ជម្លោះCPP និងCNRP រាលដាលដល់ថ្នាក់រាជធានី
ក្រុមប្រឹក្សារាជធានីភ្នំពេញរបស់គណបក្សសង្គ្រោះជាតិចំនួន៦នាក់នៅថ្ងៃព្រហស្បតិ៍នេះ បានរៀបចំសន្និសីទសារព័ត៌មាននៅទីស្នាក់ការគណបក្សក្នុងសង្កាត់ចាក់អង្រែលើដើម្បីស្នើឱ្យសាលារាជធានីដាក់បញ្ចូលបេក្ខភាពគណបក្សប្រឆាំងចូលទៅគណៈកម្មការលទ្ធកម្ម។ សន្និសីទនេះធ្វើឡើង បន្ទាប់ពីពួកគេបានដើរចេញពីកិច្ចប្រជុំវិសាមញ្ញរបស់សាលារាជធានី។
ចុះផ្សាយនៅថ្ងៃ៖
ស្តាប់ - ០១:៥៤
ជម្លោះគណបក្សប្រជាជនកម្ពុជា និងគណបក្សសង្គ្រោះជាតិ បានឈានដល់ជម្លោះថ្នាក់រាជធានីភ្នំពេញបន្ទាប់ពីក្រុមប្រឹក្សារាជធានីគណបក្សប្រឆាំងចំនួន៦រូប បានដើរចេញពីកិច្ចប្រជុំ ហើយរៀបចំសន្និសីទសារព័ត៌មាន។ ជាសន្និសីទសារព័ត៌មានដើម្បីស្នើឱ្យក្រុមរាជធានីភ្នំពេញ ដាក់បញ្ចូលបេក្ខភាពពីគណបក្សសង្គ្រោះជាតិចូលទៅក្នុងគណៈកម្មការលទ្ធកម្មរបស់រាជធានី។ នេះបើតាមការបញ្ជាក់ពីលោក កឹម សុភា សមាជិកក្រុមប្រឹក្សារាជធានីភ្នំពេញពីគណបក្សសង្គ្រោះជាតិ។
លោកបានអះអាងថា តាមការសម្រេចប្រជុំផ្ទៃក្នុងរបស់សាលារាជធានី គឺត្រូវឱ្យមានសមាសភាព៣រូបក្នុងមួយគណៈកម្មការ ដែលបក្សកាន់អំណាចមានពីររូប គណបក្សប្រឆាំងមួយរូប។
លោកសង្កត់ធ្ងន់ថា ក្នុងការប្រជុំសម្រេចបង្កើតគណៈកម្មការនេះ សមាជិកគណបក្សប្រជាជន មិនព្រមឯកភាព។ លោកបានចោទក្រុមប្រឹក្សាគណបក្សប្រជាជនកម្ពុជារាជធានីថា ព្រួយបារម្ភពីការប៉ះពាល់ផលប្រយោជន៍របស់គណបក្សប្រជាជនកម្ពុជាប្រចាំរាជធានីភ្នំពេញ។ លោក បានបន្តថា គណៈកម្មការលទ្ធកម្មគឺជាគណៈកម្មការដែលត្រួតពិនិត្យនិងយល់លំអិតផ្ទាល់តែម្តងលើរាល់គម្រោងវិនិយោគដែលធ្វើឡើងក្នុងដែនរាជធានីភ្នំពេញ។ សមាជិកក្រុមប្រឹក្សាភិបាលនៃគណបក្សសង្គ្រោះជាតិរូបនេះ អះអាងថា រាល់គណៈកម្មការដែលនឹងសមាសភាពទាំងពីរគណបក្សគឺនឹងអាចត្រួតពិនិត្យឱ្យមានតម្លាភាព និងប្រសិទ្ធភាពលើគម្រោងអភិវឌ្ឍន៍នានាដែលសាលារាជធានីភ្នំពេញបានទំលាក់ឱ្យវិស័យឯកជន។
ដោយឡែកអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានឆ្លើយតបថា ការបែងចែកគណៈកម្មការនោះដែលយោងតាមសេចក្តីប្រកាសរបស់អន្តរក្រសួងនោះ គឺមិនបានបែងចែកពីកូតាគណបក្សនយោបាយដែលត្រូវដាក់បញ្ចូលនោះទេ។ ពោលគឺយ៉ាងតិច៣រូបសម្រាប់គណៈកម្មការមួយ។ ដូចនេះមិនមែនមានន័យថាត្រូវដាក់គណបក្សប្រជាជន២រូប និងគណបក្សសង្គ្រោះជាតិ១រូបនោះទេ។
សូមបញ្ជាក់ជូនថា ជម្លោះក្នុងការដឹកនាំរវាងគណបក្សសង្គ្រោះជាតិ និងគណបក្សប្រជាជនកម្ពុជានៅថ្នាក់រាជធានីនេះគឺកើតឡើងតែប៉ុន្មានថ្ងៃតែប៉ុណ្ណោះ បន្ទាប់ពីលោកនាយករដ្ឋមន្ត្រីហ៊ុន សែន និងលោក កឹម សុខា បានបើកការវាយប្រហារពាក្យសំដីគំរាមគ្នាទៅវិញទៅមក លើរឿងបោះឆ្នោតទម្លាក់រដ្ឋមន្ត្រីនៃគណបក្សកាន់អំណាច និងការបោះឆ្នោតទម្លាក់ដំណែងអនុប្រធានរដ្ឋសភាពីគណបក្សសង្គ្រោះជាតិវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ