ចំណាប់ខ្មាំងបារាំងត្រូវបានដោះលែង អ្នកអន្តរការីនិងមេភេរវជនអាហ្វ្រិកទទួលបានប្រយោជន៍
ចុះផ្សាយនៅថ្ងៃ៖
ស្តាប់ - ០៤:៣៨
ពលរដ្ឋបារាំង ៤រូប ដែលត្រូវបានក្រុមភេរវជនអ៊ីស្លាមចាប់ធ្វើជាចំណាប់ខ្មាំង នៅប្រទេស នីហ្សេ កាលពី ៣ឆ្នាំមុន ត្រូវបានដោះលែងមកវិញ កាលពីល្ងាចថ្ងៃអង្គារ។ រដ្ឋាភិបាលបារាំងអះអាងថា ការដោះលែងនេះត្រូវបានធ្វើឡើង តាមរយៈការចរចាសុទ្ធសាធ ហើយថា រដ្ឋាភិបាលមិនបានបង់លុយទៅឲ្យក្រុមភេរវជន ជាថ្នូរនឹងការដោះលែងនេះទេ។ តើការចរចានោះប្រព្រឹត្តទៅបែបណា ក្នុងលក្ខខណ្ឌដូចម្តេច បានជាក្រុមភេរវជនអ៊ីស្លាមតំបន់ម៉ាហ្ក្រេប ដែលគេហៅថា Aqmi នោះ យល់ព្រមដោះលែងពលរដ្ឋបារាំង ?
រដ្ឋាភិបាលបារាំងបដិសេធថា មិនបានបង់ប្រាក់កាសរំលោះយកពលរដ្ឋបារាំងពីកណ្តាប់ដៃក្រុមភេរវជនអាល់កៃដា តំបន់ម៉ាហ្ក្រេបនោះទេ ហើយថា គឺការចរចាដែលធ្វើឡើងដោយក្រុមអ្នកចរចារបស់ប្រធានាធិបតីនីហ្សេ ជាមួយក្រុមភេរវជនឯណោះទេ ដែលបានសំរេចទៅដល់ការដោះលែងពលរដ្ឋបារាំងទាំង៤រូប។ ប្រសិនបើរដ្ឋាភិបាលបារាំងមិនបានចេញលុយជាថ្នូរនោះទេ មានន័យថា ក្នុងការចរចាររវាងក្រុមអ្នកចរចាអាហ្វ្រិក និងក្រុមភេរវជន ពិតជាមានលក្ខខណ្ឌអ្វីដោះដូរនឹងគ្នាហើយ។ ព្រោះថា បើទំពក់វាមិនទៅ ភ្នៅក៏វាមិនមកដែរ។
បន្ទាប់ពីពលរដ្ឋបារាំងទាំង៤រូបបានធ្វើដំណើរមកកាន់ប្រទេសបារាំងវិញដោយសុវត្ថិភាព កាលពីថ្ងៃពុធ នៅថ្ងៃព្រហស្បតិ៍ម្សិលមិញ ស្រាប់តែមានព័ត៌មានពីប្រភពអ្នកជិតដិតនឹងសំណុំរឿងដោះលែងនោះថា អ៊ីយ៉ាដ អាក់ ហ្កាលី ជាមេដឹកនាំក្រុមឧទ្ទាមអ៊ីស្លាមអាន់សារ អេដឌីន បានទទួលអភ័យឯកសិទ្ធិរួចពីការចោទប្រកាន់ភេរវកម្មដើម្បីជាថ្នូរនឹងការដោះលែងពលរដ្ឋបារាំងទាំង៤រូប។ គួររំលឹកថា ក្រុមភេរវជនអ៊ីស្លាម អាន់សារ អេដឌីននេះ ជាក្រុមស្និទ្ធនឹងអាល់កៃដា ប្រចាំអាហ្វ្រិកខាងត្បូង។ កងទ័ពបារាំងបានប្រយុទ្ធបណ្តេញក្រុមនេះចេញពីភាគខាងជើងប្រទេសម៉ាលី នៅមុនពាក់កណ្តាលឆ្នាំ២០១៣នេះ។ រដ្ឋាភិបាលប្រទេសម៉ាលីធ្លាប់បានចេញដីកាតាមចាប់ខ្លួនមេដឹកនាំក្រុមឧទ្ទាមរូបនេះពីបទធ្វើការបះបោរ បង្កអំពើភេរវកម្ម។ មេដឹកនាំក្រុមភេរវជនអាន់សារ អេដឌីននេះ បានទាមទារអោយអាជ្ញាធរលែងបន្តការចោទប្រកាន់ប្រឆាំងរូបខ្លួន និងបក្សពួកជិតដិតរបស់ខ្លួនតទៅទៀត។
ប្រសិនបើរឿងនេះពិតជាដូច្នោះមែន មានន័យថាថ្នូរនៃការដោះលែងនេះ ជាផលវិបាកមួយធ្ងន់ណាស់ ព្រោះថា ដោះលែងមេដឹកនាំក្រុមភេរវជនដែលបង្ហូរឈាមមនុស្សស្លូតត្រង់ អោយមានសេរីភាព គឺជាការប្រថុយប្រថានមួយខ្ពស់បំផុត។
ឥលូវនេះ នៅពេលបានរួចខ្លួនពីសំណាញ់ច្បាប់បែបនេះ តើមេភេវជនអាហ្វ្រិកមួយនេះ នឹងទៅធ្វើអ្វីតទៅទៀត? ទៅធ្វើគំរោងភេរវកម្មសម្លាប់មនុស្ស និងចាប់ចំណាប់ខ្មាំងបរទេស រឺក៏យ៉ាងណាទៀតទៅ ?
ងាកមកមើលអ្នកចរចាអន្តរការីអាហ្វ្រិកវិញម្តង។ សារព័ត៌មាន Libération បារាំង ចេញផ្សាយសប្តាហ៍នេះ បានប្រាប់ថា មានមនុស្ស៣នាក់ មកពីសហគមន៍ទូអារេក បានដើរតួជាអន្តរការីសំខាន់ ក្នុងដំណើរការចរចាជាមួយក្រុមភេរវជន រហូតសំរេចបានការដោះលែងចំណាប់ខ្មាំងបារាំងនេះ។ ក្នុងនោះ អ្នកអន្តរការីពីររូបគួរអោយចាប់អារម្មណ៍ជាងគេ។ ទីមួយ គឺជនជាតិនីហ្សេ ឈ្មោះ ម៉ូហាមេដ អាកូតី ជាអតីតក្រុមឧទ្ទាម និងជាអតីតរដ្ឋមន្ត្រីបរិដ្ឋានប្រទេសនីហ្សេ។ បច្ចុប្បន្ននេះ លោក អាកូតី ជាអ្នកគ្រប់គ្រងសាខាមួយរបស់ក្រុមហ៊ុនថាមពលនុយក្លេអ៊ែរបារាំង អារេវ៉ា។ គួររំលឹកថា ចំណាប់ខ្មាំងបារាំងដែលបានដោះលែងកាលពីថ្ងៃអង្គារនៅអាហ្វ្រិកនោះ ជាអ្នកបំរើការងារអោយក្រុមហ៊ុននេះ។ លោក អាកូតី ធ្លាប់មានការពាក់ព័ន្ធក្នុងសំណុំរឿងចរចាចំណាប់ខ្មាំងបារាំងនេះ តាំងតែពីដំបូងម្ល៉េះ។ ដូច្នេះ នៅពេលដែលលោកធ្វើជាអ្នកគ្រប់គ្រងសាខាក្រុមហ៊ុនអារេវ៉ាបារាំងដូច្នេះ អាចមានន័យថា ការចរចាកន្លងមកនោះ បានផ្តល់ជាប្រយោជន៍ដល់លោកអាកូតី ជាជនជាតិនីហ្សេនេះហើយ។
ងាកទៅមើលអ្នកអន្តរការីទីពីរវិញម្តង។ អ្នកទីពីរនេះ គឺលោក អាម៉ាបា អាក់ប៊ីប៊ី មកពីប្រទេសម៉ាលី ហើយក៏មានការពាក់ព័ន្ធក្នុងរឿងចរចាចំណាប់ខ្មាំងបារាំងពីដំបូងទីដែរ។ យោងតាមសារព័ត៌មាន Libération បារាំង កាលពីឆ្នាំ២០១០ ក្រោមការអនុញ្ញាតរបស់រដ្ឋអំណាចប្រទេសម៉ាលី លោក អាក់ប៊ីប៊ី បានទាក់ទងជាមួយ អ៊ីយ៉ាដ អាក់ហ្កាលី ជាមេក្រុមភេរវជនអ៊ីស្លាម អាន់សារ អេដឌីន ដែលលឺថាបានទទួលអភ័យឯកសិទ្ធិជាថ្នូរដោះលែងចំណាប់ខ្មាំងបារាំងនេះ។ លោក អាក់ប៊ីប៊ី អ្នកអន្តរការីទីពីរក្នុងរឿងចំណាប់ខ្មាំងបារាំងនេះ បានជួយអោយជនជាតិនីហ្សេ លោក ម៉ូហាមេដ អាកូតី ដែលជាអ្នកអន្តរការីទីមួយនោះបានជួបពិភាក្សាជាមួយមេភេរវជន អ៊ីយ៉ាដ អាក់ហ្កាលី នេះ។ ប្រសិនបើមេភេរវជនអ៊ីស្លាម អាក់ហ្កាលី គ្មានចំណាប់ខ្មាំងបារាំងក្នុងដៃនោះទេ ក៏មេភេរវជនមួយនេះអាចទាក់ទងក្រុមភេរវជនដែលមានចំណាប់ខ្មាំងបារាំងក្នុងដៃនោះបានដែរ។ ហើយការចរចាអោយមានការដោះលែងនោះ គឺអាចសំរេចឡើងតាមរយៈការយល់ព្រមអោយមេភេរវជននេះ បានទទួលអភ័យឯកសិទ្ធិ រួចផុតពីទោសភេរវកម្ម ហើយបក្សពួកភេរវជនរបស់ខ្លួនក៏ទទួលបានប្រយោជន៍រួចផុតពីសំណាញ់ច្បាប់ផងដែរ។
ងាកមើលផ្នែកការទូតវិញម្តង ប្រធានាធិបតីបារាំងបានអរគុណប្រធានាធិបតីនីហ្សេដែលបានប្រឹងប្រែងគ្រប់បែបយ៉ាងដើម្បីអោយពលរដ្ឋបារាំងទាំងនោះរួចខ្លួនមកវិញ។ មានន័យថា បារាំងប្រហែលជានៅតែបន្តទំនាក់ទំនងជិតដិតផ្នែកសេដ្ឋកិច្ចពាណិជ្ជកម្មជាមួយនីហ្សេតទៅទៀត។ នេះជាប្រយោជន៍មួយធំធេងសំរាប់ប្រទេសនីហ្សេ។
និយាយរួមទៅ ថ្វីបើរដ្ឋបារាំងប្រកាសថា ខ្លួនមិនចេញប្រាក់កាសអ្វីជាថ្នូរនឹងការដោះលែងពលរដ្ឋខ្លួនមែន ប៉ុន្តែបើមើលទៅប្រទេសនីហ្សេនៅអាហ្វ្រិកវិញ ទាំងអ្នកអន្តរការីនៃការចរចាសំណុំរឿងនេះ ទាំងផ្នែកសេដ្ឋកិច្ចជាតិ សុទ្ធតែបានទទួលប្រយោជន៍ទាំងអស់ ដោយសារតែបានចូលរួមសង្គ្រោះអាយុជីវិតចំណាប់ខ្មាំងបារាំង។ ភាពសៅហ្មងគឺនៅត្រង់ថា ជាថ្នូរនឹងការដោះលែង អាជ្ញាធរអាហ្វ្រិកបានសំរេចអោយមេភេរវជនអ៊ីស្លាម មានសេរីភាពរួចផុតពីសំណាញ់ច្បាប់ នេះជាគ្រោះថ្នាក់មួយធំសំរាប់សុវត្ថិភាពសន្តិសុខនៅអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ