សហព័ន្ធនិស្សិតបញ្ញាវ័នកម្ពុជា ប្រកាន់ជំហរធ្វើបាតុកម្មប្រឆាំងនឹងវៀតណាម
នៅថ្ងៃសៅរិ៍នេះ អង្គការសហព័ន្ធនិស្សិតបញ្ញាវ័នកម្ពុជា បានប្រកាសជំហរចុងក្រោយថា អង្គការនឹងនៅតែធ្វើបាតុកម្មនៅមុខស្ថានទូតវៀតណាម នាថ្ងៃទី៨កក្កដាខាងមុខនេះ ដើម្បីទាមទារអោយស្ថានទូតវៀតណាមសុំទោស។ ការប្រកាសជំហរបែបនេះ បានធ្វើឡើង ក្រោយមួយថ្ងៃ បន្ទាប់ពីអាជ្ញាធរក្រុងភ្នំពេញបានច្រានចោលសំណើរសុំធ្វើបាតុកម្មរបស់ពួកគេ នៅក្នុងកិច្ចប្រជុំមួយកាលពីថ្ងៃទី៤កក្កដាម្សិលមិញនេះ។
ចុះផ្សាយនៅថ្ងៃ៖
ស្តាប់ - ០១:៥៦
បាតុកម្មនឹងកើតមាន នៅមុខស្ថានទូតវៀតណាមប្រចាំនៅទីក្រុងភ្នំពេញ នាថ្ងៃទី៨កក្កដាខាងមុខនេះ បើទោះបីជាអាជ្ញាធរក្រុងភ្នំពេញមិនអនុញ្ញាតិ និងបានព្រមានចាត់វិធានការបង្ក្រាប់ក្តី។ នេះបើតាមការបញ្ជាក់ពីលោក ម៉ៅ ពិសេស ប្រធានអង្គការសហព័ន្ធនិស្សិតបញ្ញាវ័នកម្ពុជា ដែលបានថ្លែងប្រាប់វិទ្យុបារាំងអន្តរជាតិ RFI នៅថ្ងៃសៅរិ៍ទី៥កក្កដានេះ។ ប៉ុន្តែលោក ម៉ៅ ពិសេស នៅបារម្ភថា អាជ្ញាធរនឹងដាក់របាំងទប់ស្កាត់ និងកងកំលាំងបង្ក្រាប់រារាំងបាតុកម្មរបស់លោក មិនអោយជួបជុំគ្នាដោយស្រួលនោះទេ។
សូមបញ្ជាក់ថា នៅក្នុងកិច្ចប្រជុំនៅសាលាក្រុងភ្នំពេញកាលពីថ្ងៃទី៤កក្កដាម្សិលម៉ិញ លោក ឃួង ស្រេង អភិបាលរងរាជធានីភ្នំពេញ មិនអនុញ្ញាតិអោយអង្គការសហព័ន្ធនិស្សិតបញ្ញាវ័នកម្ពុជាធ្វើបាតុកម្មនៅមុខស្ថានទូតវៀតណាមនោះទេ និងបានព្រមានចាត់វិធានការតាមផ្លូវច្បាប់។ ប៉ុន្តែអាជ្ញាធរបានអនុញ្ញាតិអោយពួកគេធ្វើការជួបជុំបាននៅទីស្នាក់ការ រឺកន្លែងឯកជនណាមួយបាន។ ប៉ុន្តែលោក ម៉ៅ ពិសេស បានបញ្ជាក់ថា អង្គការសហព័ន្ធនិស្សិតបញ្ញាវ័នកម្ពុជា នៅតែធ្វើបាតុកម្មនៅមុខស្ថានទូតវៀតណាម តាមការគ្រោងទុក។
តាមគំរោង បាតុកម្មរបស់អង្គការសហព័ន្ធនិស្សិតបញ្ញាវ័នកម្ពុជា នៅថ្ងៃទី៨កក្កដាខាងមុខនេះ នឹងមានយុវជន និងនិស្សិតជាង ១០០នាក់ ចូលរួម ដោយពួកគេនឹងឈរស្រែក ទាមទារអោយមន្ត្រីស្ថានទូតវៀតណាមទទួលស្គាល់ការពិតនៃប្រវត្តិសាស្ត្រ និងចេញមកសុំទោសជាផ្លូវការ ចំពោះសំដីរបស់អ្នកនាំពាក្យស្ថានទូតវៀតណាមថា ទឹកដីកម្ពុជាក្រោម គឺជារបស់វៀតណាមតាំងពីយូមកហើយនោះ។ ជាការអះអាង ដែលនាំអោយអង្គការ-សមាគមខ្មែរកម្ពុជាក្រោម និងអង្គការសហព័ន្ធនិស្សិតបញ្ញាវ័នកម្ពុជា បញ្ចេញប្រតិកម្ម នឹងប្រកាសធ្វើបាតុកម្មជាបន្តបន្ទាប់។
នៅថ្ងៃអាទិត្យទី៦កក្កដាស្អែកនេះដែរ អង្គការសមាគមខ្មែរកម្ពុជាក្រោមដឹកនាំដោយលោក ថាច់ សេដ្ឋា នឹងជួបជុំគ្នានៅក្នុងវេទិការមួយ មុនពេលពួកគេធ្វើបាតុកម្មដូចគ្នានេះ នៅចន្លោះពីថ្ងៃទី១០ដល់ថ្ងៃទី២០កក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ