ការវិលចូលឆាកអន្តរជាតិរបស់ភូមាក្នុងនាមជាប្រទេសម្ចាស់ផ្ទះរៀបចំជំនួបកំពូលអាស៊ានលើកទី២៤
នៅចុងសប្តាហ៍នេះ ប្រទេសភូមាបានធ្វើជាម្ចាស់ផ្ទះរៀបចំជំនួបកំពូលអាស៊ានលើកទី២៤ នៅក្នុងទីក្រុងណៃពីដ៏ ដោយមានវត្តមានចូលរួមពីប្រមុខរដ្ឋ និងប្រមុខរដ្ឋាភិបាលទំាង ១០រូបជាសមាជិក។ ក្នុងនាមជាសមាជិកម្នាក់របស់អាស៊ានដែរនោះ ភូមាបានខកខានមិនបានរៀបចំជំនួបកំពូលរបស់អង្គការតំបន់មួយនេះម្តងហើយកាលពីឆ្នំា ២០០៦។ មូលហេតុកាលណោះ មកពីបញ្ហារំលោភសិទ្ធិមនុស្សដែលបង្កឡើងដោយរបបផ្តាច់ការយោធា។ ឥឡូវនេះ និងជាមួយនឹងរដ្ឋាភិបាលស៊ីវិល ភូមាបានរកឃើញជាថ្មីនូវមុខមាត់របស់ខ្លួននៅលើឆាកអន្តរជាតិ។ តែនៅមានបញ្ហាជាច្រើនទៀតដែលរបបថ្មីត្រូវបន្តដោះស្រាយ។
ចុះផ្សាយនៅថ្ងៃ៖
ស្តាប់ - ០១:៤៣
គឺតំាងពីភូមាបានរំលាយចោលរបបសឹកក្នុងឆ្នំា ២០១១ និងការផ្តើមធ្វើកំណែទម្រង់ប្រទេសរបស់លោកប្រធានាធិបតីថេន សេននោះឯង ដែលបានធ្វើឲ្យភូមារកឃើញជាថ្មីនូវកៅអីរបស់ខ្លួនលើឆាកអន្តរជាតិ ពិសេសកៅអីប្រធានផ្លាស់វេនអាស៊ានដែលខ្លួនបានក្លាយជាសមាជិកតំាងពី១៧ឆ្នំាមកហើយ។ តែយ៉ាងណាក៏ដោយ នៅមានប្រធានរឿងគួរឲ្យបារម្ភជាច្រើនដែលបាន និងកំពុងធ្វើឲ្យមជ្ឈដ្ឋានអន្តរជាតិទូទៅពិបាកនឹងជឿរបបស៊ីវិលភូមាសព្វថ្ងៃ។ អង្គការការពារសិទ្ធិមនុស្ស Human Rights Watch បានបរិហារពីការបន្តរំលោភសិទ្ធិមនុស្សនៅក្នុងប្រទេសភូមានារយៈពេលប៉ុន្មានខែចុងក្រោយនេះ។
ជាក់ស្តែងក្នុងថ្ងៃពុធ ទី៧ ឧសភា រដ្ឋអំណាចបានបណ្តេញចេញអ្នកកាសែតជនជាតិអូស្រា្តលីម្នាក់ដោយចោទអ្នកកាសែតរូបនោះថា បានចូលរួមធ្វើបាតុកម្មទាមទារសិទ្ធិសេរីភាពក្នុងការបញ្ចេញមតិជាមួយប្រជាជនភូមា។ ក្នុងខែមីនាកន្លងទៅ អ្នករាយការណ៍ពិសេសរបស់អង្គការសហប្រជាជាតិបានសម្គាល់ឃើញពីការរំលោភសិទ្ធិមនុស្សរបស់កងទ័ពនៅក្នុងតំបន់ជនជាតិភាគតិចដែលកំពុងមានជម្លោះ ពិសេសការបំពានធ្វើបាបលើពួកជនជាតិភាគតិចរ៉ូហ៊ីងយ៉ា។
យ៉ាងណាក៏ដោយ ប្រធានរឿងរសើបទំាងនេះនឹងមិនត្រូវបានអាស៊ានដាក់បញ្ចូលទៅក្នុងរបៀបវារៈនៃកិច្ចប្រជុំរបស់ខ្លួនឡើយ។ ប្រធានបទសំខាន់នឹងផ្តោតលើស្ថានការណ៍តានតឹងនៅក្នុងសមុទ្រចិនខាងត្បូងដែលមានជាប់ពាក់ព័ន្ធនឹងប្រទេសអាស៊ានមួយចំនួន មានវៀតណាម ហ្វីលីពីន ឬមួយក៏ព្រុយណេជាដើម។ ប្រទេសទំាងនេះចង់ប្រើវេទិកាអាស៊ានដើម្បីប្រឆំាងនឹងមហិច្ឆតារបស់ចិន។ តែក្នុងនាមជាប្រទេសម្ចាស់ផ្ទះ និងជាសម្ព័ន្ធមិត្តម្នាក់របស់ចិន ភូមាកំពុងទើសទាល់ចិត្តយ៉ាងខ្លំាង។
នៅមានសំណុំរឿងមួយទៀតដែលអាស៊ានត្រូវពន្លឿនបន្ថែម គឺការកសាងសហគមន៍សេដ្ឋកិច្ចអាស៊ានមួយនៅឆ្នំា ២០១៥ ដើម្បីប្រឈមទប់នឹងឥទ្ធិពលសេដ្ឋកិច្ចរបស់ចិន និងឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ