ការបាត់ខ្លួនដ៏ចម្លែកនៃសិល្បករនិងអ្នកប្រឆាំងរឹងរូសនឹងរដ្ឋអំណាចចិន Ai Weiwei
ឯកអគ្គរដ្ឋទូតនៃសហភាពអឺរ៉ូបប្រចាំនៅប្រទេសចិនបានសំដែងនៅ ថ្ងៃអង្គារ៥មេសានេះនូវក្តីព្រួយបារម្ភរបស់ខ្លួនអំពីជោគវាសនានៃសិល្បករAi Weiweiជាអ្នកទិតៀនរិះគន់រដ្ឋាភិបាលចិនដោយមិនចេះនឿយហត់បាត់ខ្លួននៅអាកាសយានដ្ឋានប៉េកាំង នៅព្រឹកថ្ងៃអាទិត្យ៣មេសា ដោយរបៀបនេះ គាត់រួមចំណែកជាមួយប្រទេសធំៗនិងសមាគមជាច្រើន ដើម្បីការពារសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ឯកអគ្គរដ្ឋទូតនៃសហភាពអឺរ៉ូបប្រចាំនៅប្រទេសចិនអំពាវនាវសូមឱ្យអាជ្ញាធរចិនកុំចាប់ឃុំឃាំងគេដោយរំលោភបំពានតាមតែទំនើងចិត្ត ទោះជាក្នុងកាលៈទេសៈណាក៏ដោយ។ក្នុងរយៈពេល២៤ម៉ោងចុងក្រោយនេះ ស.រ.អា. អង់គ្លេស បារាំងនិងអាល្លឺម៉ង់បានថ្លែងខ្វល់ខ្វាយខ្លាំងណាស់នឹងជោគវាសនារបស់ សិល្បករAi Weiweiដែលនាពេលថ្មីៗបានចាត់ទុករបបចិនថាជារបបព្រៃផ្សៃ “អមនុស្សធម៌”។ អង្គការការពារសិទ្ធិមនុស្សអន្តរជាតិAmnesty International និងអង្គការការពារសិទ្ធិមនុស្សដទៃទៀតបានអំពាវនាវសូមឲ្យអាជ្ញាធរចិនដោះលែងគាត់ទៅ។
លោក Ai Weiweiអាយុ៥៣ឆ្នាំដែលស្នាដៃកំពុងត្រូវដាក់តាំងបង្ហាញនៅសារមន្ទីរTate Modern នៅទីក្រុងឡុងដ្រឹ៍័ត្រូវបានចាប់ខ្លួននៅថ្ងៃអាទិត្យទី៣មេសានៅអាកាសយានដ្ឋានអន្តរជាតិប៉េកាំងនៅខណៈដែលគាត់បម្រុងនឹងឡើងជិះយន្តហោះសំដៅទៅកាន់ទីក្រុងហុងកុង។
ស្របតាមសំដីភរិយាគាត់និយាយតាមទូរស័ព្ទ “ប៉ូលិសប្រកបដោយដីកាឆែកឆេរបានមកកកូរកកាយរុករកគ្រប់ទីកន្លែងនៅក្នុងផ្ទះ។ ប៉ូលិសបាននាំយកទៅនូវ Computer និងគ្រឿងបរិក្ខារដទៃទៀតដោយពុំព្រមផ្តល់ហេតុផលនៃដីកាឆែកឆេរឬចាប់ខ្លួនលោកAi Weiweiឡើយ”។
ប៉ូលិសប៉េកាំងនិងក្រសួងការបរទេសចិនពុំព្រមធ្វើអត្ថាធិប្បាយអំពីការបាត់ខ្លួនលោក Ai Weiweiឡើយ។
ការចាប់ខ្លួនសិល្បករឈានមុខនេះកើតមានប៉ុន្មានថ្ងៃបន្ទាប់ពីគាត់បានប្រកាសប្រាប់ទីភ្នាក់ងារពត៌មានបារាំងAFP អំពីចេតនាខ្លួនចង់បើកStudio មួយនៅប្រទេសអាល្លឺម៉ង់ដើម្បីដាក់តាំងបង្ហាញស្នាដៃរបស់ខ្លួនដោយនិយាយថា ខ្លួនគាត់ក្តៅក្រហាយខ្លាំងណាស់នឹងឧបសគ្គផ្សេងៗបង្កបង្កើតឡើងដោយអាជ្ញាធរដើម្បីរារាំងខ្លួនគាត់នៅប្រទេសចិន។
ក្នុងប៉ុន្មានសប្តាហ៍ចុងក្រោយនេះ អ្នកប្រឆាំងរឹងរូសនឹងរដ្ឋអំណាចចិនរាប់សិបនាក់ត្រូវបានចាប់បង្ខាំងនៅក្នុងផ្ទះក្រោមការត្រួតពិនិត្យឃ្លាំមើលឬក៏ត្រូវបាននាំទៅឆ្ងាយពីផ្ទះខ្លួន ពីព្រោះរដ្ឋការប៉េកាំងខ្លាចបារម្ភការឆ្លងរីករាលដាលនៃការបះបោរសព្វថ្ងៃនៅពិភពអារ៉ាប់មកកាន់ប្រទេសចិនស្របតាមយោបល់បណ្តាអង្គការការពារសិទ្ធិមនុស្ស។
ជាកូនប្រុសរបស់កវីចិនដ៏ឆ្នើមបំផុតមួយដែលក៏ជាអតីតរដ្ឋមន្ត្រីក្រសួងវប្បធម៌ជាប់ពន្ធនាគាររួចហើយត្រូវបានវិលត្រឡប់មកបំពេញការងារវិញ លោក Ai Weiweiនៅខណៈនេះពុំដែលបានទទួលទោសពៃរ៍អ្វីទេ ទោះបីជាអាជ្ញាធរចិនបានតាមរំខានបៀតបៀនធ្វើឲ្យគាត់តប់ប្រមល់ក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ