សភាដាក់សេចក្តីព្រាងច្បាប់ចរាចរណ៍ថ្មីឱ្យពិភាក្សា
សេចក្តីព្រាងច្បាប់ស្តីពីចរាចរណ៍ផ្លូវគោកថ្មីត្រូវបានរដ្ឋសភាជាតិ ដាក់ឱ្យមានការពិភាក្សាក្នុងសិក្ខាសាលាពិគ្រោះយោបល់មួយដែលមានភាគីពាក់ព័ន្ធទាំងរដ្ឋាភិបាល គណៈកម្មការជំនាញរបស់សភា និងសង្គមស៊ីវិល។ សិក្ខាសាលាពិភាក្សាពេញមួយថ្ងៃនេះ បានធ្វើឡើងនៅរដ្ឋសភាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
គណៈកម្មការជំនាញចរាចរណ៍របស់រដ្ឋសភាជាតិ និងសង្គមស៊ីវិលដែលមានគ្នាប្រមាណ៥០០នាក់ នៅថ្ងៃអង្គារនេះ បានជួបគ្នាពិគ្រោះអំពីសេចក្តីព្រាងច្បាប់ចរាចរណ៍ផ្លូវគោកថ្មី។ ជាការពិភាក្សាមុនពេលសេចក្តីព្រៀងច្បាប់នេះ ដាក់ជូនសភាពេញអង្គអនុម័តនៅចុងខែតុលា ឬដើមខែវិច្ឆិកាខាងមុខនេះ។ ប្រធានគណៈកម្មការទី៩នៃរដ្ឋសភា លោកស្រីនិនសាផុន បានលើកឡើងថាសិក្ខាសាលានេះ នឹងអាចជួយផ្តល់យោបល់ឱ្យច្បាប់ចរាចរណ៍កម្ពុជាមានលក្ខណៈសមស្របទៅនឹងបរិបទបច្ចុប្បន្នភាពរបស់សង្គមកម្ពុជា និងបរិបទតំបន់ រួមទាំងសកលលោកផងដែរ។
រដ្ឋមន្ត្រីក្រសួងសាធារណៈការ និងដឹកជញ្ជូន លោកត្រាំអ៊ីវតឹក បានលើកឡើងថាច្បាប់ស្តីពីចរាចរណ៍ផ្លូវគោកថ្មីនេះ នឹងអាចឆ្លើយតបទៅនឹងស្ថានភាពគ្រោះថ្នាកចរាចរណ៍កម្ពុជា។ ចរាចរណ៍ដែលបានសម្លាប់ពលរដ្ឋកម្ពុជាប្រមាណជាង ៥នាក់ និងរបួសជិត១៦នាក់ក្នុងរយៈពេលមួយថ្ងៃ។ សម្រាប់ឆ្នាំ២០១៣ គ្រោះថ្នាក់ចរាចរណ៍បានសម្លាប់មនុស្សជិត២ពាន់ និងរបួសធ្ងន់ចំនួនជាង៥ពាន់ ៦នាក់។
លោករដ្ឋមន្ត្រីបានបន្តថា ច្បាប់ចរាចរណ៍ថ្មីនេះ ក៏នឹងអាចចូលរួមអនុវត្តសេចក្តីសម្រេចរបស់អង្គការសហប្រជាជាតិ ស្តីពីទសវត្សរ៍សុវត្ថិភាពចរាចរណ៍ផ្លូវគោកផងដែរ។
សេចក្តីព្រាងចរាចរណ៍ផ្លូវគោកថ្មីនេះ នឹងមានចំនួន១២ជំពូក និង៩២មាត្រា ដោយបានលុបច្បាប់ចាស់ចោលចំនួន១៨មាត្រា និងកែសម្រួល៦៤មាត្រា។ ហើយច្បាប់នេះ សភាគ្រោងនឹងអនុម័តនាពេលខាងមុនេះដែលមានចំនុចសំខាន់ចំនួន១១ ក្នុងនោះរួមមាន ការពង្រឹងការគ្រប់គ្រង ត្រូតពិនិត្យសុវត្ថិភាពចរាចរណ៍ ការបន្ថែមទំងន់ទោសលើបទល្មើសចរាចរណ៍ និងកាអនុញ្ញាតិឱ្យផ្ទុកមនុស្សធំ២នាក់ និងកុមារម្នាក់ក្នុងទោចក្រយាន្តយន្តមួយជាដើម។
ទន្ទឹមនឹងការដាក់ឱ្យពិភាក្សារបស់រដ្ឋសភា មុនការអនុម័តនោះ អង្គការមូលនិធីបង្ការបួសអាស៊ីប្រចាំនៅកម្ពុជារបស់លោក កឹម បញ្ញា បានស្នើឱ្យរដ្ឋសភាពន្លឿននៃការអនុម័តច្បាប់ថ្មីនេះឱ្យបានឆាប់បំផុតតាមតែអាចធ្វើទៅបាន និងការពង្រឹងការអនុវត្តច្បាប់ដោយស្មើភាពនិងមិនត្រូវលើកលែងដល់ជនណាម្នាក់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ