៉ូលិសភូមានៅតែបន្តល្បាតទីកន្លែងមួយចំនួន ក្នុងក្រុងម៉ាន់ដាឡៃដែរ ដើម្បីធានាសុវត្ថិភាពសន្តិសុខ ព្រោះថា ភូមាតែងរងភាព តានតឹងបង្កដោយជម្លោះរវាងពុទ្ធសាសនិកជន និងក្រុមអ្នកកាន់សាសនាអ៊ីស្លាម។
ក្រុងម៉ាន់ដាឡៃ ជាក្រុងសំខាន់ទី២នៅភូមា។ កាលពីល្ងាចថ្ងៃអង្គារ មនុស្សរាប់រយនាក់ បាននាំគ្នាទៅវាយប្រហារតូបទំនិញអ្នកកាន់សាសនាអ៊ីស្លាមមួយកន្លែង ដោយសារតែម្ចាស់តូបទំនិញបានរងការចោទប្រកាន់ថា រំលោភផ្លូវភេទ។ នៅយប់ថ្ងៃពុធ អំពើហិង្សាបានសម្លាប់អ្នកកាន់សាសនាអ៊ីស្លាមម្នាក់ និងពុទ្ធសាសនិកជនម្នាក់។ អាជ្ញាធរបានចាប់ខ្លួនមនុស្ស៤នាក់ និងប្រកាសបំរាមគោចរនៅយប់ថ្ងៃព្រហស្បតិ៍។ យោងតាមអ្នកទទួលខុសត្រូវភូមា អំពើហិង្សានេះកើតឡើងដោយសារតែការចុះផ្សាយពាក្យចចាមអារ៉ាមបំផ្លើសព័ត៌មាន ក្នុងអ៊ីនថឺនេត ខណៈរដ្ឋាភិបាលភូមានៅមិនទាន់មានគម្រោងអ្វីចាត់ការពាក្យចចាមអារ៉ាមតាមអ៊ីនថឺនេតនៅឡើយ។
តាំងពីឆ្នាំ២០១២មក អំពើហិង្សាវាយប្រហារអ្នកកាន់សាសនាអ៊ីស្លាមបានសម្លាប់មនុស្សជាង២៥០នាក់ និងធ្វើអោយមានមនុស្សភៀសខ្លួន១សែន៤ម៉ឺននាក់ ភាគច្រើនជាអ្នកកាន់សាសនាអ៊ីស្លាម។ អ្នកកាន់សាសនាអ៊ីស្លាមនៅភូមា មាន៤ភាគរយប៉ុណ្ណោះ ក្នុងចំណោមប្រជាជនក្នុងស្រុក ដែលភាគច្រើនកាន់សាសនាព្រះពុទ្ធ។ ជាញឹកញយ គ្រាន់តែពាក្យចចាមអារ៉ាម រឺបទឧក្រិដ្ឋឯកជនបន្តិចបន្តួចកើតឡើង ក៏បង្កអោយផ្ទុះអំពើហិង្សាសហគមន៍ដែរ។ មិនត្រឹមប៉ុណ្ណោះ ក្រុមសង្ឃជ្រុលនិយមមួយចំនួនក៏បានពន្យុះអោយមានហិង្សាផងដែរ។ មេដឹកនាំបក្សប្រឆាំង អ៊ុងសាន ស៊ូជី បានអំពាវនាវអោយអាជ្ញាធរភូមាគិតគូរដោះស្រាយពីពាក្យចចាមអារ៉ាមដែលនាំអោយផ្ទុះអំពើហិង្សាក្នុងស្រុក។ អំពើហិង្សាសហគមន៍នេះ អាចជាឧសគ្គដល់កំណែទម្រង់នយោបាយរបស់រដ្ឋាភិបាលភូមា ក្រោយរបបសឹកភូមារំលំចោល កាលពីឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ