កម្ពុជានិង UN ប៉ះសម្តីគ្នារឿងតែងតាំងសហចៅក្រមអន្តរជាតិ
ទីបំផុតទៅឧត្តមក្រុមប្រឹក្សានៃអង្គចៅក្រមបានបដិសេធមិនតែងតាំងលោក Laurent Kasper-Ansermet ជាសហចៅក្រមស៊ើបអង្កេតអន្តរជាតិ តាមសំណើរបស់ភាគីសហប្រជាជាតិទេ។ ការសម្រេចនេះបានធ្វើឲ្យមានការប៉ះទង្គិចពាក្យសម្តីរវាងភាគីសហប្រជាជាតិនិងរដ្ឋាភិបាលកម្ពុជា។ អ្នកនាំពាក្យអគ្គលេខាធិការសហប្រជាជាតិបានចោទកម្ពុជាថា រំលោភកិច្ចព្រមព្រៀងប៉ុន្តែមន្ត្រីកម្ពុជាបានស្តីបន្ទោសមន្ត្រីសហប្រជាជាតិថា បានធ្វើអត្ថាធិប្បាយខុសឆ្គង ដែលនាំឲ្យប៉ះពាល់ដល់កិច្ចពិភាក្សារវាងភាគីទាំងពីរនៅថ្ងៃអង្គារដើមសប្តាហ៍ក្រោយ។ នេះជាភាពតានតឹងថ្មីទៀតសម្រាប់សាលាក្តីខ្មែរក្រហម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
រដ្ឋាភិបាលកម្ពុជាបានជូនដំណឹងជាផ្លូវការទៅអគ្គលេខាធិការអង្គការសហប្រជាជាតិកាលពីថ្ងៃព្រហស្បតិ៍ថា ឧត្តមក្រុមប្រឹក្សានៃអង្គចៅក្រមបានសម្រេចមិនតែងតាំងលោក Laurent Kasper-Ansermet ជាសហចៅក្រមស៊ើបអង្កេតអន្តរជាតិតាមសំណើរបស់ភាគីសហប្រជាជាតិទេ។ សេចក្តីសម្រេចបែបនេះបានធ្វើឡើងដោយសំអាងលើបញ្ហាក្រមសីលធម៌ដែលសហចៅក្រមអន្តរជាតិបម្រុងរូបនេះបានប្រព្រឹត្ត។ នេះបើយោងតាមការចុះផ្សាយក្នុងគេហទំព័ររបស់អង្គការសហប្រជាជាតិ។
អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Martin Nesirky បានថ្លែងកាលពីថ្ងៃសុក្រថា ការសម្រេចមិនតែងតាំងលោក Laurent Kasper-Ansermet គឺជាការរំលោភលើកិច្ចព្រមព្រៀងរវាងរដ្ឋាភិបាលកម្ពុជា និងសហប្រជាជាតិកាលពីឆ្នាំ២០០៣។ មាត្រា៥នៃកិច្ចព្រមព្រៀងនេះបានចែងថា ក្នុងករណីដែលកន្លែងរបស់សហចៅក្រមស៊ើបអង្កេតអន្តរជាតិនៅទំនេរ អ្នកដែលត្រូវតែងតាំងឲ្យចូលកាន់តំណែងគឺជាចៅក្រមស៊ើបអង្កេតអន្តរជាតិបម្រុង។ អ្នកនាំពាក្យអគ្គលេខាធិការអង្គការសហប្រជាជាតិនៅតែជំរុញឲ្យរដ្ឋាភិបាលកម្ពុជាតែងតាំង លោក Laurent Kasper-Ansermet ជាសហចៅក្រមស៊ើបអង្កេតអន្តរជាតិដដែល។
ប្រតិកម្មទៅនឹងបញ្ហានេះ លោក កែវ រ៉េមី អនុប្រធានអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបានសម្តែងការសោកស្តាយចំពោះអត្ថាធិប្បាយជាបន្តបន្ទាប់របស់អ្នកនាំពាក្យអគ្គលេខាធិការសហប្រជាជាតិ។ លោកបានមានប្រសាសន៍ប្រាប់វិទ្យុបារាំងអន្តរជាតិនៅថ្ងៃនេះថា មន្ត្រីអ្នកនាំពាក្យសហប្រជាជាតិមិនគួរគប្បីធ្វើអត្ថាធិប្បាយច្រើនពេកអំពីបញ្ហានេះមុនពេលជំនួបពិភាក្សាគ្នាជាផ្លូវការដែលគ្រោងធ្វើនៅថ្ងៃអង្គារដើមសប្តាហ៍ក្រោយនេះទេ។ លោក កែវ រ៉េមី បានចាត់ទុកអត្ថាធិប្បាយរបស់លោក Martin Nesirky ថាជាសម្ពាធទៅលើកិច្ចពិភាក្សានេះ។
គួរកត់សម្គាល់ថា ចៅក្រមបម្រុងជនជាតិស្វីសរូបនេះធ្លាប់បានធ្វើសេចក្តីថ្លែងការណ៍ម្តងជាពីរដងទាក់ទងនឹងសំណុំរឿង០០៣ និង០០៤ ខណៈដែលលោកមិនទាន់ទទួលការតែងតាំងជាផ្លូវការនៅឡើយ។ បញ្ហានេះទំនងជាហេតុផលដែលនាំដល់ការបដិសេធមិនតែងតាំង។ក្រោយពេលទទួលបានការជូនដំណឹងរបស់ភាគីកម្ពុជា អង្គការសហប្រជាជាតិបានបញ្ជូនលោក David Scheffer អ្នកជំនាញការទទួលបន្ទុកទីប្រឹក្សាសាលាក្តីខ្មែរក្រហមរបស់សហប្រជាជាតិដែលទើបតែងតាំងថ្មីៗឲ្យមកកម្ពុជាភ្លាមដើម្បីពិភាក្សាជាមួយលោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីនៅទីក្រុងភ្នំពេញ។
ជំនួបដែលគេគ្រោងធ្វើឡើងនៅថ្ងៃអង្គារខាងមុខនេះនឹងផ្តោតលើបញ្ហាជាច្រើនក្នុងនោះការតែងតាំងសហចៅក្រមស៊ើបអង្កេតអន្តរជាតិត្រូវគេរំពឹងថានឹងក្លាយជារបៀបវារៈសំខាន់ជាងគេ។ ប៉ុន្តែ លោក កែវ រ៉េមី បញ្ជាក់ថា ភាគីកម្ពុជាមិនធ្វើអត្ថាធិប្បាយអ្វីឡើយនៅមុនពេលជំនួបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ