កីឡាល្បុក្កតោត្រៀមចាំលទ្ធផលនៃការសម្រេចរបស់អង្គការបេតិកភណ្ឌ UNESCO
អង្គការយូណេស្កូ បានទទួលស្គាល់យកសំណុំបែបបទរបស់កម្ពុជា ដែលបានសុំបញ្ចូលប្រភេទកីឡាល្បុក្កតោ ជាបេតិកភណ្ឌអរូបិយអន្តរជាតិ។ អង្គការនេះនឹងបញ្ជូនគណៈប្រតិភូមកពិនិត្យ និងស្រាវជ្រាវបន្ថែម ក្នុងរយៈពេលដ៏ខ្លីខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
សំណុំបែបបទដែលកម្ពុជា បានផ្ញើទៅកាន់អង្គការ UNESCO កាលពីខែមេសា ឆ្នាំ ២០១៣នេះ គឺមានលក្ខណៈត្រឹមត្រូវគ្រប់យ៉ាង ហើយUNESCO នឹងបញ្ជូនប្រតិភូមកស្រាវជ្រាវពីប្រភេទកីឡាល្បុក្កតោក្បាច់ គុនខ្មែរដ៏ចំណាស់នេះបន្តទៀត។ នេះបើតាម លោក ហុក ឈាងគីម អគ្គលេខាធិការនៃសហព័ន្ធកីឡាល្បុក្កតោកម្ពុជា ដែលបានប្រាប់វិទ្យុ បារាំងនៅថ្ងៃនេះ។
លោក ហុក ឈាងគីម បានឲ្យដឹងថា ពុំមានអ្វីរាំងស្ទះចំពោះដំណើរការស្នើសុំដាក់កីឡាល្បុក្កតោជា បេតិកភណ្ឌកីឡាអរូបិយអន្តរជាតិនោះទេ។ ប៉ុន្តែ កម្ពុជាត្រូវរង់ចាំការសម្រេចរបស់គណៈកម្មាការបេតិកភណ្ឌ UNESCO នៅក្នុងការប្រជុំលើកទី ៣៨ នៅឆ្នាំ ២០១៤។
កាលពីសប្តាហ៍មុន គណៈកម្មាធិការជាតិអូឡាំពិកកម្ពុជា ក៏បានទៅចូលរួមប្រជុំជាមួយសម្ព័ន្ធកីឡាយុទ្ធសិល្ប៍ពិភពលោក និងអង្គការយូណេស្កូ នៅក្នុងប្រទេសកូរ៉េផងដែរ។
បើតាមការឲ្យដឹងពីលោក វ៉ាត់ ចំរើន អគ្គលេខាធិការគណៈកម្មាធិការអូឡាំពិកកម្ពុជា គឺកីឡាល្បុក្កតោខ្មែរ មានសង្ឃឹមច្រើន ក្នុងការចូលជាបេតិកភណ្ឌកីឡាអរូបិយអន្តរជាតិ។ ក្តីសង្ឃឹមនេះកើតឡើងក៏ព្រោះតែកម្ពុជាមានមូលដ្ឋានវប្បធម៌ច្បាស់ លាល់ និងមានគ្រឹះក្បាច់គុនចំណាស់ជាងគេ។ មួយវិញទៀត កម្ពុជាក៏ជាសមាជិករបស់អង្គការយុទ្ធសីល្ប៍ពិភពលោក ដែលត្រូវចូលរួមសម្រេចក្នុងការជ្រើសតាំងបេតិកណ្ឌកីឡាអរូបិយ អន្តរជាតិ នៅឆ្នាំ២០១៤ផងដែរ។
គួរបញ្ជាក់ថា នៅពេលបច្ចប្បន្ន ទាំងគណៈកម្មការជាតិអូឡាំពិកកម្ពុជា និងសហព័ន្ធកីឡាល្បុក្កតោ កំពុងតែព្យាយាមផ្សព្វផ្សាយពីប្រភេទកីឡានេះ ឲ្យសាយភាយពាសពេញពិភពលោក។ ស្របពេលជាមួយគ្នានេះដែរ គេក៏បានព្យាយាមបណ្តុះបណ្តាលកីឡានេះដល់យុវជនកម្ពុជា ឲ្យយល់ដឹងកាន់តែច្រើនឡើងៗផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ