ការកែប្រែរដ្ឋធម្មនុញ្ញ ដើម្បីដាក់គជប ជាស្ថាប័នធម្មនុញ្ញ នឹងត្រូវរដ្ឋសភា ប្រជុំអនុម័ត នៅព្រឹកថ្ងៃទី១តុលា
គណៈកម្មាធិការអចិន្ត្រៃយ៍រដ្ឋសភា បានសម្រេចថា បន្ទាប់ពីវិសម្សកាលរយៈពេល ៣ ខែរួចមក រដ្ឋសភានឹងបើកកិច្ចប្រជុំពេញអង្គ នៅព្រឹកថ្ងៃពុធ ទី១តុលា ដោយមានរបៀបវារៈចំនួន ។ ក្នុងនោះ រដ្ឋសភា នឹងពិភាក្សា និងអនុម័តលើសេចក្តីស្នើច្បាប់ធម្មនុញ្ញ ស្តីពី វិសោធនកម្ម មាត្រា ៧៦ និងមាត្រាទាំងឡាយពីជំពូកទី១៥ថ្មី ដល់ជំពូកទី១៦ថ្មី នៃរដ្ឋធម្មនុញ្ញ ពាក់ព័ន្ធនឹងគជប។ ការកែប្រែរដ្ឋធម្មនុញ្ញនោះ នឹងបើកផ្លូវឲ្យឈានដល់ការផ្លាស់ប្តូរ គជប ដូចអ្វីដែលគណបក្សជាប់ឆ្នោតទាំងពីរ បានព្រមព្រៀងគ្នាកាលពីថ្ងៃទី២២កក្កដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
បន្ទាប់ពីស្ងប់ស្ងាត់មួយរយៈ ទីបំផុតទៅ គណបក្សប្រជាជនកម្ពុជា និងគណបក្សសង្គ្រោះជាតិ បានសម្រេចកិច្ចព្រមព្រៀងនយោបាយមួយជំហានទៀត លើការកែប្រែរដ្ឋធម្មនុញ្ញ ពាក់ព័ន្ធនឹងស្ថាប័នរៀបចំការបោះឆ្នោត គជប។ នោះគឺសេចក្តីស្នើច្បាប់រដ្ឋធម្មនុញ្ញ ស្តីពី វិសោធនកម្ម មាត្រា ៧៦ និងមាត្រាទាំងឡាយពីជំពូកទី១៥ថ្មី ដល់ជំពូកទី១៦ថ្មី នៃរដ្ឋធម្មនុញ្ញ ដែលនិយាយពីគជប នឹងត្រូវរដ្ឋសភា បើកកិច្ចប្រជុំពិភាក្សា និងអនុម័ត នៅព្រឹកថ្ងៃពុធ ទី១តុលា។
ការអនុម័តលើវិសោធនកម្មរដ្ឋធម្មនុញ្ញ ទាមទារអោយមានសំឡេងគាំទ្រ ចំនួន ២ ភាគ ៣ នៃសមាជិករដ្ឋសភា សរុប ១២៣ រូប។ ពោលគឺគេត្រូវការសំឡេងពីគណបក្សជាប់ឆ្នោតទាំងពីរ នៅរដ្ឋសភា ទើបអាចគ្រប់ចំនួន ២ ភាគ ៣ ស្មើនឹងសំឡេងអ្នកតំណាងរាស្ត្រ ៨២ រូបឡើងទៅ។ លទ្ធផលបោះឆ្នោត កាលពីខែកក្កដា ឆ្នាំ២០១៣ បង្ហាញថា គណបក្សប្រជាជនកម្ពុជា មាន ៦៨ រូប និងតំណាងរាស្ត្រ ៥៥ រូប មកពីគណបក្សសង្គ្រោះជាតិ។
លោកតំណាងរាស្ត្រ យ៉ែមបុញ្ញឫទ្ធិអ្នកនាំពាក្យគណបក្សសង្គ្រោះជាតិ បានប្រាប់វិទ្យុបារាំង នៅថ្ងៃអាទិត្យនេះថា វិសោធនកម្មរដ្ឋធម្មនុញ្ញ ដែលរដ្ឋសភា ត្រូវប្រជុំអនុម័ត នៅថ្ងៃពុធនោះ និយាយពីសមាសភាព តួនាទី និងរចនាសម្ពន្ធ័របស់ គ ជ ប។ ការអនុម័តនោះ នឹងមិនមានបញ្ហាអ្វីទេ ព្រោះក្រុមការងាររបស់គណបក្សជាប់ឆ្នោតទាំងពីរ បានពិភាក្សានិងព្រាងវិសោធនកម្មនោះជាមួយគ្នា ស្របតាមកិច្ចព្រមព្រៀងរវាងមេដឹកនាំកំពូលគណបក្សទាំងពីរ កាលពីថ្ងៃទី២២កក្កដា។
លោក យ៉ែម បុញ្ញឫទ្ធិ បានបន្ថែមថា បន្ទាប់ពីអនុម័តលើវិសោធនកម្មរដ្ឋធម្មនុញ្ញ ពាក់ព័ន្ធនឹងគជប នៅថ្ងៃពុធរួចហើយ រដ្ឋសភាត្រូវអនុម័តលើសេចក្តីស្នើច្បាប់ពីរទៀត គឺច្បាប់រៀបចំគជប និងវិសោធនកម្មច្បាប់បោះឆ្នោត។
លោក យ៉ែម បុញ្ញឫទ្ធិ បញ្ជាក់ថា ក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ បានព្រាងរួមគ្នារួចហើយ លើសេចក្តីស្នើច្បាប់ ស្តីពី ការរៀបចំ និងការប្រព្រឹត្តទៅរបស់គជប។ នៅរសៀលថ្ងៃចន្ទ ទី២៩កញ្ញា ក្រុមការងារទាំងពីរ នឹងជួបគ្នា នៅរដ្ឋសភា ដើម្បីប្រជុំសម្រេច។ ច្បាប់ទាំងពីរនោះ អាចនឹងចេញរួចរាល់ នៅបំណាច់ឆ្នាំ២០១៤នេះ។ បន្ទាប់មក ទើបឈានដល់ការជ្រើសរើសសមាជិកគជប ថ្មី ទាំង ៩ រូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ