ហេតុអ្វីបានជាទីផ្សារមូលបត្ររអិលដាំដូងជាថ្មី ?
អាកាសធាតុត្រជាក់មានខ្យល់ខ្លាំង បោកដល់ទីផ្សាមូលបត្រឱ្យឬយ៉ាងណា ? តាំងពីថ្ងៃម្សិលមិញមក ទីផ្សារមូលបត្រនៅស្ទើរគ្រប់ទីកន្លែង នៅលើពិភពលោក បានធ្លាក់ថ្លៃយ៉ាងខ្លាំង។ បន្ទាប់ពីបានគេងសម្រាកអស់មួយយប់ នៅពេលបើកទ្វារភ្លាមកាលពីព្រឹក ទីផ្សារភាគហ៊ុនហាក់បានស្គាល់ភាពស្ងប់ស្ងាត់បន្តិច ប៉ុន្តែមិនបានប៉ុន្មានផង ក៏នាំគ្នាដាំក្បាលធ្លាក់ទៀតជាថ្មីទៀត។ ហេតុអ្វីបានទីផ្សារមូលបត្រដាំដូងជាថ្មីបែបនេះ ? ពិភពលោក មិនទុកចិត្តគ្នារឿងអ្វី ? កំណើនសេដ្ឋកិច្ចពិភពលោកពិតជាកំពុងបោះជំហានដើរថយក្រោយហើយឬ ?
ចុះផ្សាយនៅថ្ងៃ៖
ស្តាប់ - ០៥:២២
ទីផ្សារភាគហ៊ុនបារាំង អាល្លឺម៉ង់ បានបន្តធ្លាក់ចុះជាថ្មីទៀត នៅថ្ងៃអង្គារនេះ។ និយាយជារួមទីផ្សារមូលបត្រ នៅមិនទាន់មានស្ថិរភាពនៅឡើយទេ។ គ្រប់អ្នកវិភាគ សញ្ញាវិជ្ជមានក៏មានទាន់ឃើញមានដែរ។ ភាពជ្រួលច្របល់ ទំនងជាមិនចប់ភ្លាមឡើយ។ ម្សិលមិញ ទាំងបារាំង(៣,២០%) អាល្លឺម៉ង់ (៣,៣%) អង់គ្លេស (២,៧១%) ន័រវែស អេស្ប៉ាញ អ៊ីតាលី (៤,៩%) ក្រិក (៨%) អូស្ត្រាលី ធ្លាយដល់អាមេរិកទៀត (១,១០%) សុទ្ធតែដាំក្បាលខាតបង់យ៉ាងខ្លាំង ខ្លះ ជាង៣ ខ្លះជាង៤%។
ការធ្លាក់ចុះនេះ បានឆ្លងរាលដាលដល់អាស៊ី ! នៅថ្ងៃនេះជាលើកទីមួយ គិតចាប់ពីឆ្នាំ២០១៤មក ដែលទីផ្សារភាគហ៊ុនតូក្យូបានស្គាល់ការធ្លាក់ផុងបាត់តម្លៃអស់៥,៤០%។ ក្នុងបរិបទបែបនេះ រូបិយបណ្ណជប៉ុនក៏បានហោះឡើង ធ្វើឱ្យតម្លៃប្រាក់ដុល្លារធ្លាក់មកនៅក្រោម១១៥យេន ជាលើកទីមួយ។ មិនតែប៉ុណ្ណោះ អត្រាមូលបត្របំណុលរដ្ឋជប៉ុន រយៈពេលវែង ១០ឆ្នាំ បានធ្លាក់មកក្រោមសូន្យទៅទៀត ! ពោលគឺមិនដែលធ្លាប់មានឃើញសោះក្នុងប្រទេសជាមហាអំណាចឧស្សាហកម្មG៧ ទាំង៧ដំបូងនៅលើពិភពលោក។ មាស វត្ថុដែលមានសុវត្ថិភាពជាងគេបំផុត ក្នុងគ្រប់កាលៈទេសៈនោះ បានឡើងថ្លៃ១,៣%។
ទីផ្សារភាគហ៊ុនអូស្រ្តាលី ក៏បានធ្លាក់ថ្លៃអស់២,៧%ដែរ។ តែសំណាងល្អ គេមិនបានឃើញនិងដឹងអំពីស្ថានភាពភាគហ៊ុនរបស់ហុងកុង សៀងហៃ សេអ៊ូល ឬសិង្ហបុរី ដែលបិទទ្វារនាឱកាសបុណ្យចូលឆ្នាំជាប្រពៃណី។
ទីផ្សារមូលបត្រជ្រួលច្របល់ខ្លាំងតាំងពីដើមឆ្នាំ
ទីផ្សារមូលបត្រពិភពលោក បានសម្ពោធឆ្នាំថ្មី ជាមួយនឹងភាពច្របូកច្របល់នេះ ក៏ព្រោះតែមានមូលហេតុច្រើនមួយហើយមួយទៀត បូកបញ្ចូលច្រើនមុខទៅធ្វើឱ្យឡើងធំ។ ទីបំផុតឆ្នាំថ្មីនេះ បានជាប់ឈ្មោះជាការចាប់ផ្តើមដ៏អាក្រក់ជាងគេបំផុតមិនធ្លាប់មាន។
តាំងពីផ្តើមឆ្នាំថ្មីមក ដំណឹងល្អមានតិចតួចណាស់ ! នៅអឺរ៉ុប ហានិភ័យនៃធនាគារក្នុងតំបន់អឺរ៉ូ គ្រាន់តែជាមូលហេតុតូចមួយទៀត ដែលគេយកមកដាក់បន្ថែមពីបញ្ជីបន្ទុកដ៏វែងស្រាប់តែប៉ុណ្ណោះ។ អ្នកវិនិយោគ គ្មានទំនុកចិត្ត និង ការព្រួយបារម្ភ ស្រាប់ទៅហើយ អំពីកំណើនសេដ្ឋកិច្ចតិចតួចរបស់ចិន របស់ពិភពលោក របស់ក្រុមប្រទេសមានសេដ្ឋកិច្ចលូតលាស់ ឥលូវត្រូវប្រឈមនឹងភាពតានតឹង នយោបាយភូមិសាស្ត្រ រវាងអ៊ីរ៉ង់ និងអារ៉ាប៊ីសាអូឌីត កូរ៉េខាងជើងនិងប្រទេសជិតខាង ការស្ទុះឡើងនៃចរន្តជាតិនិយមនៅ អឺរ៉ុប ការគំរាមកំហែងដើរចេញពីអឺរ៉ុបរបស់អង់គ្លេស បូកផ្សំនឹងតម្លៃប្រេងឆៅឡើងថ្លែមិនរួច (ត្រឹមម្តុំ៣០ដុល្លារមួយធុងបារីល) គឺពិតជាល្បាយផ្សំយ៉ាងគ្រប់គ្រាន់នាំដល់ការផ្ទុះក្តីព្រួយបារម្ភ រង្គើដល់ទីផ្សារភាគហ៊ុន ជាថ្មីទៀតនៅពេលនេះ។
មិនតែប៉ុណ្ណោះ នៅមានបុព្វហេតុដ៏ចំបងមួយទៀត ដែល នាំឱ្យទីផ្សារ ព្រួយបារម្ភខ្លាំង។ គឺក្រុមអ្នកវិនិយោគ កំពុងរេភ្នែកក្រឡាប់ចាក់ ផ្តោតខ្លាំងទៅលើកំណើនសេដ្ឋកិច្ចសហរដ្ឋអាមេរិក ដែលគេសង្ស័យថាដល់គន្លាក់បន្ថយល្បឿន និងអាចដើរថយក្រោយផង។
អាមេរិកអាចមានកំណើនសេដ្ឋកិច្ចដើរថយក្រោយ ?
អ្នកវិនិយោគស្ថិតក្នុងស្ថានភាពប្រុងប្រយ័ត្នខ្លាំង និងកំពុងតាមដាន និងរង់ចាំមើលសកម្មភាពរបស់ធនាគារកណ្តាលអាមេរិក ដែលនឹងត្រូវសម្រេចចិត្ត ដំឡើងអត្រាការប្រាក់ឬអត់ នៅក្នុងកិច្ចពិភាក្សានៅមុខសភា ថ្ងៃពុធនិងព្រហស្បតិ៍ស្អែក។
ធនាគារកណ្តាល ដែលទំនងជាពិបាកអារកាត់សេចក្តីផង ព្រោះកាលពីថ្ងៃសុក្រ អាជ្ញាធរអាមេរិកបានប្រកាសផ្សព្វផ្សាយតួលេខទីផ្សារការងារគួរឱ្យខកចិត្ត និងដែលបានបង្កឱ្យភាពស្រពិចស្រពិលកាន់តែខ្លាំង ភ័យខ្លាចអាមេរិកមានគ្រោះជួបកំណើនសេដ្ឋកិច្ចដើរថយក្រោយ។
មានសម្មតិកម្មច្រើនដែលបង្ហាញថា សន្ទុះកំណើនសេដ្ឋកិច្ចជាប់រហូតរយៈពេល៦ឆ្នាំរបស់អាមេរិកនេះ បានមកដល់វគ្គបញ្ចប់ ! ដែលមិនយូរមិនឆាប់ អាមេរិកនឹងត្រូវជួបវិបត្តិសេដ្ឋកិច្ចអវិជ្ជមាន។ ការអះអាងនេះត្រូវបានពន្យល់ថា ដំបូងឡើយ បើទោះបីរដ្ឋាភិបាលខំប្រឹងទប់ស្កាត់ផ្តល់សន្ទុះ ដោយដំឡើងប្រាក់ខែ ធ្វើឱ្យសេដ្ឋកិច្ចបន្តមានកំណើន តែក្នុងល្បឿនយឺតជាងមុន ហើយបន្ទាប់មកហានិភ័យនឹងកើនខ្ពស់ ដោយការបន្ថយល្បឿនសេដ្ឋកិច្ចយូរៗទៅនឹងធ្វើអាមេរិកមានសេដ្ឋកិច្ចដើរថយក្រោយ។
ដូច្នេះក្នុងពេលរង់ចាំ ទីផ្សារភាគហ៊ុនត្រូវតែដាំក្បាលចុះ។ ម្យ៉ាងទៀតដូចយើងដឹងស្រាប់គ្រប់គ្នា ពិភពលោកកំពុងព្រួយបារម្ភស្រាប់ទៅហើយ អំពីដំណើរបន្ថយល្បឿននៃសេដ្ឋកិច្ចចិន មហាអំណាចទីពីរ និងជាក្បាលម៉ាស៊ីនអូសទាញសេដ្ឋកិច្ចពិភពលោក។ ហើយបើមហាអំណាចទីមួយ ដើរបន្ថយល្បឿនទៀត តើការរើបឡើងវិញនៃសេដ្ឋកិច្ចពិភពលោកនឹងក្លាយទៅជាយ៉ាងណា ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ