ជម្ងឺរលាកខួរក្បាលកំពុងសម្លាប់កុមារឥណ្ឌា
ក្រៅពីជំងឺគ្រុនឈាម គ្រុនចាញ់ មានជំងឺមួយទៀតហើយដែលបង្កឡើងដោយសត្វមូស។ នៅភាគខាងជើងឥណ្ឌា សត្វមូសដែលចម្លងមេរោគពីសត្វជ្រូកមកមនុស្ស កំពុងនាំរោគរលាកខួរក្បាលយ៉ាងធ្ងន់ធ្ងរ រហូតសម្លាប់មនុស្ស ជាពិសេសកុមារឥណ្ឌាយ៉ាងតិច ២១៥នាក់ ចាប់តាំងពីដើមរដូវវស្សាឆ្នាំនេះ។ ក្រុមគ្រូពេទ្យឥណ្ឌាកំពុងប្រញឹកដៃជើងដើម្បីជួយសង្រ្គោះកុមារជាងមួយ ពាន់នាក់ទៀត ដែលកំពុងស្ថិតនៅក្នុងស្ថានភាពគ្រោះថ្នាក់ជានិច្ច។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
អ្នកជំងឺជាងមួយពាន់នាក់នោះ ភាគច្រើនជាកុមារ និងកំពុងស្ថិតនៅក្នុងស្ថានភាពសង្រ្គោះបន្ទាន់។ សម្រាប់អ្នកជំងឺ ក្តីសង្ឃឹមរស់មានតិច ក្នុងពេលក្រុមគ្រូពេទ្យទទួលស្គាល់ថា ពួកគេមិនមានមធ្យោបាយ និងសមត្ថភាពគ្រប់គ្រាន់ ដើម្បីព្យាបាលជំងឺរលាកខួរក្បាលដែលស្ថិតនៅក្នុងដំណាក់ចុងក្រោយទៅហើយនោះទេ។ ក្រុមគ្រូពេទ្យបានវាយតម្លៃទុកមុនថា ចំនួនមនុស្សស្លាប់ដោយរោគរលាកខួរក្បាលនេះនឹងអាចកើនឡើងរហូតដល់៣៥០០នាក់។ ករណីស្លាប់ច្រើនបែបនេះដោយមូលហេតុថា ស្ថានភាពជំងឺអាចធ្លាក់ដុនដាប នៅពេលដែលមេរោគរីករាលដាល ទៅរលាកខួរក្បាល តែក្នុងរយៈពេលពីរថ្ងៃប៉ុណ្ណោះ។
ដោយពិតទៅជំងឺរលាកខួរក្បាលនេះតែងតែរាតត្បាត នៅក្នុងប្រទេសឥណ្ឌា ជាពិសេសនៅក្នុងរដូវភ្លៀងធ្លាក់។ ក្នុងរដូវនេះ សត្វមូសអាចចម្លងមេរោគពីសត្វជ្រូកមកមនុស្សនូវមេរោគរលាកខួរក្បាលជប៉ុន។ គេហៅថា មេរោគរលាកខួរក្បាលជប៉ុន ដោយសារតែមេរោគនេះបានកើតមាន និងរកឃើញដំបូងគេ ក្នុងប្រទេសជប៉ុន នាដើមសតវត្សរ៍ទី ២០។ ជាទូទៅគេអាចរកឃើញរោគសញ្ញានៃជំងឺរលាកខួរក្បាលបង្កដោយសត្វមូស តាមរយៈអាការរោគ ឈឺក្បាល គ្រុនក្តៅខ្លាំង និងការក្អួតចង្អោរ។
ក្នុងប្រទេសឥណ្ឌា រដ្ឋអុតារ ប្រាដេស្ហ( Uttar Pradesh) ដែលស្ថិតនៅភាគខាងជើងប្រទេស កើតមានផ្ទុះរោគរលាកខួរក្បាលច្រើន។ គួរបញ្ជាក់ថា រដ្ឋ អុតារ ប្រាដេស្ហ (Uttar Pradesh)ដែលប្រជាជនរស់នៅរហូតដល់ ១៤លាននាក់ មានប្រជាជនច្រើនរស់នៅក្នុងភាពក្រីក្រ និងខ្វះខាតអនាម័យ ជាពិសេស នៅពេលដែលមានទឹកជំនន់ជន់លិចភូមិរបស់ពួកគេ នៅក្នុងរដូវភ្លៀងបច្ចុប្បន្ននេះ។ ម្យ៉ាងទៀត គេរកឃើញថា មេរោគរលាកខួរក្បាលភាគច្រើនវាយលុកទៅលើកុមារដែលខ្វះអាហារូបត្ថម្ភ។
គេនៅមិនទាន់រកឃើញវិធីសាស្រ្តផ្នែកវេជ្ជសាស្រ្តដើម្បីព្យាបាលជំងឺរលាកខួរក្បាលបាននៅឡើយទេ។ ប៉ុន្តែ មានវ៉ាក់សាំង៣ប្រភេទសម្រាប់ការពារជំងឺដ៏កាចសាហាវមួយនេះ។ រដ្ឋបាលឥណ្ឌាបង្ហាញថា យុទ្ធនាការចាក់ថ្នាំបង្ការបានរៀបចំឡើងជារៀងរាល់ឆ្នាំ ប៉ុន្តែ យ៉ាងណាក៏ដោយ ប្រជាជនឥណ្ឌាដែលរស់នៅក្នុងរដ្ឋ អុតារ ប្រាដេស្ហនិយាយថា ពួកគេមិនដែលបានឃើញយុទ្ធនាការចាក់ថ្នាំការពារ មេរោគរលាកខួរក្បាល នៅក្នុងភូមិឃុំរបស់ពួកគេទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ