កូរ៉េខាងជើងបង្កើនសកម្មភាពនៅទីតាំងសាកល្បងនុយក្លេអ៊ែរ (រូបភាពផ្កាយរណប)
រូបភាពថតដោយផ្កាយរណប ដែលទើបនឹងថតនាពេលថ្មីៗនេះបង្ហាញឲ្យឃើញថា សកម្មភាពនៅទីតាំងសាកល្បងនុយក្លេអ៊ែរកូរ៉េខាងជើង មានការកើនឡើង ដែលជាសញ្ញាកាន់តែច្បាស់ថា កូរ៉េខាងជើងកំពុងតែរៀបចំសាកល្បងនុយក្លេអ៊ែរជាលើកទី៣។ នេះបើយោងតាមវិបសៃត៍មួយរបស់វិទ្យាស្ថានអាមេរិក-កូរ៉េ នៃសកលវិទ្យាល័យ Johns Hopkins។ លោកបាន គីមូន អគ្គលេខាធិការអ.ស.ប. បានព្រមានកូរ៉េខាងជើងកុំឲ្យធ្វើការសាកល្បងអាវុធនុយក្លេអ៊ែរសាជាថ្មីទៀត។
ចុះផ្សាយនៅថ្ងៃ៖
ស្តាប់ - ០២:០៨
មជ្ឈដ្ឋានអន្តរជាតិជាទូទៅនាំគ្នាព្យាករថា កូរ៉េខាងជើងនឹងធ្វើការសាកល្បងអាវុធនុយក្លេអ៊ែរ ជាលើកទី៣ ក្រោយពីការបាញ់សាកល្បងរ៉ុកកែត កាលពីថ្ងៃទី១៣មេសា ត្រូវទទួលបរាជ័យ។
គួរបញ្ជាក់ថា រហូតមកទល់ពេលនេះ កូរ៉េខាងជើងនៅមិនទាន់មានសមត្ថភាពផលិតក្បាលគ្រាប់នុយក្លេអ៊ែរ ដែលអាចបាញ់ដោយប្រើមីស៊ីលបាននៅឡើយទេ។ ដូច្នេះ រាល់ការសាកល្បងអាវុធនុយក្លេអ៊ែរទាំងពីរលើកកន្លងទៅ គឺត្រូវបានធ្វើឡើងនៅក្រោមដី។
រូបភាពថតដោយផ្កាយរណប កាលពីថ្ងៃទី៨ មីនា បង្ហាញឲ្យឃើញអំពីគំនរដី មុខរូងក្រោមដី នៅទីតាំង ដែលកូរ៉េខាងជើងធ្លាប់ធ្វើការសាកល្បងនុយក្លេអ៊ែរកន្លងមក។ ការជីករូងក្រោមដីនេះ មានសកម្មភាពកាន់តែខ្លាំង បើយោងតាមរូបភាពចុងក្រោយ ដែលថតកាលពីថ្ងៃទី១៨ មេសា។
អនុរដ្ឋមន្រ្តីក្រសួងការពារជាតិកូរ៉េខាងត្បូងវិញ បានប្រាប់ទីភ្នាក់ងារសារព័ត៌មានយុនហាប់ កាលពីថ្ងៃសុក្រម្សិលមិញថា កូរ៉េខាងត្បូង និងសហរដ្ឋអាមេរិកបានធ្វើការវាយតម្លៃថា ប្រូបាប៊ីលីតេដែលកូរ៉េខាងជើងធ្វើការសាកល្បងអាវុធនុយក្លេអ៊ែរជាលើកទី៣ គឺមានកម្រិតខ្ពស់ គ្រាន់តែគេមិនអាចដឹងច្បាស់ថា វានឹងកើតឡើងនៅពេលណាពិតប្រាកដ។ លោកក៏បានបញ្ជាក់សាជាថ្មីម្តងទៀតថា អាមេរិក និងកូរ៉េខាងត្បូងនឹងចាត់វិធានការតបនឹងរាល់ទង្វើបង្កហេតុរបស់កូរ៉េខាងជើង។ ក៏ប៉ុន្តែ មិនបានបញ្ជាក់ថា តើវិធានការតបនោះជាអ្វីទេ។
លោកបាន គីមូន អគ្គលេខាធិការអ.ស.ប. បានថ្លែងក្នុងសន្និសីទសារព័ត៌មាន ក្នុងអំឡុងដំណើរទស្សនកិច្ចទៅកាន់ប្រទេសឥណ្ឌា កាលពីថ្ងៃសុក្រម្សិលមិញថា ការបាញ់សាកល្បងរ៉ុកកែតរបស់កូរ៉េខាងជើង កន្លងទៅថ្មីៗនេះ គឺជាការគំរាមកំហែងដល់សន្តិភាព និងសន្តិសុខអន្តរជាតិ ហើយថា កូរ៉េខាងជើងមិនត្រូវធ្វើទង្វើបង្កហេតុណាមួយបន្ថែមទៀត ឬធ្វើការសាកល្បងអាវុធនុយក្លេអ៊ែរណាមួយសាជាថ្មីទៀតទេ។
កាលពីថ្ងៃអង្គារ រដ្ឋមន្រ្តីក្រសួងការពារជាតិអាមេរិកក៏បានធ្វើការព្រមានប្រហាក់ប្រហែលគ្នានេះដែរ ចំពោះរបបដឹកនាំក្រុងព្យុងយ៉ាង។ គួររំឭកឡើងវិញថា បច្ចុប្បន្ននេះ សហរដ្ឋអាមេរិកមានកងទ័ពចំនួន ២ម៉ឺន ៨ពាន់ ៥រយនាក់ ដែលកំពុងឈរជើង នៅក្នុងប្រទេសកូរ៉េខាងត្បូង។ ចាប់តាំងពីក្រោយសង្រ្គាមកូរ៉េ (១៩៥០-១៩៥៣) រហូតមកទល់នឹងពេលនេះ អាមេរិក និងកូរ៉េខាងត្បូង នៅមិនទាន់ចុះកិច្ចព្រមព្រៀងសន្តិភាពជាមួយកូរ៉េខាងជើងនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ