អ.ស.ប.៖កូរ៉េខាងជើងត្រូវតែឆ្លើយបំភ្លឺនៅតុលាការព្រហ្មទ័ណ្ឌអន្តរជាតិពីបទឧក្រិដ្ឋកម្មរបស់ខ្លួន
នៅថ្ងៃសុក្រ ទី១៤ វិច្ឆិកានេះ អ្នកស៊ើបអង្កេតម្នាក់របស់អង្គការសហប្រជាជាតិបានថ្លែងថា វាជារឿងមួយចៀសមិនរួចដែលថ្នាក់ដឹកនំាកូរ៉េខាងជើងត្រូវតែចូលខ្លួនឆ្លើយបំភ្លឺនៅចំពោះមុខតុលាការព្រហ្មទ័ណ្ឌអន្តរជាតិស្តីពីបទឧក្រិដ្ឋកម្មរបស់ខ្លួន។ គឺអ្នកស៊ើបអង្កេតរូបនេះហើយដែលបានចោទរបបកុម្មុយនិស្តក្រុងព្យុងយ៉ាងចំៗពីបទឧក្រិដ្ឋកម្មប្រឆំាងមនុស្សជាតិ។ ដោយឡែក និងដើម្បីចេញមុខការពារខ្លួន លោកប្រមុខកូរ៉េខាងជើងគីម ជុនអ៊ុនគ្រោងនឹងបញ្ជូនមនុស្សជំនិតរបស់លោកទៅកាន់ប្រទេសរុស្ស៊ីដើម្បីសុំការគំាទ្រពីក្រុងម៉ូស្គូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
លោក Marzuki Darusman អ្នករាយការណ៍ពិសេសរបស់អង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកូរ៉េខាងជើងបានយល់ឃើញថា លោកគីម ជុនអ៊ុនត្រូវតែចូលខ្លួនឆ្លើយបំភ្លឺនៅមុខតុលាការព្រហ្មទ័ណ្ឌអន្តរជាតិពីបទឧក្រិដ្ឋមួយចំនួនដែលបានកើតមាននៅមុនការឡើងកាន់អំណាចរបស់លោក បើមិនដូច្នោះទេ លោកក៏ជាអ្នករួមគំនិតម្នាក់ដែរ។ កំណត់សម្គាល់របស់លោក Darusman បានធ្វើឡើង ចំពេលដែលសហភាពអឺរ៉ុប និងប្រទេសជប៉ុនបានដាក់សេចក្តីព្រាងច្បាប់មួយទៅកាន់ក្រុមប្រឹក្សាសន្តិសុខអង្គការសហប្រជាជាតិឲ្យប្តឹងថ្នាក់ដឹកនំាកូរ៉េខាងជើងពីបទឧក្រិដ្ឋកម្មប្រឆំាងមនុស្សជាតិនៅតុលាការព្រហ្មទ័ណ្ឌអន្តរជាតិ។ នៅសប្តាហ៍ខាងមុខ មហាសន្និបាតអង្គការសហប្រជាជាតិក៏អាចនឹងលើកយកសេចក្តីព្រាងច្បាប់នោះទៅពិនិត្យ ពិភាក្សាដែរ។
សេចក្តីព្រាងច្បាប់ស្នើដោយសហភាពអឺរ៉ុប និងប្រទេសជប៉ុនបានធ្វើឡើង ដោយផ្អែកលើរបាយការណ៍របស់គណៈកម្មការស៊ើបអង្កេតអ.ស.ប. ចេញផ្សាយកាលពីដំណាច់ខែកុម្ភៈកន្លងទៅ។ របាយការណ៍បានបង្ហាញថា មានអ្នកទោសនយោបាយរាប់សិបពាន់នាក់បានបាត់បង់ជីវិតក្នុងរយៈពេល ៥០ឆ្នំាចុងក្រោយនេះ និងមានពី ៨០ ០០០ ទៅ ១២០ ០០០នាក់ផ្សេងទៀតកំពុងជាប់ក្នុងជំរំឃុំឃំាងសព្វថ្ងៃដោយទទួលទារុណកម្មយ៉ាងធ្ងន់ធ្ងរ។ ជាមួយគ្នានេះ នៅមានមនុស្សបាត់ខ្លួនជាង ២០០ ០០០នាក់ផ្សេងទៀតដែលភាគច្រើន ជាជនជាតិកូរ៉េមកពីកូរ៉េខាងត្បូង ជប៉ុន ព្រមទំាងជនជាតិចិន និងជប៉ុនផងដែរ។
យោងតាមលោក Darusman ឧក្រិដ្ឋកម្មរបៀបនេះកំពុងបន្តមានជាប្រចំានៅក្នុងជំនាន់លោកគីម ជុនអ៊ុន និងដែលសហគមន៍អន្តរជាតិមិនអាចបន្តឈរឱបដៃមើលបានទៀតឡើយ។ ដើម្បីអាចប្តឹងថ្នាក់ដឹកនំាកូរ៉េខាងជើងពីបទឧក្រិដ្ឋកម្មប្រឆំាងមនុស្សជាតិនៅតុលាការព្រហ្មទ័ណ្ឌអន្តរជាតិបាន គេត្រូវការសេចក្តីសម្រេចចិត្តពីក្រុមប្រឹក្សាសន្តិសុខ តែរុស្ស៊ី និងចិនដែលមានសិទ្ធិវ៉េតូនឹងចេញមុខប្រឆំាងជាមិនខាន។ យ៉ាងណាក៏ដោយ និងដើម្បីប្រឆំាងនឹងសេចក្តីព្រាងច្បាប់ប្រឆំាងខ្លួន លោកគីម ជុនអ៊ុនត្រៀមបញ្ជូនមនុស្សជំនិតរបស់លោកទៅកាន់ប្រទេសរុស្ស៊ីដើម្បីសុំការគំាទ្របន្ថែមពីក្រុងម៉ូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ