ទីក្រុងប៉េកាំងប្រាប់សហរដ្ឋអាមេរិកកុំលក់អាវុធឲ្យតៃវ៉ាន់
ប្រទេសចិនបានអំពាវនាវនៅថ្ងៃសុក្រនេះកុំឲ្យទីក្រុងវ៉ាស៊ីនតោន ផ្តល់អាជ្ញាប័ណ្ណឲ្យទៅក្រុមហ៊ុនអាមេរិកាំងសម្រាប់នាំចេញទៅលក់ឲ្យ តៃវ៉ាន់នូវប្រព័ន្ធradarសម្រាប់យន្តហោះប្រដេញ។ទាំងនេះបន្ទាប់ពីមានរបាយការណ៍របស់មន្ទីរប៉ង់តាហ្គោនជំរុញឲ្យមាន ការប្រុងប្រយ័ត្ននឹងកងកម្លាំងយោធាចិនដែលមានអានុភាពកាន់តែ ខ្លាំងក្លាឡើងៗ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
អ្នកនាំពាក្យនៃក្រសួងការបរទេសចិនបានថ្លែងឲ្យដឹងនៅថ្ងៃសុក្រនេះថា៖”ប្រទេសចិនប្រឆាំងយ៉ាងដាច់ខាតទៅនឹងការលក់សព្វាវុធនិងការផ្តល់ជំនួយបច្ចេកទេសពីសំណាក់សហរដ្ឋអាមេរិកឲ្យទៅតៃវ៉ាន់។ ហើយប្រទេសចិនអំពាវនាវឲ្យទីក្រុងវ៉ាស៊ីនតោនធ្វើការប្តូរប្រែសេចក្តីសម្រេចចិត្តដោយភ័ន្តច្រឡំរបស់ខ្លួនក្នុងការលក់សព្វាវុធនិងបិទបញ្ចប់ទំនាក់ទំនងយោធាជាមួយតៃវ៉ាន់ ដើម្បីចៀសវាងកុំឲ្យប៉ះពាល់ដល់ទំនាក់ទំនងរវាងប្រទេសចិននិងសហរដ្ឋអាមេរិក។
ប្រទេសចិនចាត់ទុកកោះតៃវ៉ាន់ថាជាខេត្តមួយរបស់ខ្លួន ហើយទីក្រុងប៉េកាំងពុំបដិសេធចោលឡើយការប្រើកម្លាំងយោធាដើម្បីយកកោះតៃវ៉ាន់មកដាក់ឲ្យឋិតនៅក្រោមការត្រួរត្រារបស់ខ្លួន។
គួរកត់សម្គាល់ថា នៅដើមឆ្នាំនេះទីក្រុងប៉េកាំងបានផ្តាច់ទំនាក់ទំនងផ្លូវយោធាជាមួយទីក្រុងវ៉ាស៊ីនតោននៅខណៈដែលសហរដ្ឋអាមេរិកបានប្រកាសឲ្យដឹងនៅខែមករាកន្លងទៅថា អាមេរិកមានកិច្ចព្រមព្រៀងមួយគ្រោងលក់កាំជ្រួចមីស្ស៊ីល ឧត្ធម្ភាគចក្រ និងគ្រឿងឧបករណ៍សម្រាប់យន្តហោះប្រដេញF16ឲ្យទៅតៃវ៉ាន់។
សូមគូសបញ្ជាក់ថា កាលពីសប្តាហ៍មុនលោកប្រធានាធិបតីតៃវ៉ាន់ Ma Ying-jeouបានអំពាវនាវជាថ្មីម្តងទៀត ឲ្យទីក្រុងវ៉ាស៊ីនតោនយល់ព្រមលក់ឲ្យតៃវ៉ាន់នូវយន្តហោះប្រដេញF16 ធុនថ្មី។ ទាំងនេះបន្ទាប់ពីមានរបាយការណ៍របស់មន្ទីរប៉ង់តាហ្គោនជំរុញឲ្យមានការប្រុងប្រយ័ត្ននឹងកងកម្លាំងយោធាចិនដែលមានអានុភាពកាន់តែខ្លាំងក្លាឡើងៗ។
ចំណែកឯទីក្រុងប៉េកាំងវិញបានវិនិច្ឆ័យថា “ការផ្សព្វផ្សាយនៃរបាយការណ៍របស់មន្ទីរប៉ង់តាហ្គោនពុំធ្វើឲ្យទំនាក់ទំនងផ្លូវយោធារវាងប្រទេសចិននិងសហរដ្ឋអាមេរិកវិវឌ្ឍបានល្អឡើយ។ ហើយកងកម្លាំងយោធាចិនក៏ពុំមែនជាការគំរាមអ្វីដែរដល់ប្រទេសឯទៀតៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ