អង្គការសហប្រជាជាតិ៖ ការស្រឡាញ់ភេទដូចគ្នា គឺត្រូវព្យាបាលបញ្ហា មិនមែនមនុស្សទេ
ក្រុមមនុស្សស្រឡាញ់ភេទដូចគ្នានៅកម្ពុជា នៅតែជួបប្រទះនូវការរំលោភបំពាន និងការរើសអើង ទាំងនៅផ្ទះ នៅសាលា នៅកន្លែងធ្វើការ និងនៅតាមប្រព័ន្ធផ្សព្វផ្សាយ។ នៅចំពោះមុខបញ្ហានេះ សកម្មជនសិទ្ធិមនុស្សស្រឡាញ់ភេទដូចគ្នា បានអំពាវនាវឲ្យមានការការពារ និងដោះស្រាយបញ្ហានេះ ដើម្បីឲ្យអ្នកស្រឡាញ់ភេទដូចគ្នា ទទួលបានឱកាសស្មើមុខស្មើមាត់ដូចអ្នកផ្សេងទៀតនៅក្នុងសង្គម។ នេះបើតាមរបាយការណ៍ស្ដីពីក្រុមមនុស្សស្រឡាញ់ភេទដូចគ្នា ដែលមានចំណងជើងថា «ត្រូវព្យាបាលបញ្ហា មិនមែនព្យាបាលមនុស្ស» និងដែល ការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស ចេញផ្សាយនៅថ្ងៃព្រហស្បតិ៍ ទី០៧សីហា។
ចុះផ្សាយនៅថ្ងៃ៖
ស្តាប់ - ០១:៥៩
លោកស្រី Vicente Salas អ្នកសរសេររបាយការណ៍ បានវាយតម្លៃថា កម្ពុជាគឺជាប្រទេសអព្យាក្រឹត្យសម្រាប់ក្រុមមនុស្សស្រឡាញ់ភេទដូចគ្នា មិនដាក់ទោសទណ្ឌ តែក៏មិនបង្ហាញសញ្ញាវិជ្ជមានចំពោះបញ្ហានេះដែរ។ ឥរិយាបទស្រឡាញ់ភេទដូចគ្នា មិនមែនជាបទឧក្រិដ្ឋទេ នៅកម្ពុជា។ ច្បាប់ ក៏ដូចជាគោលនយោបាយនានារបស់កម្ពុជា ក៏ហាក់ដូចជាស្ងៀមស្ងាត់ នៅចំពោះមុខបញ្ហារបស់មនុស្សស្រឡាញ់ភេទដូចគ្នា និងសិទ្ធិរបស់ពួកគេ ដែលត្រូវសង្គមរំលោភបំពាន និងរើសអើង។
តាមរបាយការណ៍ ក្រុមមនុស្សស្រឡាញ់ភេទដូចគ្នានៅកម្ពុជា ដែលមានដូចជា មនុស្សស្រីស្រលាញ់ភេទដូចគ្នា មនុស្សប្រុសស្រលាញ់ភេទដូចគ្នា មនុស្សស្រលាញ់ភេទទាំងពីរ និងមនុស្សប្តូរភេទ ត្រូវទទួលរងការបដិសេធពីក្រុមគ្រួសារ ឬត្រូវបង្ខំឲ្យរៀបការ ការប៉ុនប៉ងព្យាបាលជំងឺស្រឡាញ់ភេទដូចគ្នា និងការរំលោភបំពានទាំងខាងរាងកាយ និងស្មារតី។ ទង្វើអស់ទាំងនេះ បានជំរុញឲ្យក្រុមមនុស្សស្រឡាញ់ភេទដូចគ្នាជាច្រើន រត់ចេញពីផ្ទះ ឬធ្វើឲ្យពួកគេធ្លាក់ទឹកចិត្ត រហូតដល់គិតធ្វើអត្តឃាតខ្លះក៏មាន។
លោកស្រី Wan Hea Lee តំណាងការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា មានប្រសាសន៍ថា នៅមានបញ្ហាជាច្រើនណាស់ដែលត្រូវដោះស្រាយ ពាក់ព័ន្ធនឹងក្រុមមនុស្សស្រឡាញ់ភេទដូចគ្នានេះ។ ជាមួយគ្នានេះ លោកស្រីបានសម្ដែងក្ដីសង្ឃឹមថា របាយការណ៍ស្ដីពីក្រុមមនុស្សស្រឡាញ់ភេទដូចគ្នានៅកម្ពុជា នឹងត្រូវបានប្រើប្រាស់ ដើម្បីព្យាបាលបញ្ហា មិនមែនព្យាបាលមនុស្សទេ។
របាយការណ៍ស្ដីពីក្រុមមនុស្សស្រឡាញ់ភេទដូចគ្នា ដែលមានចំណងជើងថា «ត្រូវព្យាបាលបញ្ហា មិនមែនព្យាបាលមនុស្ស» ផ្ដោតទៅលើទិដ្ឋភាពទូទៅ នៃការប្រឈមរបស់ក្រុមមនុស្សស្រឡាញ់ភេទដូចគ្នា និងអង្គការសង្គមស៊ីវិលនៅកម្ពុជា។ អង្គការសហប្រជាជាតិសង្ឃឹមថា ការរកឃើញ និងអនុសាសន៍ទាំងឡាយនៅក្នុងរបាយការណ៍នេះ នឹងត្រូវបានប្រើប្រាស់ដោយអង្គការ សហគមន៍ និងដៃគូអភិវឌ្ឍនានា ដើម្បីជួយឲ្យប្រសើរឡើងនូវការផ្ដល់ព័ត៌មាន ដល់អ្នកស្រឡាញ់ភេទដូចគ្នា និងកម្មវិធីសិទ្ធិមនុស្សនៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ