គណបក្សសង្គ្រោះជាតិដែលគ្រោងចុះបញ្ជី មិនទាន់មានឈ្មោះលោកកឹម សុខា
គណបក្សសង្គ្រោះជាតិដែលកើតចេញពីការរួមគ្នារវាងគណបក្សសមរង្ស៊ី និងគណបក្សសិទ្ធិមនុស្សនឹងត្រូវគេគ្រោងចុះបញ្ជីនៅថ្ងៃចន្ទ ទី២០ ខែសីហាដើមសប្តាហ៍ក្រោយនៅឯក្រសួងមហាផ្ទៃ។ គណបក្សនេះមានលោកសម រង្ស៊ីឈរឈ្មោះជាប្រធាន តែគ្មានឈ្មោះលោកកឹម សុខាជាអនុប្រធានដូចការគ្រោងទុកនោះទេ ពីព្រោះតែលោកចង់រក្សាតួនាទីជាតំណាងរាស្ត្រគណបក្សសិទ្ធិមនុស្សរហូតដល់ពេលជិតបោះឆ្នោត។ ការប៉ុនប៉ងចុះឈ្មោះគណបក្សនេះត្រូវបានគេគ្រោងរួចរាល់ហើយ បើទោះជាភាពជា«ទណ្ឌិត»របស់លោកសម រង្ស៊ី ត្រូវគេមើលឃើញថា ជាឧបសគ្គក្នុងដំណើរការចុះឈ្មោះនេះក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅថ្ងៃចន្ទទី២០សីហាដើមសប្តាហ៍ក្រោយនេះ សំណុំបែបបទដើម្បីចុះបញ្ជីគណបក្សសង្គ្រោះជាតិ នឹងត្រូវគេនាំទៅដាក់នៅក្រសួងមហាផ្ទៃដើម្បីសុំចុះបញ្ជីផ្លូវការ។ គណបក្សប្រឆាំងថ្មីនេះមានលោកសម រង្ស៊ីឈរឈ្មោះជាប្រធាន និងលោក ប៉ុល ហំម មកពីគណបក្សសិទ្ធិមនុស្សឈរឈ្មោះជាអនុប្រធានបណ្តោះអាសន្ន។ គណបក្សសង្គ្រោះជាតិដែលត្រូវគេគ្រោងនឹងចុះបញ្ជីនៅឯក្រសួងមហាផ្ទៃ មានសមាសភាពគ្រប់គ្រាន់មកពីគណបក្សសម រង្ស៊ី និងគណបក្សសិទ្ធិមនុស្ស ប៉ុន្តែ នៅមិនទាន់មានរចនាសម្ពន្ធ័ត្រឹមត្រូវនៅឡើយទេដោយសារតែបញ្ហាផ្លូវច្បាប់ជាច្រើន។ ជាក់ស្តែងនៅក្នុងបញ្ជីគណៈកម្មាធិការបណ្តោះអាសន្នដែលត្រូវបញ្ជូនទៅក្រសួងមហាផ្ទៃ គ្មានឈ្មោះលោកកឹម សុខា នោះទេ។
លោក ប៉ុល ហំម អ្នកនាំពាក្យគណបក្សសិទ្ធិមនុស្សបានពន្យល់ប្រាប់វិទ្យុបារាំងអន្តរជាតិនៅថ្ងៃនេះថា លោកកឹម សុខា គ្មានឈ្មោះក្នុងបញ្ជីដោយសារតែលោកនៅរក្សាតួនាទីជាអ្នកតំណាងរាស្ត្រគណបក្សសិទ្ធិមនុស្ស។ លោកបន្តថា មិនមែនតែលោកកឹម សុខាម្នាក់ទេ ប៉ុន្តែ អ្នកតំណាងរាស្ត្រ សមាជិកព្រឹទ្ធសភា និងសមាជិកក្រុមប្រឹក្សាជាប់ឆ្នោតក្នុងតំណែងបច្ចុប្បន្នទាំងពីរគណបក្សសុទ្ធតែគ្មានឈ្មោះនៅក្នុងបញ្ជីគណបក្សថ្មីនេះដូចគ្នា។ ប៉ុន្តែ អង្គសមាជមួយនឹងត្រូវគេរៀបចំឡើងនៅពេលជិតបោះឆ្នោតដើម្បីរៀបចំសមាសភាពច្បាស់លាស់របស់គណបក្សនេះ។ ពេលនោះ លោកកឹម សុខា និងមានវត្តមានជាអនុប្រធានគណបក្សសង្គ្រោះជាតិដូចការគ្រោងទុក។
ប៉ុន្តែ ការចុះបញ្ជីគណបក្សសង្គ្រោះជាតិត្រូវគេមើលឃើញថា នឹងមិនអាចទៅរួចឡើយ ដោយសារតែលោកសម រង្ស៊ី ដែលឈរឈ្មោះជាប្រធានបក្សត្រូវបានរដ្ឋាភិបាលក្រុងភ្នំពេញចាត់ទុកជា«ទណ្ឌិត» ដែលបាត់បង់សិទ្ធិធ្វើនយោបាយទៅហើយ។ ក្រសួងមហាផ្ទៃច្បាស់ជានឹងយកបញ្ហានេះធ្វើជាមូលដ្ឋានក្នុងការបដិសេធ មិនចុះឈ្មោះគណបក្សថ្មីនេះ។ យ៉ាងណាក៏ដោយ លោក ប៉ុល ហំម បានអះអាងថា លោកមិនបានរកឃើញច្បាប់ណាមួយដែលបញ្ជាក់ថា លោកសម រង្ស៊ីមិនអាចឈរឈ្មោះជាប្រធានគណបក្សបាននោះឡើយ។
គួររម្លឹកថា គណបក្សសមរង្ស៊ី និងគណបក្សសិទ្ធិមនុស្ស បានព្រមព្រៀងចុះហត្ថលេខាជាមួយគ្នា កាលពីថ្ងៃទី១៧ ខែកក្កដា ឆ្នាំ២០១២ នៅទីក្រុងម៉ានីល ប្រទេសហ្វីលីពីន ដើម្បីបង្កើត ចលនាប្រជាធិបតេយ្យសង្គ្រោះជាតិ ។ ចលនានេះក៏បានក្លាយជាឈ្មោះគណបក្សថ្មីមួយដែលមានលោកសម រង្ស៊ីជាប្រធាន និងលោកកឹម សុខា ជាអនុប្រធាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ