កិច្ចប្រជុំស្តីពីការអភិរក្សនិងអភិវឌ្ឍន៍តំបន់អង្គរចាប់ផ្តើមហើយ
កិច្ចប្រជុំរបស់គណៈកម្មការសម្របសម្រួលបច្ចេកទេសលើកទី២០ស្តីពីការអភិរក្សនិងអភិវឌ្ឍន៍តំបន់អង្គរវត្ត ត្រូវបានប្រារព្ធធ្វើឡើងរយៈពេលពីរថ្ងៃ ចាប់ផ្តើមនៅថ្ងៃទី៨មិថុនានេះនៅទីរួមខេត្តសៀមរាប។ កិច្ចប្រជុំប្រចាំឆ្នាំនេះ បានធ្វើឡើងក្រោមកិច្ចសហប្រតិបត្តិការ សម្របសម្រួលពីរដ្ឋាភិបាលបារាំង និងរដ្ឋាភិបាលជប៉ុន ដោយមានការចូលរួមពីបណ្តាតំណាងប្រទេសជាដៃគូអភិវឌ្ឍន៍ អង្គការUNESCO អាជ្ញាធរអប្សរា និងអ្នកជំនាញបេតិកភ័ណ្ឌពិភពលោកជាច្រើនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
កិច្ចប្រជុំគណៈកម្មការសម្របសម្រួលបច្ចេកទេសដើម្បីអភិរក្សនិងអភិវឌ្ឍន៍តំបន់អង្គរត្រូវបានធ្វើឡើងដោយមានតំណាងរដ្ឋាភិបាលបារាំងនិងជប៉ុនជាសហប្រធាន។ សកម្មភាពការងារនិងគម្រោងផែនការអភិវឌ្ឍន៍តំបន់អង្គរត្រូវបានបង្ហាញ។ ក្នុងនោះ លោក សុខ អាន ឧបនាយករដ្ឋមន្ត្រី ទទួលបន្ទុកទីស្តីការគណៈរដ្ឋមន្ត្រីនិងជាប្រធានអាជ្ញាធរអប្សរាក៏បានចូលរួមកិច្ចប្រជុំដែលតំណាងឲ្យរដ្ឋាភិបាលកម្ពុជា។
លោក សុខ អាន បានលើកឡើងថាទន្ទឹមនឹងការអភិរក្សនិងអភិវឌ្ឍន៍តំបន់អង្គរអ្នកជំនាញដែលមានការប្រុងប្រយ័ត្នខ្ពស់ នៅឆ្នាំកន្លងមក បានសម្រេចបង្កើតនូវផែនទីដែលទាក់ទងហានិភ័យរបស់ប្រាង្គប្រាសាទ និងទាក់ទងទៅនឹងសហគមន៍ឲ្យចូលរួមវិភាគទាននៅក្នុងការគ្រប់គ្រងទីក្រុងអង្គរ។
តំណាងរដ្ឋាភិបាលកម្ពុជាបានកត់សម្គាល់ថា ទេសចរក្នុងតំបន់អង្គរមានការកើនឡើងជាប្រចាំ ហើយផ្តល់នូវផលប្រយោជន៍មួយចំនួន ដូចជានៅឆ្នាំ ២០១០កើន១៦%បើធៀបនឹងឆ្នាំ២០០៩ ហើយ ៣ខែដំបូងឆ្នាំ ២០១១នេះកើនឡើង១៤% បើធៀបនឹងឆ្នាំមុន។ ក៏ប៉ុន្តែចំនួនជាក់លាក់នៃអ្នកទេសចរនិងចំណូល ដែលបានមកពីប្រាង្គប្រាសាទបុរាណមិនត្រូវបានបញ្ជាក់ទេ។
សកម្មភាពការងារអភិរក្សនិងអភិវឌ្ឍន៍តំបន់ប្រាសាទអង្គរវត្តក្នុងពេលកន្លងមកក៏ត្រូវបានលោកឧបនាយករដ្ឋមន្ត្រី សុខ អាន លើកឡើងក្នុងកិច្ចប្រជុំផងដែរ។ នោះគឺការបង្កើតភូមិរន្ធតាឯកនិងភូមិវប្បធម៌សម្តេចតេជោ ដើម្បីបញ្ជូនប្រជាជនតាមតំបន់នានាឲ្យរស់នៅទីនោះ។
ទាំងអស់នេះបានធ្វើឡើងដោយគោរពទៅនឹងបរិស្ថាន ប្រជាជនរស់នៅក្នុងភាពបៃតង មានរុក្ខផលហូបផ្លែ ហើយបានផ្តល់នូវចំណូលជាប្រចាំសម្រាប់ជីវភាពរស់នៅ។ កម្ពុជាក៏បានបង្កើតសួនគ្រឿងទេស ដែលទេសចរអាចមកលំហកំសាន្ត រវាងប្រាង្គប្រាសាទនានា ដែលគេអាចរកឃើញនូវភាពសម្បូរបែបរបស់កម្ពុជា ដោយបានពង្រឹងចំណេះដឹងអំពីវប្បធម៌ខ្មែរ។ នេះបើតាមការបញ្ជាក់របស់លោក សុខ អាន។
ដោយសារសមិទ្ធិផលទាំងអស់នេះហើយបានជាកិច្ចប្រជុំនៅព្រឹកមិញ មានពិធីបំពាក់មេដាយកិត្តិយសនិងគ្រឿងឥស្សរិយយសដល់មន្ត្រីកម្ពុជានិងបរទេសដែលបានខំប្រឹងប្រែងធ្វើការងារអភិរក្សអង្គរ។ ប្រាសាទអង្គរវត្តដែលត្រូវបានចុះបញ្ជីជាសម្បត្តិបេតិកភណ្ឌពិភពលោកកាលពីឆ្នាំ១៩៩២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ