លទ្ធផលផ្លូវការ៖៧គណបក្សទទួលបានអាសនៈក្រុមប្រឹក្សាឃុំសង្កាត់
គណៈកម្មាធិការជាតិរៀបចំការបោះឆ្នោតបានប្រកាសលទ្ធផលនៅថ្ងៃអាទិត្យនេះដោយបញ្ជាក់ថា គណបក្សប្រជាជនកម្ពុជាកាន់កាប់ប្រធានឃុំសង្កាត់ចំនួន១៥៩២ក្នុងចំណោមឃុំសង្កាត់ទូទាំងប្រទេសចំនួន១៦៣៣ បន្ទាប់មកគណបក្សសមរង្ស៊ីកាន់កាប់មេឃុំសង្កាត់ចំនួន២២ គណបក្សសិទិ្ធមនុស្សចំនួន១៨និងគណបក្សហ៊្វុនស៊ិនប៉ិចចំនួន១។ រីឯគណបក្សតូចៗមួយចំនួនផ្សេងទៀតទទួលបានតែក្រុមប្រឹក្សាឃុំសង្កាត់ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
សម្រាប់ការបោះឆ្នោតក្រុមប្រឹក្សាឃុំសង្កាត់ឆ្នាំ២០១២នេះ មានគណបក្សចំនួន៧ទទួលអាសនៈក្រុមប្រឹក្សាឃុំសង្កាត់ក្នុងចំណោមគណបក្សចូលរួមប្រកួតប្រជែងចំនួន១០។ ប៉ុន្តែគណបក្សដែលទទួលបានជ័យជំនះកាន់កាប់តំណែងមេឃុំនិងចៅសង្កាត់គឺមានតែ៤ប៉ុណ្ណោះ។
លទ្ធផលផ្លូវការរបស់គណៈកម្មាធិការជាតិរៀបចំការបោះឆ្នោតដែលចេញផ្សាយនៅថ្ងៃអាទិត្យនេះបានបង្ហាញថា គណបក្សប្រជាជនកម្ពុជាកាន់កាប់ប្រធានឃុំសង្កាត់ចំនួន១៥៩២ក្នុងចំណោមឃុំសង្កាត់ទូទាំងប្រទេសចំនួន១៦៣៣ បន្ទាប់មកគឺគណបក្សសមរង្ស៊ីកាន់កាប់មេឃុំសង្កាត់ចំនួន២២ គណបក្សសិទិ្ធមនុស្សកាន់កាប់ចំនួន១៨ឃុំសង្កាត់និងគណបក្សហ៊្វុនស៊ិនប៉ិចកាន់កាប់ឃុំចំនួន១។ រីឯគណបក្សចំនួន៦ផ្សេងទៀត មិនទទួលបានតំណែងជាមេឃុំនិងចៅសង្កាត់ទេ។ ប៉ុន្តែគណបក្សខ្លះទទួលបានអាសនៈនៅក្នុងក្រុមប្រឹក្សាឃុំសង្កាត់សម្រាប់អាណត្តិទី៣នេះ។
ប្រសិនបើគេពិនិត្យលើចំនួនអាសនៈវិញ គណៈកម្មាធិការជាតិរៀបចំការបោះឆ្នោតបានអោយដឹងថា គណបក្សប្រជាជនកម្ពុជាទទួលបានអាសនៈឃុំសង្កាត់ចំនួន៨២៩២។ គណបក្សសមរង្ស៊ីទទួលបានចំនួន២១៥៥អាសនៈ។ គណបក្សសិទ្ធិមនុស្សទទួលបានចំនួន៨០០អាសនៈ។ គណបក្សហ៊្វុនស៊ិនប៉ិចទទួលបាន១៥១អាសនៈ។ គណបក្សនរោត្តមរណឫទ្ធិទទួលបាន៥២អាសនៈ។ គណបក្សសម្ព័ន្ធដើម្បីប្រជាធិបតេយ្យទទួលបាន៨អាសនៈនិងគណបក្សសញ្ជាតិកម្ពុជាទទួលបាន១អាសនៈ។
គណបក្សនយោបាយដែលចូលរួមការបោះឆ្នោតប្រកាសទទួលយកលទ្ធផលនៃការបោះឆ្នោតប៉ុន្តែពួកគេចាត់ទុកការបោះឆ្នោតនាពេលកន្លងមកថា មានភាពមិនប្រក្រតីមួយចំនួនកើតឡើង។
សូមបញ្ជាក់ថា បើផ្អែកលើលទ្ធផលផ្លូវការរបស់គណៈកម្មាធិការជាតិរៀបចំការបោះឆ្នោត គណបក្សប្រជាជនកម្ពុជានៅតែទទួលបានសំឡេងឆ្នោតនាំមុខគណបក្សដទៃទៀតដដែល។ ប៉ុន្តែមុននិងក្រោយការបោះឆ្នោតឃុំសង្កាត់នាពេលកន្លងមក គេសង្កេតឃើញមានចរន្តនយោបាយថ្មី ពោលគឺ ក្រោយការបោះឆ្នោតឃុំសង្កាត់ គណបក្សសិទ្ធិមនុស្សនិងគណបក្សសមរង្ស៊ីគ្រោងច្របាច់បញ្ចូលគ្នា។ គណបក្សហ្វ៊ុនស៊ិចប៉ិចនិងគណបក្សនរោត្តមរណឫទ្ធិក៏គ្រោងរំលាយបញ្ចូលគ្នាដែរ ប៉ុន្តែបន្តិចក្រោយមក សម្ព័ន្ធភាពនោះក៏បែកបាក់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ