អង្គភាពប្រឆាំងអំពើពុករលួយប្រកាសស្វែងរកចាប់ជនសង្ស័យម្នាក់ទៀត
អង្គភាពប្រឆាំងអំពើពុករលួយដឹកនាំដោយលោកឱម យ៉ិនទៀង បានប្រកាសជាសាធារណៈស្វែងរកចាប់ខ្លួនបុរសឈ្មោះ ពេជ្រ គង់យូ អាយុ៤៣ឆ្នាំដែលជាបក្សពួករបស់ព្រះរាជអាជ្ញាតុលាការខេត្តពោធិសាត់ លោក តុប ចន្ទសិរីវុធ ពីបទឃុបឃិតប្រព្រឹត្តអំពើចាប់បង្ខាំងមនុស្សដើម្បីជម្រិតទារប្រាក់។ លោក ឱម យ៉ិនទៀង បានអំពាវនាវឲ្យសាធារណជនសហការដើម្បីឈានទៅចាប់ខ្លួនជនសង្ស័យខាងលើដែលកំពុងរត់គេចពីសំណាញ់ច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្នុងសេចក្តីជូនដំណឹងជាសាធារណៈមួយដែលបានមកដល់ដៃអ្នកកាសែតនៅចុងសប្តាហ៍នេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានប្រកាសស្វែងរកចាប់ខ្លួនបុរសឈ្មោះពេជ្រ គង់យូ ម្ចាស់ភោជនីយដ្ឋានមួយក្រោមបទចោទប្រកាន់ថាបានឃុបឃិតប្រព្រឹត្តបទល្មើសជាមួយលោក តុប ចន្ទសិរីវុធ ព្រះរាជអាជ្ញាតុលាការខេត្តពោធិសាត់ដែលតុលាការផ្តន្ទាទោសយ៉ាងធ្ងន់ធ្ងរពីបទពុករលួយ។ អង្គភាពប្រឆាំងអំពើពុករលួយបានអំពាវនាវឲ្យមហាជនទូទៅចូលរួមសហការណ៍ផ្តល់ព័ត៌មានដើម្បីឈានទៅចាប់ខ្លួនជនសង្ស័យខាងលើ។
សេចក្តីអំពាវនាវជាសាធារណៈនេះបានធ្វើឡើងបន្ទាប់ពីបក្ខពួករបស់ព្រះរាជអាជ្ញាតុលាការរូបនេះបានរត់គេចខ្លួនតាំងពីឆ្នាំ២០១០មកបន្ទាប់ពីមានដីកាតាមចាប់ខ្លួនរបស់តុលាការខេត្តពោធិសាត់។ សកម្មភាពជាបន្តបន្ទាប់របស់អង្គភាពប្រឆាំងអំពើពុករលួយបានធ្វើឲ្យប្រព័ន្ធផ្សព្វផ្សាយព័ត៌មាននិយាយពីអង្គភាពនេះជាញឹកញាប់រយៈពេលចុងក្រោយនេះ។ កាលពីខែមុននេះ អង្គភាពប្រឆាំងអំពើពុករលួយទើបតែបានចាប់ខ្លួនចៅក្រមតុលាការខេត្តកណ្តាលពីរនាក់ពីបទប្រព្រឹត្តអំពើពុករលួយដោយទារប្រាក់ពីកូនក្តីជាថ្នូរនឹងការដោះលែង។ ក្នុងចំណោមចៅក្រមទាំងពីរ ចៅក្រមម្នាក់ត្រូវបានដោះលែងវិញដោយសាររកមិនឃើញបទល្មើស រីឯម្នាក់ទៀតកំពុងជាប់មន្ទីរឃុំឃាំងដើម្បីរង់ចាំការកាត់ទោស។
ចាប់តាំងពីការកកើតអង្គភាពនេះមក ប្រអប់សំបុត្រសជាច្រើនត្រូវបានគេដាក់ពង្រាយដើម្បីទទួលពាក្យបណ្តឹងពាក់ពន្ធ័អំពើពុករលួយ។ អង្គភាពប្រឆាំងអំពើពុករលួយក៏បានបញ្ចេញស្នាដៃធំៗគួរឲ្យកត់សម្គាល់មួយចំនួននៅក្នុងបេសកកម្មរបស់ខ្លួន។ ជាក់ស្តែង ចំណាត់ការទៅលើព្រះរាជអាជ្ញាតុប ចន្ទសិរីវុធ ការបំបែកសំណុំរឿងពុករលួយក្នុងស្ថាប័នប្រឆាំងគ្រឿងញៀន ការចាប់ខ្លួនចៅក្រមតុលាការខេត្តកណ្តាល និងចំណាត់ការទៅលើមន្ត្រីពន្ធដារដែលទារប្រាក់លើសពីការកំណត់ជាដើម។
អង្គភាពប្រឆាំងអំពើពុករលួយក៏ធ្លាប់បានប្រកាសប្រាប់ឲ្យដឹងថា មានសំណុំរឿងជាច្រើនបានមកដល់ដៃមន្ត្រីជំនាញរបស់ខ្លួន ហើយសំណុំរឿងទាំងនោះកំពុងត្រូវបានចាត់ការជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ