មេដឹកនាំក្រុមអាវក្រហមពីរនាក់ទៀតចូលគុកដោយរឿងជេរប្រមាថព្រះរាជវង្សថៃ
ក្នុងរឿងជម្លោះនយោបាយ តំណាងរាស្រ្តគណបក្សប្រឆាំង ភឿថៃម្នាក់រងការបាញ់ប្រហារ កាលពីថ្ងៃអង្គារ។ ចំណែក ថ្នាក់ដឹកនាំសំខាន់របស់ក្រុមអាវក្រហមពីររូប គឺលោកចាទុផន ព្រំផាន់ និងលោកនីស៊ីត ស៊ីនធុប្រៃ ត្រូវតុលាការឧក្រិដ្ឋសម្រេច នៅថ្ងៃព្រហស្បតិ៍ទី ១២ ឧសភា នេះ ឲ្យគេចាប់បញ្ចូលទៅឃុំខ្លួន ក្នុងបទចោទប្រកាន់និយាយប៉ះពាល់ដល់ព្រះមហាក្សត្រ នៅក្នុងឱកាសថ្លែងរំលឹកខួបមហាបាតុកម្ម ក្នុងក្រុងបាងកក កាលពីថ្ងៃទី ១០ខែមេសាមុននេះ។
ចុះផ្សាយនៅថ្ងៃ៖
ស្តាប់ - ០២:២១
លោកចាទុផន ព្រំផាន់ ជាមេដឹកនាំក្រុមអាវក្រហមដែលចេញមុខ ចេញមាត់ជាងគេ នៅក្នុងមហាបាតុកម្មប្រឆាំងនឹងរដ្ឋាភិបាល កាលពីខែមីនា និងមេសា ឆ្នាំ មុន។ នៅក្រោយការបង្រ្កាបរបស់ទាហានបានសម្រេច ទៅលើបាតុករ លោក ចាទុផន ព្រំផាន់ និងថ្នាក់ដឹកនាំក្រុមអាវក្រហម៨នាក់ផ្សេងទៀត ត្រូវបានតុលាការឧក្រិដ្ឋថៃចោទប្រកាន់ពីបទពាក់ព័ន្ធនឹងអំពើភេរវកម្ម។ ប៉ុន្តែ លោកចាទុផន និងលោកនីស៊ីត ត្រូវដាក់ឲ្យស្ថិតនៅក្រៅឃុំបណ្តោះអាសន្ន មកពីលោកទាំងពីរនាក់ មានអភ័យឯកសិទ្ធិសភា។
ប៉ុន្តែ គ្រាន់តែលោកចាទុផន និងលោកនីស៊ីតបាត់បង់អភ័យឯកសិទ្ធិសភា ដោយសារការប្រកាសរំលាយសភាថៃ នៅថ្ងៃអង្គារ ព្រះរាជអាជ្ញាថៃបានសុំភ្លាម ទៅតុលាការឲ្យផ្តន្ទាទោសមេដឹកនាំក្រុមអាវក្រហមទាំងពីរ។ តុលាការរកឃើញថា នៅក្នុងសុន្ទរកថាថ្លែងទៅកាន់ក្រុមអាវក្រហម នៅថ្ងៃរំលឹកខួប នៅខែមុននេះ លោកចាទុផនបានជេរប្រមាថព្រះអង្គម្ចាស់ក្សត្រីមួយអង្គ ដោយនិយាយថា ខ្លួនលោកផ្ទាល់ចង់ឲ្យពិធីករ ទូរទស្សន៍ដដែល សម្ភាសន៍ដូចព្រះអង្គម្ចាស់ក្សត្រីរូបនោះ។ តុលាការបានបង្ហាញថា លោកចាទុផនបានរំលោភលក្ខខណ្ឌនៃការដោះលែងឲ្យមានសេរីភាពបណ្តោះអាសន្ន ដោយនិយាយប៉ះពាល់ដល់ព្រះរាជវង្ស។ ចៅក្រមរបស់តុលាការឧក្រិដ្ឋចាត់ទុករបៀបនិយាយចំអករបស់លោកចាទុផនថា អាចបង្កឲ្យមានការយល់ច្រឡំ ក្នុងចំណោមប្រជាជន និងបង្កជាចលាចលក្នុងសង្គមថៃ។
លោកចាទុផនជាបេក្ខជនឈរឈ្មោះសំខាន់របស់គណបក្សភឿថៃ សម្រាប់ការបោះឆ្នោត នៅខែកក្កដាខាងមុខ។ គណបក្សភឿថៃ ជាគណបក្សដែលស្និទ្ធទៅ នឹងលោកថាក់ស៊ីន។ គណបក្សនេះចូលរួមបានដឹកនាំចលនាក្រុមអាវក្រហម ដែលតំណាងឲ្យប្រជាជនជនបទ ធ្វើបាតុកម្មប្រឆាំងនឹងរដ្ឋាភិបាល។
នៅចំពោះមុខអ្នកគាំទ្ររបស់លោកជាង ២០០នាក់ និងអ្នកកាសែត លោកចាទុផនបាននិយាយទុកហើយថា បើលោកមិនអាចត្រូវគេដោះលែងនៅក្រៅឃុំបណ្តោះអាសន្ន នៅសាលាឧទ្ធរណ៍ទេ លោកនឹងព្យាយាមធ្វើយុទ្ធនាការឃោសនាបោះឆ្នោត តាំងពីក្នុងពន្ធនាគារទៅ។
ការចាប់ បញ្ចូល មេដឹកនាំក្រុមអាវក្រហមទៅក្នុងគុកបាងកក ធ្វើឡើង បន្ទាប់ពី ប្រមុខដឹកនាំយោធាថៃអះអាងថា ខ្លួនសម្រេចប្តឹងមេដឹកនាំក្រុមអាវក្រហម ពីបទចោទប្រកាន់ជេរប្រមាថព្រះមហាក្សត្រ។ ក្រុមប្រឆាំងថៃ ចោទថា ទាហានថៃដែលមានអំណាចបារមី ដោយព្រះរាជបល្ល័ង្ក បានប្រើច្បាប់ជេរប្រមាថព្រះមហាក្សត្រ ដើម្បីបង្រ្កាបចលនាប្រឆាំង។
អ្នកវិភាគនយោបាយថៃមួយចំនួនមើលឃើញថា ការចាប់ឃុំអ្នកទោសនយោបាយ នៅជិតពីរខែ មុនការបោះឆ្នោត ជាវិធានការកណ្តាប់ដៃដែករបស់ទាហាន។ ទាហានដែលមិនចង់ឃើញក្រុមប្រឆាំង ជាពិសេសក្រុមអាវក្រហមគំាំទ្រលោកថាក់ស៊ីន ដែលខ្លួនបានធ្វើរដ្ឋប្រហារទម្លាក់ពីតំណែង នៅឆ្នាំ ២០០៦ ចូលមកប្រកួតប្រជែងស្មើមុខមាត់ ឬអាចឈ្នះឆ្នោត លើគណបក្សប្រជាធិបតេយ្យរបស់លោកអាភីស៊ីត នៅថ្ងៃទី ៣ កក្កដានោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ