រដ្ឋាភិបាលបដិសេធរបាយការណ៍ដីធ្លីរបស់លីកាដូ
រដ្ឋាភិបាលតាមរយៈក្រសួងរៀបចំដែនដីនគរូបនីយកម្មនិងសំណង់បានបដិសេធចោលរបាយការណ៍របស់អង្គការលីកាដូដែលរកឃើញថា ចំនួនអ្នករងគ្រោះដោយបញ្ហាដីធ្លីនៅកម្ពុជាកើនលើសពីកន្លះលាននាក់។ នៅក្នុងសន្និសីទកាសែតនាព្រឹកថ្ងៃព្រហស្បតិ៍នេះ ក្រសួងដែលទទួលបន្ទុកគ្រប់គ្រងដីធ្លីមួយនេះបានអះអាងថា ទំនាស់ដីធ្លីនៅកម្ពុជាមានចំនួនតិចតួចប៉ុណ្ណោះ ហើយទំនាស់ជាច្រើនត្រូវបានដោះស្រាយក្រោមគោលនយោបាយកំណែទម្រង់របស់រដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ផ្ទុយពីអង្គការលីដាដែលបានហៅគោលនយោបាយកំណែទម្រង់ដីធ្លីរបស់រដ្ឋាភិបាលថាជាបរាជ័យនោះ មន្ត្រីរដ្ឋាភិបាលបានអះអាងនៅថ្ងៃនេះថា កំណែទម្រង់ដីធ្លីរបស់ខ្លួនបានទទួលជោគជ័យយ៉ាងធំធេង។ លោក លឹម វាន់ រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់បានប្រាប់ក្រុមអ្នកកាសែតថា គិតមកដល់ពេលនេះ ប័ណ្ណកម្មសិទ្ធិដីធ្លីចំនួនជាង ៣,៤ លានប័ណ្ណត្រូវបានចែកជូនប្រជាពលរដ្ឋ។
ការចែកប័ណ្ណកម្មសិទ្ធិដីធ្លីទាំងនោះធ្វើឡើងតាមរយៈ ការចុះបញ្ជីជាលក្ខណៈប្រព័ន្ធផង តាមរយៈបទបញ្ជា ០១ ផង និងតាមរយៈការចុះបញ្ជីដែលមានលក្ខណៈដាច់ដោយដុំផង។ លោករដ្ឋាលេខាធិការបញ្ជាក់ទៀតថា ទំនាស់ដីធ្លីដែលកំពុងកើតមានភាគច្រើជាទំនាស់ព្រំដី ចំណែកទំនាស់ដណ្តើមកម្មសិទ្ធិគ្នារវាងដីឯកជននិងឯកជនក៏មានចំនួនតិចតួចដែរ។
ការបង្ហាញរបាយការណ៍ទាំងនេះបានធ្វើឡើងបន្ទាប់ពីអង្គការលីកាដូបានចេញរបាយការណ៍កាលពីថ្ងៃទី០១មេសាដែលបង្ហាញថា គិតមកត្រឹមខែមិនាឆ្នាំ ២០១៤ នេះ ចំនួនគ្រួសារដែលរងគ្រោះដោយសារជម្លោះដីធ្លីដែលពាក់ព័ន្ធនឹងរដ្ឋក៏ដូចជាភ្នាក់ងាររដ្ឋនៅបានកើនឡើងលើសកន្លះលាននាក់ហើយ។ របាយការណ៍អង្គការលីកាដូបន្តថា ជម្លោះដីធ្លីបានកើនឡើងយ៉ាងឆាប់រហ័សក្នុងរយៈពេល ១៣ ឆ្នាំកន្លងទៅនេះ ជាពិសេស រលកនៃការរំលោភដីធ្លី ដែលមានអំពើហិង្សាផងបានផ្ទុះឡើងរយៈពេលប៉ុន្មានខែដើមឆ្នាំ២០១៤ ដែលបានបង្កផលប៉ះពាល់អាក្រក់ដល់ប្រជាពលរដ្ឋជាង ២០០០ គ្រួសារនៅស្ទើរគ្រប់ខេត្ត។
កំណើនករណីរំលោភដីធ្លីត្រូវបានអង្គការក្រៅរដ្ឋាភិបាលមួយនេះហៅ ថាជាបរាជ័យរបស់រដ្ឋាភិបាលក្នុងការដោះស្រាយបញ្ហាដែលកំពុងបន្តកើតមានទាំងនោះ។ ប៉ុន្តែ លោក សរ សុវណ្ណ រដ្ឋលេខាធិការក្រសួងរៀបចំដែនដីនគរូបនីយកម្មបានច្រានចោលទាំងស្រុងការវាយតម្លៃនេះ។ លោកបានហៅរបាយការណ៍របស់អង្គការលីកាដូថាលម្អៀងដែលមិនឆ្លុះបញ្ចាំងការពិតទេ។ លោក សរ សុវណ្ណ បញ្ជាក់ទៀតថា នៅកម្ពុជាទំនាស់ដីធ្លីមានតិចតួចបំផុតពោលគឺមានត្រឹមតែ៣ឬ៤ករណីប៉ុណ្ណោះក្នុង១០០០ ក្បាលដីឬមិនដល់១ភាគរយផង។
លោករដ្ឋលេខាធិការក៏បានស្តីបន្ទោសអង្គការក្រៅរដ្ឋាភិបាលដែលធ្វើការពាក់ព័ន្ធបញ្ហាដីធ្លីថាមិនបានផ្តល់កិច្ចសហការល្អជាមួយក្រសួងជំនាញឡើយ។ ទោះបីជាបដិសេធមិនទទួលយកព័ត៌មានក្នុងរបាយការណ៍របស់លីកាដូ ប៉ុន្តែ លោក ស សុវណ្ណ បានបញ្ជាក់ថា ក្រសួងអាចយករបាយការណ៍នេះមកសិក្សា ហើយត្រៀមខ្លួនពិភាក្សាគ្នាដោយតម្លាភាពជាមួយសង្គមស៊ីវិលដើម្បីឈានទៅដោះស្រាយបញ្ហាដីធ្លីដែលអាចទទួលយកបានទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ