សហជីពកម្មករ បើកវេទិកាជជែកពីការទាមទារឡើងប្រាក់ខែ មុនជួបរដ្ឋមន្ត្រី
មេដឹកនាំសហជីពកម្មករ នឹងបើកវេទិកាមួយ និយាយពីការទាមទារឡើងប្រាក់ខែកម្មកររោងចក្រកាត់ដេរ នៅព្រឹកថ្ងៃអាទិត្យ ទី១២តុលា នៅទីលានប្រជាធិបតេយ្យ។ វេទិកាកម្មករ នៅថ្ងៃអាទិត្យ នឹងបើកធ្វើ មុនពេលដែលមេដឹកនាំសហជីពឯករាជ្យ ចំនួន ១០ រូប នឹងជួបជាមួយរដ្ឋមន្ត្រីក្រសួងការងារ លោក អ៊ិត សំហេង នៅព្រឹកថ្ងៃទី១៦តុលា។ រហូតដល់ពេលនេះ សហជីពកម្មករ ដែលបើកយុទ្ធនាការទារឡើងប្រាក់ខែ បានបែកជាពីរក្រុម។ មួយក្រុម ឈប់និយាយពីការទាមទារឡើងប្រាក់ខែ ១៧៧ ដុល្លារទៀតហើយ តែទាមទារត្រឹមតែ ១៥០ ដុល្លារ។ ចំណែកមួយក្រុមទៀត មានសហជីពរបស់លោកអាត់ធន់ លោករ៉ុងឈុន និងសហជីពលោកជាមុនី រក្សាជំហរដើម ១៧៧ ដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
សហជីពកម្មករយ៉ាងហោចណាស់ ៦ ស្ថាប័ន ដឹកនាំដោយលោកប៉ាវស៊ីណា នឹងដឹកនាំកម្មករ ជួបជុំក្នុវេទិកាសេរីមួយ នាព្រឹកថ្ងៃអាទិត្យ ទី១២តុលា នៅទីលានប្រជាធិបតេយ្យ។ វេទិកាកម្មករ នៅថ្ងៃអាទិត្យខាងមុខ ត្រូវបានលោកប៉ាវស៊ីណា ប្រធានសម្ព័ន្ធសហជីពចលនាកម្មករ គូសបញ្ជាក់ថា នឹងបើកឱកាសដល់កម្មកររោងចក្រកាត់ដេរ លើកឡើងពីការទាមទារឡើងប្រាក់ខែ។ ប៉ុន្តែវេទិកានោះ សហជីពរបស់លោកអាត់ធន់ លោករ៉ុងឈុន និងសហជីពលោក ជាមុនី នឹងមិនចូលរួមទេ។ សហជីពទាំងបី រក្សាជំហរទារឡើងប្រាក់ខែ១៧៧ដុល្លារ។
ប៉ុន្តែការទាមទារឡើងប្រាក់ខែកម្មកររោងចក្រកាត់ដេរ សម្រាប់ឆ្នាំ២០១៥ នៅពេលនេះ ត្រូវបានមេដឹកនាំសហជីព លោក ប៉ាវ ស៊ីណា ដែលតាំងខ្លួន ជាសហជីពឯករាជ្យ លែងនិយាយដល់ ១៧៧ ដុល្លារហើយ តែជំហរនៅរក្សាត្រឹម ១៥០ ដុល្លារ។
វេទិកាកម្មករ នៅថ្ងៃអាទិត្យ នឹងបើកធ្វើ តែប៉ុន្មានថ្ងៃប៉ុណ្ណោះ មុនពេលដែលមេដឹកនាំសហជីពកម្មករ ចំនួន ១០ រូប រួមមាន៖ សហជីពរបស់លោកអាត់ធន់ និងលោកប៉ាវស៊ីណា ជាដើម គ្រោងនឹងជួបលោក អ៊ិត សំហេង រដ្ឋមន្ត្រីក្រសួងការងារ និងជាប្រធានគណៈកម្មការប្រឹក្សាការងារ ដើម្បីពិភាក្សាពីការតម្លើងប្រាក់ខែឈ្នួលអប្បបរមា នៅព្រឹកថ្ងៃទី១៦តុលា។ ការស្នើសុំជួបរដ្ឋមន្ត្រីនោះ បានធ្វើឡើង តាមរយៈលិខិតរបស់លោក ជួន មុំថុល អនុប្រធានគណៈកម្មការប្រឹក្សាការងារ ភាគីកម្មករនិយោជិត។
រហូតដល់ព្រឹកថ្ងៃព្រហស្បតិ៍នេះ លោកប៉ាវស៊ីណា ឲ្យដឹងថា លោករដ្ឋមន្ត្រី បានយល់ព្រមឲ្យមេដឹកនាំសហជីព ចូលជួប ដើម្បីពិភាក្សាអំពីបញ្ហាប្រាក់ឈ្នួលអប្បបរមានោះហើយ។
តាមគម្រោង កិច្ចប្រជុំសម្រេចលើការតម្លើងប្រាក់ខែកម្មកររោងចក្រកាត់ដេរ សម្រាប់ឆ្នាំ២០១៥ នឹងត្រូវធ្វើឡើងនៅព្រឹកថ្ងៃទី១០តុលា។ ប៉ុន្តែក្រសួងការងារ បានជូនដំណឹងប៉ុន្មានថ្ងៃមុន ពន្យារពេល ទៅធ្វើនៅក្នុងខែវិច្ឆិកា ដោយលើកហេតុផលថា ទុកពេលឲ្យភាគីពាក់ព័ន្ធ មានពេលពិភាក្សាគ្នា។
តាមកិច្ចប្រជុំជាបន្តបន្ទាប់ ភាគីសហជីពកម្មករ បានលើកសំណើ ទាមទារឡើងប្រាក់ខែកម្មកររោងចក្រកាត់ដេរ ១៧៧ ដុល្លារ ហើយក្រោយមក ចុះមកត្រឹម ១៥០ ដុល្លារ។ ប៉ុន្តែភាគីថៅកែរោងចក្រ ព្រមតម្លើងត្រឹមតែ ១១០ ដុល្លារ ខណៈដែលកម្មកររោងចក្រកាត់ដេរ សព្វថ្ងៃ ទទួលបានប្រាក់ខែអប្បបរមា ១០០ ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ