សហភាពអឺរ៉ុបបើកគម្រោងថ្មីដើម្បីទាក់ទាញការវិនិយោគទុនរបស់អឺរ៉ុបមកកម្ពុជា
សហភាពអឺរ៉ុប បានបើកដំណើរការកម្មវិធី «អាជីវកម្មអឺរ៉ុបនៅក្នុងទីផ្សារអាស៊ីអាគ្នេយ៍»។ ជាកម្មវិធីថ្មី ដែលនឹងជួយជំរុញឲ្យក្រុមហ៊ុនឯកជនរបស់អឺរ៉ុបឲ្យមកធ្វើអាជីវកម្មនៅអាស៊ីអាគ្នេយ៍ក្នុងនោះក៏មានកម្ពុជាដែរ។ គម្រោងនេះក៏នឹងសហការជាមួយសហគ្រាសធុនតូច និងមធ្យម (SMEs) នៅក្នុងស្រុក ដើម្បីបង្កើតការនាំចេញទៅកាន់ទីផ្សារអឺរ៉ុបផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សភាពាណិជ្ជកម្មសហភាពអឺរ៉ុបប្រចាំនៅកម្ពុជា ហៅកាត់ថា អឺរ៉ូស្សាម (EuroCham) បានបើកដំណើរការកម្មវិធីថ្មីមួយគឺ«អាជីវកម្មអឺរ៉ុបនៅក្នុងទីផ្សារអាស៊ីអាគ្នេយ៍»(SEBSEAM) នៅសណ្ឋាគារ ឡឺរ៉ូយ៉ាល់ (Le Royal) នាថ្ងៃទី១៦កញ្ញានេះ។ កម្មវិធីនេះគ្រោងនឹងចំណាយថវិកាចំនួន៣លានអឺរ៉ូ (គឺស្មើនឹងជិត៤លានដុល្លារសហរដ្ឋអាមេរិក) សម្រាប់រយៈពេល៥ឆ្នាំ ដើម្បីជំរុញឲ្យក្រុមហ៊ុនអាជីវកម្មឯកជនរបស់សហភាពអឺរ៉ុប មកវិនិយោគទុននៅកម្ពុជា និងនាំចេញទំនិញពីកម្ពុជាទៅកាន់សហភាពអឺរ៉ុប។
លោក អេម៉ានុយអែល មឺណង់ទូ (Emmanuel Menanteau) ប្រធានសភាពាណិជ្ជកម្មសហភាពអឺរ៉ុបប្រចាំនៅកម្ពុជា បាននិយាយថា គម្រោងនេះ នឹងជួយពន្យល់ដល់ក្រុមហ៊ុនឯកជនរបស់អឺរ៉ុប ពីស្ថានភាពសក្តានុពលអាជីវកម្មរបស់កម្ពុជា ព្រមទាំងណែនាំពីវិស័យអាទិភាពសម្រាប់ការបណ្តាក់ទុន។ លោកបន្តថា គម្រោងនេះ នឹងសហការជាមួយសហគ្រាសធុនតូចនិងមធ្យម (SMEs)នៅកម្ពុជា ដើម្បីស្វែងរកដៃគូល្អៗមកពីអឺរ៉ុប ក្នុងទិសដៅជំរុញការនាំចេញឲ្យកាន់តែប្រសើរ។
សូមបញ្ជាក់ថា ការវិនិយោគទុនផ្នែកឯកជនរបស់ប្រទេសសមាជិកទាំង២៨នៃសហភាពអឺរ៉ុប នៅតំបន់អាស៊ាន មានចំនួន២៧ភាគរយ ក្នុងនោះ ការបណ្តាក់ទុនវិនិយោគរបស់អឺរ៉ុបនៅកម្ពុជា មានចំនួនតែ២ភាគរយប៉ុណ្ណោះ។ នេះបើតាមលោក ហ្សង់ហ្វ្រង់ស័រ កូតាំង (Jean-François Cautain) ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា។ លោកសម្តែងការ ស្តាយថា ក្រុមហ៊ុនរបស់អឺរ៉ុបនៅកម្ពុជា មានតិចតួច បើប្រៀបនឹងក្រុមហ៊ុនរបស់ចិន កូរ៉េ និងជប៉ុន ជាដើម។ យ៉ាងណាក៏ដោយ ឯកអគ្គរដ្ឋទូតសហភាពអឺរ៉ុបអះអាងថា ស្ថេរភាពនយោបាយរបស់កម្ពុជាបច្ចុប្បន្នបានល្អប្រសើរដែលជាឱកាសល្អសម្រាប់ការធ្វើអាជីវកម្ម។
គួរបញ្ជាក់ថា គម្រោង«អាជីវកម្មអឺរ៉ុបនៅក្នុងទីផ្សារអាស៊ីអាគ្នេយ៍»សម្រាប់ជួយដល់ប្រទេសក្រីក្រ និងប្រទេសកំពុងអភិវឌ្ឍ។ កម្មវិធីនេះ មាននៅស្ទើរតែគ្រប់ប្រទេសនៅតំបន់អាស៊ាន លើកលែងតែសិង្ហបុរី និងព្រុយណេ ដោយសារសេដ្ឋកិច្ចនៃប្រទេសទាំងពីរនេះ រីកចម្រើនហើយ។
លោក ប៉ាន សូរស័ក្តិ រដ្ឋលេខាធិការ ក្រសួងពាណិជ្ជកម្ម បានថ្លែងការគាំទ្រចំពោះគម្រោងរបស់សហភាពអឺរ៉ុបនាពេលនេះ។ លោកទទួលស្គាល់ថា ក្នុងវិស័យពាណិជ្ជកម្ម កម្ពុជានៅមានភាពខ្វះខាតផ្នែកបច្ចេកទេសនៅឡើយ ហើយថា គម្រោងនេះនឹងជួយគិតគូរបន្ថែមទៀត ពីផ្នែកបច្ចេកទេសវិជ្ជាជីវៈដល់យុវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ