ប៉េកំាង និងតៃប៉ិចុះហត្ថលេខាលើកិច្ចព្រមព្រៀងពាណិជ្ជកម្ម ជាប្រវត្តិសាស្រ្ត
ថ្ងៃអង្គារ ទី២៩ មិថុនា ឆ្នំា ២០១០ នេះ ចិនដីគោក និងចិនតៃវ៉ាន់បានចុះហត្ថលេខាលើកិច្ចព្រមព្រៀងពាណិជ្ជកម្មជា ប្រវត្តិសាស្រ្តរវាងគ្នា។ តំាងពីចិនទំាងពីរបានខ័ណ្ឌចែកដែនដីគ្នាក្នុងឆ្នំា ១៩៤៩ មក នេះជាលើកទីមួយដែលមានកិច្ចព្រមព្រៀងមួយដ៏សំខាន់របៀបនេះ។ តើកិច្ចព្រមព្រៀងពាណិជ្ជកម្មនោះ មានចែងអំពីអ្វីខ្លះ ?
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
កិច្ចព្រមព្រៀងនៅក្នុងក្របខ័ណ្ឌនៃកិច្ចសហប្រតិបត្តិសេដ្ឋកិច្ចរវាងចិនដីគោក និងចិនតៃវ៉ាន់ ដែលទើបបានចុះហត្ថលេខាក្នុងថ្ងៃនេះ បានផ្តោតជាសំខាន់លើការកាត់បន្ថយច្បាប់ពន្ធគយនៃការនំាទំនិញពីចិនដីគោក ចូលទៅចិនតៃវ៉ាន់ និងពីចិនតៃវ៉ាន់ ចូលទៅចិនដីគោក។ យោងតាមកិច្ចព្រមព្រៀងនោះ ទីក្រុងប៉េកំាងបានយល់ព្រមកាត់បន្ថយច្បាប់ពន្ធគយលើផលិតផលរបស់ខ្លួនប្រមាណជា ៥៣៩មុខ ដែលនំាចូលក្នុងទឹកដីចិនតៃវ៉ាន់។ ជាថ្នូរមកវិញ មានផលិតផលតៃវ៉ាន់នំាចូលទៅចិនដីគោកប្រមាណតែ ២៥០ មុខប៉ុណ្ណោះ ដែលត្រូវកាត់បន្ថយច្បាប់ពន្ធគយ។ ជាមួយនឹងបរិមាណនេះបង្ហាញឲ្យឃើញថា ចំនួនផលិតផលចិនតៃវ៉ាន់ដែលទទួលបានការកាត់បន្ថយច្បាប់ពន្ធគយ មាន២ដងតិចជាង បើធៀបនឹងចំនួនផលិតផលចិនដីគោក ហើយបើគិតជាតម្លៃរបស់វាវិញ គឺមានរហូតដល់ទៅ ៥ដងតិចជាង។ មួយវិញទៀត កិច្ចព្រមព្រៀងនោះក៏បានចែងផងដែរថា គ្រប់ធនាគាររបស់ចិនតៃវ៉ាន់ដែលកំពុងរកស៊ីក្នុងទឹកដីចិនដីគោកនាពេលបច្ចុប្បន្ន ក៏នឹងទទួលបានការបន្ធូរបន្ថយលើពន្ធដារដែរ។
សូមជម្រាបជូនថា ចិនដីគោកបានក្លាយជាដៃគូពាណិជ្ជកម្មទីមួយរបស់ចិនតៃវ៉ាន់។ ជាក់ស្តែងក្នុងឆ្នំា ២០០៩ ចំនួនទឹកប្រាក់នៃការផ្តោះប្តូរពាណិជ្ជកម្មរវាងគ្នា មានរហូតដល់ទៅ ៨ម៉ឺន ៧ពាន់លានដុល្លារ។ បច្ចុប្បន្ននេះទៀត មានប្រជាជនចិនតៃវ៉ាន់រាប់ពាន់នាក់ដែលកំពុងរស់នៅក្នុងទឹកដីចិនដីគោក បានបោះទុនវិនិយោគក្នុងទឹកប្រាក់ជាង ១៥ម៉ឺនពាន់លានដុល្លារ ហើយតំាងពីឆ្នំា ២០០៨មក ពលរដ្ឋចិនដីគោកអាចធ្វើដំណើរតាមយន្តហោះទៅលេងចិនតៃវ៉ាន់ ដោយមិនចំាបាច់ឆ្លងកាត់ប្រទេសណាមួយទេ។
កិច្ចព្រមព្រៀងពាណិជ្ជកម្ម ឆ្ពោះទៅរកការបង្រួបបង្រួមចិនទំាងពីរ ?
បើនិយាយតែពីផ្លូវសេដ្ឋកិច្ច គឺអាច តែបើនិយាយដល់រឿងនយោបាយ វាជាផ្លូវមួយ ដែលនៅវែងឆ្ងាយនៅឡើយ។ វាពិតណាស់ថានារយៈពេលប៉ុន្មានឆ្នំាចុងក្រោយនេះ ពិសេស តំាងពីការឡើងធ្វើជាប្រធានាធិបតីតៃវ៉ាន់របស់លោក Ma Ying-jeou ក្នុងឆ្នំា ២០០៨ ដែលចេញពីគណបក្សKuomintang មក ទំនាក់ទំនងរវាងទីក្រុងប៉េកំាង និងទីក្រុងតៃប៉ិមានដំណើរយ៉ាងរលូន ដែលមិនធ្លាប់មានទេនាពេលកន្លងមក។ តែនេះ មិនមែនបានន័យថាចិនទាំងពីរត្រៀមខ្លួនបង្រួបបង្រួមគ្នាឲ្យទៅជាចិនតែមួយនោះទេ។ តាមពិតទៅ ទំនាក់ទំនងដ៏ល្អក្នុងគ្រាបច្ចុប្បន្នរវាងចិនទំាងពីរសុទ្ធតែបានបង្កប់ទៅដោយពុតត្បុតរៀងៗខ្លួន។ត្រង់ចំណុចនេះ ទំាងទីក្រុងប៉េកំាង និងទីក្រុងតៃប៉ិបានយល់ច្បាស់ណាស់។ តែអ្វីដែលអ្នកទំាងពីរប្រឹងប្រែងធ្វើរហូតមកទល់ពេលនេះ គឺក្នុងគោលដៅរំងាប់ភាពតានតឹងរវាងគ្នា។ សូមកុំភ្លេចថា កុំថាឡើយ រហូតដល់បង្រួបបង្រួមចិនតែមួយ សូម្បីតែសម្រួលឲ្យមានទំនាក់ទំនងការទូតរវាងគ្នាក៏ពិបាកនឹងធ្វើផង ព្រោះថា បើក្រុងប៉េកំាងបង្កើតឲ្យមានទំនាក់ទំនងការទូតជាមួយក្រុងតៃប៉ិ វាស្មើនឹងចិនដីគោកទទួលស្គាល់អធិបតេយ្យរបស់តៃវ៉ាន់ក្នុងនាមជាប្រទេសមួយដាច់ដោយឡែកពីប្រទេសខ្លួន។គេត្រូវដឹងថា គោលបំណងរបស់ចិនដីគោកមានតែមួយគត់ ទប់កុំឲ្យចិនតៃវ៉ាន់ប្រកាសឯករាជ្យ និងអូសទាញចិនតៃវ៉ាន់មកដាក់ក្រោមអាណាព្យាបាលរបស់ខ្លួន។សម្រាប់ចិនដីគោក ដើម្បីឲ្យខ្លួនក្លាយជាមហាអំណាចតំបន់ ឬមួយមហាអំណាចពិភពលោកបាន ត្រូវតែមាននយោបាយចិនតែមួយ និយាយបែបផ្សេង ភ្នំមួយមិនអាចមានខ្លាពីរបានទេ។
កិច្ចព្រមព្រៀងពាណិជ្ជកម្មជាអន្ទាក់ថ្មីរបស់ចិនដីគោក ក្នុងការក្រសោបចិនតៃវ៉ាន់ ?
កាលពីចុងសប្តាហ៍កន្លងទៅនេះ មានប្រជាជនតៃវ៉ាន់រាប់ពាន់នាក់បាននំាគ្នាធ្វើបាតុកម្មក្នុងទីក្រុងតៃប៉ិប្រឆំាងនឹងកិច្ចព្រមព្រៀងពាណិជ្ជកម្មរវាងរដ្ឋាភិបាលចិនដីគោក និងចិនតៃវ៉ាន់។ អ្វីដែលប្រជាជនតៃវ៉ាន់បារម្ភដំបូងនោះ គឺការហូរចូលទំនិញ Made in China មានតម្លៃថោកទៅក្នុងទឹកដីតៃវ៉ាន់ និងនំាឲ្យមានការកើនឡើងចំនួនអ្នកអត់ការងារធ្វើ។ ក្រោមភ្នែក ច្រមុះពលរដ្ឋតៃវ៉ាន់ គេចង់ឲ្យគ្រប់កិច្ចចរចាទំាងអស់ដែលធ្វើជាមួយចិនដីគោក ត្រូវតែឆ្លងកាត់ការបោះឆ្នោតប្រជាមតិជាមុនសិន។ មួយវិញទៀត អ្វីដែលជាក្តីបារម្ភខ្លំាងរបស់ប្រជាជនតៃវ៉ាន់ និងបក្សប្រឆំាងនោះ គឺខ្លាចតែកិច្ចព្រមព្រៀងពាណិជ្ជកម្មពេលនេះ ជាអន្ទាក់ថ្មីមួយ ឬក៏ថា អាចជាល្បិចថ្មីមួយទៀតរបស់ចិនដីគោក ក្នុងការកៀងតៃវ៉ាន់បន្តិចម្តងៗ មុននឹងក្រសោបយកទំាងមូលតែម្តង។
ក្តីបារម្ភរបៀបនេះរបស់ប្រជាជនតៃវ៉ាន់ ក៏មិនសូវខុសដែរ ព្រោះថា កាលពីចិនតៃវ៉ាន់ស្ថិតក្រោមការដឹកនាំរបស់លោកប្រធានាធិបតីទាមទារឯករាជ្យនិយម Chen Shui-bian ទំនាក់ទំនងរវាងក្រុងប៉េកំាង និងក្រុងតៃប៉ិបានឡើងតានតឹងដល់កំរិតកំពូល។ ចិនដីគោកថែមទំាងគំរាមនឹងប្រើគ្រប់មធ្យោបាយទំាងអស់ មានទំាងយោធាផង ដើម្បីទប់កុំឲ្យតៃវ៉ាន់ប្រកាសឯករាជ្យ។ តែតំាងពីតៃវ៉ាន់ស្ថិតក្រោមអំណាចរបស់លោក Ma Ying-Jeou ក្នុងឆ្នំា ២០០៨ មក លទ្ធភាពនៃការប្រកាសឯករាជ្យពីសំណាក់តៃវ៉ាន់មានកំរិតតិចតួចជាងសម័យលោកChen Shui-Bian។ ត្រង់ចំណុចនេះ ក្រុងប៉េកំាងបានយល់ភ្លាមថា មានតែការបង្កើនទំនាក់ទំនងសេដ្ឋកិច្ចនិងពាណិជ្ជកម្មទេដែលមិនយូរ មិនឆាប់ គង់មានថ្ងៃណាមួយ ដែលតៃវ៉ាន់ត្រូវធ្លាក់ក្នុងស៊ងរបស់គេជាមិនខាន។
ទីក្រុងតៃប៉ិវិញយល់ឃើញថាការពង្រឹងទំនាក់ទំនងសេដ្ឋកិច្ចជាមួយចិនដីគោកដោយមិននិយាយពីអធិបតេយ្យរបស់តៃវ៉ាន់នឹងធ្វើឲ្យខ្លួនចំណេញទៅវិញទេ។ លើសពីនេះទៅទៀត ជួនចំពេលដែលប្រទេសជាច្រើនមានទំាងតៃវ៉ាន់ផង កំពុងទទួលរងវិបត្តិសេដ្ឋកិច្ចនោះ មានតែប្រទេសចិនមួយទេដែលអាចជួយស្រោចស្រង់តៃវ៉ាន់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ