ចូលឆ្នាំថ្ងៃទី១ មានគ្រោះថ្នាក់ចរាចរណ៍ ២០ករណី ស្លាប់៦នាក់
គ្រោះថ្នាក់ចរាចរណ៍កើតមានចំនួន ២០ករណី ហើយមានមនុស្សស្លាប់ចំនួន ៦នាក់ នៅទូទាំងប្រទេស នៅក្នុងឱកាសបុណ្យចូលឆ្នាំថ្ងៃទី១ គឺថ្ងៃទី ១៤មេសា។ អ្នកនាំពាក្យ អគ្គស្នងការដ្ឋាននគរបាលជាតិ បានបញ្ជាក់ថា ករណីនេះប្រហាក់ប្រហែលនឹងឆ្នាំមុនៗដែរ ប៉ុន្តែចំពោះបញ្ហាសន្តិសុខ និងសណ្តាប់ធ្នាក់ក្នុងឱកាសបុណ្យចូលឆ្នាំខ្មែរ ឆ្នាំមមីនេះ ពុំមានបញ្ហាអ្វីគួរឲ្យកត់សម្គាល់នោះទេ។
ចុះផ្សាយនៅថ្ងៃ៖
ស្តាប់ - ០១:៤៨
មនុស្ស៦នាក់បានស្លាប់ក្នុងគ្រោះថ្នាក់ចរាចរណ៍ដែលបានកើតឡើងចំនួន២០ករណី នៅទូទាំងប្រទេសក្នុងថ្ងៃដំបូងនៃពិធីបុណ្យចូលឆ្នាំនេះ។ លោកឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា តួលេខនេះ ប្រហាក់ប្រហែលនឹងឆ្នាំមុនៗដែរ។
លោក គៀត ច័ន្ទថារិទ្ធ បានបន្តថា គ្រោះថ្នាក់នេះ កើតមានច្រើនរវាងម៉ូតូនិងម៉ូតូ ហើយមាននៅតាមបណ្តាខេត្តនានា។ ដោយឡែកដងវិថីនានា នៅក្នុងទីក្រុងភ្នំពេញវិញ មិនសូវមានអ្នកធ្វើដំណើរច្រើននោះទេ ព្រោះប្រជាជនភាគច្រើន បាននាំគ្នាធ្វើដំណើរទៅកាន់ស្រុកកំណើត ដើម្បីទៅចូលរួមពិធីបុណ្យចូលឆ្នាំខ្មែរ។ ដូច្នេះ ទាំងបញ្ហាចរាចរណ៍ និងសន្តិសុខនៅក្នុងទីក្រុងភ្នំពេញ គឺមានភាពល្អប្រសើរ។
បើទោះបីជាកើតមានគ្រោះថ្នាក់ចរាចរណ៍២០ករណីបែបនេះក៏ដោយ ក៏ប៉ុន្តែលោក គៀត ច័ន្ទថារិទ្ធ បានបញ្ជាក់ថា បញ្ហាសន្តិសុខទៅទូទាំងប្រទេស ពុំមានអ្វីកើតឡើងគួរឲ្យព្រួយបារម្ភនោះទេ។ ក៏ប៉ុន្តែបញ្ហាកកស្ទះចរាចរណ៍កើតមានបន្តិចបន្តួច នៅក្នុងខេត្តសៀបរាប និង ខេត្តព្រះសីហនុ ព្រោះប្រជាពលរដ្ឋសម្រុកទៅលេងទៅកន្លែងនោះច្រើន ជាពិសេសនៅក្នុងខេត្តសៀមរាប ដែលមានរៀបចំព្រឹត្តិការណ៍អង្គរសង្ក្រាន្ត។
សូមរម្លឹកជូនថា នៅកម្ពុជាគ្រោះថ្នាក់ចរាចរណ៍បានសម្លាប់មនុស្សជាមធ្យមប្រមាណជា៥នាក់ក្នុងមួយថ្ងៃៗ។ ចំនួនអ្នកស្លាប់និងរបួសតែងកើនឡើងយ៉ាងគំហុគក្នុងពិធីបុណ្យធំៗដែលមនុស្សធ្វើដំណើរច្រើននៅតាមដងផ្លូវដូចជាបុណ្យចូលឆ្នាំថ្មីជាដើម។ ការបើកបរក្នុងល្បឿនហួសកំណត់ មិនគោរពស្លាកសញ្ញាចរាចរណ៍ និងបើកបរក្នុងស្ថានភាពស្រវឹងជាដើម គឺជាមូលហេតុចម្បងនៃគ្រោះថ្នាក់ចរាចរណ៍។
ហេតុដូច្នេះហើយ បានជានៅមុនបុណ្យចូលឆ្នាំចូលមកដល់ ប្រមុខរាជរដ្ឋាភិបាលកម្ពុជា ក្រសួងមហាផ្ទៃ និងសាលារាជនីភ្នំពេញជាដើម សុទ្ធតែបានអំពាវនាវដល់ប្រជាពលរដ្ឋទាំងអស់ឲ្យមានការប្រុងប្រយ័ត្នខ្ពស់ និង គោរពច្បាប់ចរាចរណ៍ឲ្យបានត្រឹមត្រូវនៅពេលធ្វើដំណើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ