ថ្ងៃ៧មករា ឆ្នាំ១៩៧៩គឺជាថ្ងៃប្រវត្តិសាស្ត្ររបស់ពលរដ្ឋកម្ពុជា។ ប៉ុន្តែទិវានេះត្រូវបានគណបក្សនៅកម្ពុជាបានលាបពណ៌ឱ្យថ្ងៃនេះផ្សេងៗគ្នាអស់ជាង៣៧ឆ្នាំមកហើយ។ សម្រាប់គណបក្សប្រជាជនកម្ពុជាថ្ងៃនេះ គឺថ្ងៃរំដោះពលរដ្ឋកម្ពុជាទាំងមូលឱ្យចេញពីរបបខ្មែរក្រហម។ ដោយឡែក គណបក្សក្រៅរដ្ឋាភិបាលតាំងពីគណបក្សហ៊្វុនស៊ិនប៉ិច និងគណបក្សសង្គ្រោះជាតិនាពេលបច្ចុប្បន្នបដិសេធថ្ងៃនេះថាជាថ្ងៃឈ្លានពានរបស់កងទ័ពវៀតណាម ដែលជាម្ចាស់អាណានិគមមកលើកម្ពុជា។ ប៉ុន្តែសម្រាប់អ្នកវិភាគ និងអ្នកប្រវត្តិសាស្ត្រអ្នកនយោបាយកម្ពុជាមិនគួរមើលឃើញ និងនិយាយយកត្រូវតែម្ខាងនោះទេ ព្រោះថារឿងនេះគឺជាសច្ចភាពប្រវត្តិសាស្ត្រ។ យ៉ាងណាក៏ដោយ អ្នកនយោបាយគួរបញ្ឈប់លាបពណ៌និងបែងចែកគ្នាដែលបង្ហាញពីការបែកបាក់ ព្រោះថាក្នុងសំណុំរឿង៧មករា ឬសង្គ្រាមនៅកម្ពុជាក្នុងទស្សវត្សទី៧០ និង៨០ កម្ពុជាទាំងមូលគឺជាអ្នករងគ្រោះទាំងអស់។
