វត្តមានកាន់តែស្មុគស្មាញរបស់ទ័ពបរទេស នៅអាហ្វហ្គានីស្ថាន
ពួកឧទ្ទាមតាលីបង់បានប្រកាស កាលពីថ្ងៃព្រហស្បតិ៍ទី ១៥ មីនា ផ្អាក មិនចរចាជាមួយអាមេរិក ដើម្បីបញ្ចប់ជម្លោះ នៅក្នុងប្រទេសអាហ្វហ្គានីស្ថាន។ យ៉ាងណាក៏ដោយ សេតវិមាននៅតែបញ្ជាក់ថា អាមេរិកនៅបន្តនយោបាយផ្សះផ្សារជាតិដើម្បីបញ្ចប់សង្រ្គាម នៅអាហ្វហ្គានីស្ថាន ដែលកើតមានចាប់តាំងពីឆ្នាំ ២០០១មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ដំណើរការចរចាសន្តិភាពជាមួយពួកតាលីបង់បានស្លាប់មុនកើត ទៅទៀត។ កាលពីល្ងាចថ្ងៃព្រហស្បតិ៍ម្សិលមិញ ពួកឧទ្ទាមតាលីបង់ទើបបានប្រកាសបញ្ឈប់រាល់ការចរចាជាមួយអាមេរិក។ ហេតុផលរបស់ពួកតាលីបង់ គឺគេមិនចូលចិត្តចរិកក្រឡេចក្រឡុចរបស់អាមេរិក។
គួរបញ្ជាក់ថា ចាប់តាំងពីត្រូវកងកម្លាំងបរទេស ដឹកនាំដោយអាមេរិកវាយបណ្តេញចេញពីអំណាច នៅអាហ្វហ្គានីស្ថាន នៅឆ្នាំ ២០០១ ពួកតាលីបង់បានបង្កើតជាក្រុមប្រដាប់អាវុធ វាយប្រយុទ្ធបង្ហូរឈាមជាមួយកងទ័ពបរទេស។ ១០ឆ្នាំក្រោយការប្រយុទ្ធមិនឈ្នះ មិនចាញ់ ពួកតាលីបង់ទើបតែបានសម្រេចចិត្ត ជាលើកទីមួយ ចូលមកចរចាផ្ទាល់ជាមួយអាមេរិកដើម្បីឈានទៅដល់ការបញ្ចប់សង្រ្គាមរ៉ាំរ៉ៃ នៅលើទឹកដីអាហ្វហ្គានីស្ថាន។
កាលពីខែពីខែមករា ដើមឆ្នាំនេះ ពួកតាលីបង់ ដែលមានការយល់ព្រមពីរដ្ឋាភិបាលលោក Hamid Kazai បានបង្ហាញពីចេតនា ចង់បង្កើតការិយាល័យមួយរបស់ខ្លួន ក្នុងប្រទេសកាតារ ដើម្បីចរចាជាមួយអាមេរិក។ តាំងពីពេលនោះមក ពួកតាលីបង់ និងអាមេរិកបានចាប់ផ្តើមទាក់ទង គ្នាបណ្តើរៗ ដោយអាមេរិកចង់ឲ្យពួកឧទ្ទាមតាលីបង់បោះបង់ចោលអំពើហិង្សា មុននឹងចូលមកចរចាគ្នា ចំណែកពួកតាលីបង់វិញបានទាមទារឲ្យអាមេរិក ដោះលែងគ្នីគ្នារបស់គេដែលរហូតមកដល់ពេលនេះ កំពុងជាប់ នៅគុកGuantanamo។
ដំណើរឈានទៅរកការចរចាមានតែនៅលើតុ ចំណែកនៅទីសមរភូមិវិញ ភាគីទំាងពីរ គឺពួកតាលីបង់ កងទ័ពបរទេសនៅតែប្រយុទ្ធគ្នា មិនបន្ថយដៃ។ ហើយនៅទីបំផុត ពន្លឺសន្តិភាពជាមួយពួកតាលីបង់ក៏រលត់ទៅវិញ បន្ទាប់ពីពួកតាលីបង់សម្រេចលែងចរចា ដោយខឹងនឹងអាមេរិកដែលមិនចង់និយាយពីការដោះលែងមេដឹកនាំសំខាន់ៗរបស់តាលីបង់ដែលអាមេរិកបានចាប់ដាក់គុកGuantanamo។
ដោយពិតទៅ ក្នុងរយៈពេលប៉ុន្មានសប្តាហ៍ចុងក្រោយនេះ ទំនាក់ទំនងល្អអាមេរិក និងអាហ្វហ្គានីស្ថានបានធ្លាក់សឹងដល់ចំណុចសូន្យ។ បាតុកម្មរបស់ប្រជាជនអាហ្វហ្គានីស្ថានប្រឆាំងវត្តមានទ័ពបរទេស ជាពិសេសទ័ពអាមេរិកបានកើតមានជាបន្តបន្ទាប់ ពោល គឺចាប់តាំងពីមានរឿងអាស្រូវដែលទាហានអាមេរិកបានដុតគម្ពីរកូរអាន។ កាលពីថ្ងៃអាទិត្យសប្តាហ៍មុននេះទៀត ទាហានអាមេរិកម្នាក់បានបាញ់សម្លាប់ប្រជាជនស៊ីវិលអាហ្វហ្គានីស្ថានដល់ទៅ១៦នាក់ ដែលនេះបានបង្កឲ្យមានកំហឹងពុះកញ្រ្ជោលក្នុងចំណោមប្រជាជន ពួកតាលីបង់ និងរដ្ឋាភិបាលអាហ្វហ្គានីស្ថាន។
កាលពីថ្ងៃម្សិលមិញ លោកប្រធានាធិបតីHamid Kazaiបានទាមទារឲ្យទ័ពបរទេសចាកចេញពីភូមិនានា និងត្រលប់មកតាំងទីតែនៅក្នុងបន្ទាយរបស់ខ្លួនវិញ។ លោកប្រធានាធិបតីអាហ្វហ្គានីស្ថាននៅបានបញ្ជាក់ថា ប្រទេសរបស់លោកបានត្រៀមខ្លួនរួចហើយដើម្បីទទួលការងារបន្តពីទ័ពបរទេស។ បើតាមលោក Kazai ទាហានអាហ្វហ្គានីស្ថានអាចរក្សាសន្តិសុខបានដោយខ្លួនឯង ចាប់តាំងពីឆ្នាំ ២០១៣ គឺមិនមែនចុងឆ្នាំ ២០១៤ ទៅតាមការព្រាងទុកពីមុនឡើយ។ អាមេរិកវិញ បានបញ្ជាក់ថា ការដកកងទ័ពពីអាហ្វហ្គានីស្ថាននឹងមិនធ្វើឡើងដោយប្រថុចញ៉ុច ប៉ុន្តែ ដោយមើលទៅតាមស្ថានភាពជាក់ស្តែង និងគោរពទៅតាមកាលបរិច្ឆេទ ក្នុងកិច្ចព្រមព្រៀងដែលធ្វើឡើងនៅទីក្រុងBruxelles៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ