អាយុជីវិតកុមារប៉ាឡេស្ទីនក្លាយជាផ្ទាំងស៊ីបនៃល្បែងគ្រាប់បែក គ្រាប់កាំភ្លើងរបស់កងទ័ពអ៊ីស្រាអែល
ចុះផ្សាយនៅថ្ងៃ៖
ស្តាប់ - ០៥:០៦
តាំងពីថ្ងៃ៨កក្កដាមក ប្រតិបត្តិការកងទ័ពអ៊ីស្រាអែលប្រឆាំងក្រុមហាម៉ាស នៅតំបន់ហ្កាហ្សា បានសម្លាប់ប្រជាជនប៉ាឡេស្ទីនរាប់រយនាក់ ក្នុងនោះមានកុមារយ៉ាងច្រើនសន្ធឹកសន្ធាប់ស្លាប់ និងរងរបួស។ រហូតទល់ពេលនេះ មានកុមារ៨០នាក់ មានទាំងទារកអាយុ៣ខែផងដែរ ដែលស្លាប់ក្នុងថ្លុកឈាមនៃអំពើហិង្សា។ ស្ថានភាពតានតឹងនៅហ្កាហ្សាពេលនេះ មិនអាចអោយកត់ត្រាតួលេខនេះជាផ្លូវការនៅឡើយទេ។ សហភាពអឺរ៉ុបបានសុំអោយមានការស៊ើបអង្កេតលើមរណភាពកុមារប៉ាឡេស្ទីន។ អ៊ីស្រាអែលទទួលស្គាល់កំហុសនៃប្រតិបត្តិការយោធា ថាពិតជាបានសម្លាប់ជនស៊ីវិលប៉ាឡេស្ទីន តែអ៊ីស្រាអែលមិនបានបង្អង់ដៃនឹងបាញ់ប្រហារនៅហ្កាហ្សាទេ។
ទិសដៅនៃប្រតិបត្តិការយោធាអ៊ីស្រាអែលនៅហ្កាហ្សា គឺកំចាត់ក្រុមហាម៉ាស តែគឺប្រជាជនប៉ាឡេស្ទីន ពិសេសគឺកុមារប៉ាឡេស្ទីនទៅវិញទេ ដែលរងគ្រោះក្នុងថ្លុកឈាមនៃអំពើហិង្សា ពិសេសកុមារអាយុខ្ទង់១២ឆ្នាំ។ យោងតាមអង្គការការពារកុមារ War Child និង Defense for Children ចំនួនកុមារប៉ាឡេស្ទីន ដែលស្លាប់ក្នុងការប្រយុទ្ធរវាងកងទ័ពអ៊ីស្រាអែល និងក្រុមហាម៉ាស មានច្រើនលើសពីចំនួនសកម្មជនប្រយុទ្ធប៉ាឡេស្ទីនទៅទៀត។ សូមបញ្ជាក់ថា ប្រជាជនប៉ាឡេស្ទីននៅតំបន់ហ្កាហ្សា មាន១លាន៨សែននាក់ ក្នុងនោះកុមារមានចំនួនដល់ទៅពាក់កណ្តាល។
រយៈពេលចុងក្រោយនេះ គិតមិនដល់៥ឆ្នាំផង អ៊ីស្រាអែលបានប្រើទ័ពកំចាត់ក្រុមហាម៉ាសនៅហ្កាហ្សា៣ដងទៅហើយ លើកទី៣គឺចាប់ពីថ្ងៃ៨កក្កដាកន្លងមក ពេលកងទ័ពអ៊ីស្រាអែលបើកប្រតិបត្តិការផ្លូវអាកាស ហើយពេលនេះ បន្តរហូតដល់ផ្លូវគោកទៀត បើទោះជាត្រូវសម្លាប់ប្រជាជនប៉ាឡេស្ទីន ពង្រាត់ក្រុមគ្រួសារ អោយព្រាត់ប្រាសគ្នាយ៉ាងណាក៏ដោយ។ ដោយសារការវាយប្រហាររបស់ទ័ពអ៊ីស្រាអែលផ្ទួនៗគ្នាច្រើនលើកមកនេះ កុមារប៉ាឡេស្ទីននៅហ្កាហ្សាជំនាន់បច្ចុប្បន្ន មិនដែលស្គាល់ឡើយ នូវអ្វីដែលហៅថា ភាពសប្បាយរីករាយក្នុងនាមជាកុមារ មិនស្គាល់ឡើយភាពសប្បាយជួបជុំគ្រួសារ។ អ្វីដែលពួកគេស្គាល់ក្នុងការរស់នៅប្រចាំថ្ងៃ គឺសង្គ្រាម អំពើហិង្សា និងថ្លុកឈាម។
ប្រតិបត្តិការយោធាអ៊ីស្រាអែលនៅហ្កាហ្សា ធ្វើឡើងតាំងពីថ្ងៃ៨កក្កដា ចំពេលបុណ្យសាសនារ៉ាម៉ាដង់ ជាបុណ្យតំរូវអោយប្រជាជនអារ៉ាប់ប៉ាឡេស្ទីន តមអាហារពេលថ្ងៃ និងបរិភោគបានតែពេលថ្ងៃលិចបាត់។ តែក្រពះប្រជាជនប៉ាឡេស្ទីនក្រៀមស្វិត ឳពុកម្តាយអារ៉ាប់គ្រប់រូប មានតែទឹកភ្នែក ភាពខ្លោចផ្សាក្នុងដើមទ្រូង ព្រោះតែឈាមកុមារប៉ាឡេស្ទីនហូរឥតឈប់ ក្នុងគ្រាប់កាំភ្លើងកងទ័ពអ៊ីស្រាអែល។ កុមារប៉ាឡេស្ទីនចាប់កំណើត បើកភ្នែកមក ក៏ឃើញតែអំពើហិង្សានៅចំពោះមុខ។ បើកភ្នែកមក ក៏ត្រូវរត់គេចគ្រាប់បែក គ្រាប់កាំភ្លើង មិនដែលបានដេកពួន រត់លេងសុខស្រួលឡើយ។ ជាក់ស្តែង ថ្ងៃពុធសប្តាហ៍មុន អ្នកសារព័ត៌មានបានឃើញផ្ទាល់ភ្នែកនូវការស្លាប់របស់ក្មេងប្រុសតូចៗ២នាក់ អាយុ៩ឆ្នាំ និង១១ឆ្នាំ កំពុងរត់លេងនៅឆ្នេរសមុទ្រ តែបែរជាត្រូវស្លាប់ក្រោមគ្រាប់កាំភ្លើងធំអ៊ីស្រាអែលទៅវិញ។ កុមារផ្សេងទៀតដែលលេងជាមួយគ្នា ដែលរួចផុតពីការស្លាប់នេះ ភ័យញ័រដៃញ័រជើង និងបានស្រែក ហើយរត់ទៅជ្រកអាយុជីវិតក្នុងសណ្ឋាគារមួយកន្លែង។
ពិនិត្យអោយដិតដល់ ភ័យញ័រដល់ថ្នាក់នេះ សបញ្ជាក់ថា ក្មេងៗប៉ាឡេស្ទីនមិនត្រឹមរងការប៉ះទង្គិចផ្លូវកាយទេ គឺផ្លូវចិត្តវិញ ក៏រងគ្រោះធ្ងន់ធ្ងរណាស់ដែរ។ កុមារទាំងនេះ ប្រហែលមិនអាចកសាងផ្លូវចិត្តអោយផុតពីតថភាពហិង្សាដែលកើតជាប្រចាំរវាងអ៊ីស្រាអែលនិងប៉ាឡេស្ទីនទេ។ យោងតាមអង្គការយូនីសេហ្វ មុនមានអំពើហិង្សាពេលនេះ គ្រាន់តែកុមារនៅហ្កាហ្សា ត្រូវការជំនួយប្រឹក្សាផ្លូវចិត្ត មានដល់៦ម៉ឺននាក់។ ឥឡូវនេះ ចំនួននេះនឹងកើនឡើងច្រើនទៀត ដោយសារតែការប្រយុទ្ធរវាងយោធាអ៊ីស្រាអែលនិងក្រុមហាម៉ាសបច្ចុប្បន្ន។
ទាក់ទងនឹងការប៉ះទង្គិចផ្លូវកាយនិងផ្លូវចិត្តនេះដែរ វេបសៃត៍ប្រឆាំងទណ្ឌកម្មលើកុមារប៉ាឡេស្ទីនមួយ stoptorutreenfantspalestiniens.wesign.it បានបរិហារកងទ័ពអ៊ីស្រាអែលថា ពង្រាត់កុមារប៉ាឡេស្ទីនពីក្រុមគ្រួសារ ថាអ៊ីស្រាអែលបានចាប់កុមារប៉ាឡេស្ទីនយកទៅធ្វើបាប វាយដំ និងបំពានផ្លូវភេទ។ មូលហេតុគឺ ដោយសារក្មេងៗទាំងនោះបានគប់ដុំថ្ម លើរថក្រោះអ៊ីស្រាអែល ពេលរថក្រោះកំពុងឈូសផ្ទះប្រជាជន។ យោងតាមវេបសៃត៍ដដែល ជួនកាល តុលាការយោធាអ៊ីស្រាអែលថែមទាំងដាក់ទោសបំពានច្បាប់ លើកុមារប៉ាឡេស្ទីន អាយុ១២ឆ្នាំឡើងទៅ អោយជាប់ពន្ធនាគារទៀតផង។ ហើយបើឳពុកម្តាយពួកគេចង់បានពួកគេមកវិញ ត្រូវតែបង់ពិន័យអោយអ៊ីស្រាអែល។ វេបសៃត៍ការពារកុមារនោះ បានសរសេរទៀតថា អង្គការអន្តរជាតិជាច្រើនក៏បានកត់សម្គាល់ពីទង្វើបំពានរបស់អ៊ីស្រាអែលបែបនេះដែរ។
និយាយរួមមកវិញ អ៊ីស្រាអែលអួតថា ចង់បានសន្តិភាពជាមួយប៉ាឡេស្ទីន តើសន្តិភាពនោះអាចកើតឡើងម្តេចទៅ បើអ៊ីស្រាអែលគិតតែពីបន្តការប្រយុទ្ធ សម្លាប់មនុស្សបែបនេះ?
បើកុមារប៉ាឡេស្ទីនកើតមក ឃើញតែហិង្សាចំពោះមុខ ឃើញតែគ្រាប់កាំភ្លើងជនជាតិហ្ស៊ីហ្វធ្លាក់ក្បែរជើង តើកុមារតូចៗអាចមានគំនិតសន្តិភាពក្នុងខួរក្បាលម្តេចបាន? នៅចំពោះមុខមរណភាពកុមារតូចៗ ដែលសូម្បីតែទារកអាយុ៣ខែក៏រងការវាយប្រហាររបស់អ៊ីស្រាអែលដែរនោះ តើអ៊ីស្រាអែលចង់សម្លាប់ជនជាតិប៉ាឡេស្ទីនផ្តាច់ពូជរឺយ៉ាងណា?
អ៊ីស្រាអែលក៏ដឹងច្បាស់ដែរថា កំចាត់ក្រុមហាម៉ាស គឺដូចជាបាញ់សម្លាប់ប្រជាជននៅហ្កាហ្សាដូច្នោះដែរ។ ជីវិតក្មេងៗប៉ាឡេស្ទីន អាចមានតម្លៃស្មើជីវិតក្មេងៗអ៊ីស្រាអែលទេ? កន្លងទៅថ្មីៗនេះ ក្រោយពេលក្មេងជំទង់អ៊ីស្រាអែល៣រូប ត្រូវគេចាប់ខ្លួននិងត្រូវគេធ្វើឃាត គេនៅចាំបានថា អ៊ីស្រាអែលក៏ប្រតិបត្តិការ កំទេចក្រុមហាម៉ាសភ្លាមៗទៅហើយ ដោយហាក់មិនគិតពីផលវិបាកនៃសង្គ្រាមប្រឆាំងក្រុមហាម៉ាសសោះ។ តែពេលនេះ ក្មេងប៉ាឡេស្ទីនស្លាប់សន្ធឹកសន្ធាប់ ហេតុអ្វីគ្មានមេដឹកនាំអ៊ីស្រាអែលណា ចេញបញ្ជាផ្អាកប្រតិបត្តិការយោធាទៅវិញ? អ៊ីស្រាអែលហាក់បំពានច្បាប់សង្គ្រាម បំពានសិទ្ធិមនុស្ស បំពានសិទ្ធិកុមារ តែសហគមន៍អន្តរជាតិគ្មានឥទ្ធិពលអ្វីទប់ស្កាត់សោះ តើមានយុត្តិធម៌អ្វីចំពោះកុមារប៉ាឡេស្ទីន?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ