សវនាការ០០២វគ្គ២ចប់មុនពេលកំណត់បន្ទាប់ពីក្រុមមេធាវីជនជាប់ចោទដើរចេញ
ក្រុមមេធាវីការពារក្តីជនជាប់ចោទ ខៀវ សំផន និង នួន ជា បានដើរចេញពីបន្ទប់សវនាការនៅរសៀលថ្ងៃសុក្រ(នេះ) ដោយសារជនជាប់ចោទនិងក្រុមសហមេធាវីរបស់ពួកគេមានកិច្ចការសំខាន់ដែលត្រូវធ្វើលើសពីការចូលរួមសវនាការលើសំណុំរឿង ០០២ដំណាក់កាលទី២។ពហិការរបស់មេធាវីដែលជម្រុញឲ្យសវនាការចប់មុនកំណត់នោះ បានធ្វើឡើងជួនគ្នា ពីមានការតវ៉ារបស់ក្រុមដើមបណ្តឹងរដ្ឋប្បវេណីទាមទារឲ្យមានសំណងជាបុគ្គល។ញត្តិរបស់ពួកគេត្រូវតុលាការទទួលយក ដោយមិនមានការដោះស្រាយភ្លាមៗឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
អង្គជំនុំជម្រះសាលាក្តីខ្មែរក្រហមបានបញ្ចប់សវនាការរបស់ខ្លួននៅវេលារសៀលថ្ងៃទី១៧ខែ
តុលា មុនកាលកំណត់ដោយហេតុថា មេធាវីជនជាប់ចោទ ខៀវ សំផន និងនួន ជា មានកិច្ចការដែលត្រូវធ្វើដំណាលគ្នា។
នៅវេលាម៉ោងជាង២រសៀលមិនខុសគ្នាពីក្រុមមេធាវីលោកនួន ជាទេ លោក គង់ សំអុន មេធាវីការពារក្តីឲ្យលោក ខៀវ សំផន បានប្រកាសបន្ទាប់ពីចូលពីសំរាកទទួលទាមអាហារថ្ងៃត្រង់មកវិញថាលោកខៀវ សំផន ដែលជាកូនក្តីរបស់លោក មានកិច្ចការចាំបាច់ពីរដែលត្រូវធ្វើដំណាលគ្នាគឺការធ្វើសារណាលើបណ្តឹងសារទុកលើសំណុំរឿង ០០២វគ្គ១សិន ហើយលោកជ្រើសរើសធ្វើកិច្ចការសំខាន់មុន។
នៅចុងក្រោយនៃការបញ្ចប់សវនាការថ្ងៃនេះ លោកចៅក្រម និល នន់ ប្រធានអង្គជំនុំជម្រះថ្លែងថា នឹងធ្វើការប្រកាសនៅថ្ងៃក្រោយពីលទ្ធភាព បន្តសវនាការលើសំណុំរឿង០០២ វគ្គ២ ដែលគ្រោងធ្វើនៅថ្ងៃទី២៧តុលាខាងមុខ ខណៈដែលក្រុមមេធាវីការពារជនជាប់ចោទធ្វើ
ពហិការ។
ជាមួយគ្នានេះ លោក នេត្រ ភត្រា អ្នកនាំពាក្យសាលាក្តីខ្មែរក្រហមបានថ្លែងឲ្យដឹងថា អង្គជំនុំជម្រះសាលាក្តីនឹងធ្វើសេចក្តីសម្រេចមួយទាក់ទងទៅនឹងការដើរចេញពីបន្ទប់សវនាការរបស់ ក្រុមមេធាវីការពារក្តីជនជាប់ចោទ។ ទោះជាយ៉ាងនេះក្តីលោកបញ្ជាក់ថា នៅថ្ងៃទី២១តុលាខាងមុខ នឹងមានកិច្ចប្រជុំមួយស្តីពីការគ្រប់គ្រងតុលាការដែលមានភាគីពាក់ព័ន្ធចូលរួមផងដែរ។
ទាក់ទងទៅនឹងសវនាការ០០២ ដំណាក់កាលទី២នេះដែរ ក្រុមជនរងគ្រោះនៃរបបខ្មែរក្រហមជាច្រើនរយនាក់បានលើកបដា ដាក់ញត្តិទៅកាន់តុលាការដើម្បីតាមទារសំណងជាបុគ្គល រួមមានទាមទារជាប្រាក់១៣៥០០ដុល្លារក្នុងមនុស្សម្នាក់ដែលខ្មែរក្រហមសម្លាប់ និងស្នើឲ្យមានការសាងសង់សារៈមន្ទី១ រោងបុណ្យមួយ និងបណ្ណាល័យមួយលើទំហំដី ១ហិចតាក្នុងមួយខេត្តដើម្បីទុកជាកេរដំណែលប្រវត្តិសាស្ត្រ។
ក៏ប៉ុន្តែលោក នេត្រ ភត្រា អ្នកនាំពាក្យសាលាក្តីខ្មែរក្រហមបានប្រាប់ឲ្យដឹងថា នៅមិនទាន់មានការឆ្លើយតបយ៉ាងណាទេ ដោយញត្តិទាមទារទាំងនេះនឹងត្រូវបញ្ជូនទៅកាន់ភាគីពាក់ព័ន្ធនានា។
សូមបញ្ជាក់ថា សំណុំរឿង ០០២វគ្គ០២នេះ គឺជាការជំនុំជម្រះក្តីទី២ ប្រឆាំងនឹង នួន ជា និងខៀវ សំផន។ ទីតាំងឧក្រិដ្ឋកម្មដែលបានចោទប្រកាន់ និងការចោទប្រកាន់តាមអង្គហេតុខាងក្រោមនេះ ជាមូលដ្ឋានសម្រាប់ការជំនុំជម្រះរួមមាន បទប្រល័យពូជសាសន៍ចំពោះជនជាតិចាម និងវៀតណាម។ ការរៀបការដោយបង្ខំ និងបទរំលោភសេពសន្ថវៈ។ ការបោសសម្អាតផ្ទៃក្នុង។ មន្ទីរសន្តិសុខ ស-២១ មន្ទីរសន្តិសុខក្រាំងតាចាន់មន្ទីរសន្តិសុខ អូរកន្សែង មន្ទីរសន្តិសុខភ្នំក្រោល។ ការដ្ឋានទំនប់ ១ មករា ការដ្ឋានសាងសង់ព្រលានយន្តហោះខេត្តកំពង់ឆ្នាំង ការដ្ឋានទំនប់ត្រពាំងថ្ម សហករណ៍ត្រាំកក់។ ការប្រព្រឹត្តិចំពោះពុទ្ធសាសនិកជន និង ការប្រព្រឹត្តិជាក់លាក់លើអ្នករដ្ឋការនៃរបបសាធារណរដ្ឋខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ