គណបក្សហ៊្វុនស៊ិនប៉ិចនិងគណបក្សនរោត្តមរណឫទ្ធិប្រហែលជាមិនអាចច្របាច់បញ្ចូលគ្នាបានឡើយ
គណបក្សហ៊្វុនស៊ិនប៉ិចនិងគណបក្សនរោត្តមរណឫទ្ធិប្រហែលជាមិនអាចច្របាច់បញ្ចូលគ្នាបានឡើយនៅមុនការបោះឆ្នោតជាតិខែកក្កដា២០១៣ខាងមុខនេះ។ មូលហេតុផ្លូវការមិនត្រូវបានគេបង្ហាញអោយដឹងមែនប៉ុន្តែបើយោងតាមព័ត៌មានពីប្រភពផ្សេងៗគឺដោយសារជំហរនយោបាយខុសគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
គណបក្សហ៊្វុនស៊ិនប៉ិចនិងគណបក្សនរោត្តមរណឫទ្ធិបានធ្វើអោយមានការភ្ញាក់ផ្អើលយ៉ាងខ្លាំងនៅមុនពេលបោះឆ្នោតឃុំសង្កាត់ថ្ងៃទី៣ខែមិថុនាកន្លងមកពីព្រោះបន្ទាប់ពីមានជម្លោះនឹងគ្នាអស់រយៈពេល៦ឆ្នាំរួចមក គណបក្សទាំងពីរបានប្រកាសជាសាធារណៈចងសម្ព័ន្ធភាពនឹងគ្នាឡើងវិញ។ មិនមែនត្រឹមតែចងសម្ព័ន្ធភាពជាលក្ខណៈធម្មតានោះទេ។ ប៉ុន្តែបក្សទាំងពីរបានសន្យារំលាយបញ្ចូលគ្នាក្រោយការបោះឆ្នោតឃុំសង្កាត់ជាពិសេសច្របាច់បញ្ចូលគ្នាអោយបានមុនការបោះឆ្នោតជាតិខែកក្កដាឆ្នាំ២០១៣។
ប៉ុន្តែ ការចងសម្ព័ន្ធភាពមិនទាន់បានដល់មួយខែផង ស្រាប់តែគណបក្សទាំងពីរបានធ្វើអោយមានការភ្ញាក់ផ្អើលសាជាថ្មីម្តងទៀត។ ការភ្ញាក់ផ្អើលចុងក្រោយនេះគឺមិនមែនជាដំណឹងល្អឡើយពីព្រោះគណបក្សទាំងពីរទំនងជាមិនអាចបញ្ចូលគ្នាបាន។
គេមិនទាន់មានព័ត៌មានផ្លូវការបញ្ជាក់ពីការបែកបាក់ជាថ្មីឡើងវិញមែន។ ប៉ុន្តែកាលពីថ្ងៃសុក្រមិ្សលមិញ នៅក្នុងជំនួបជាមួយប្រធានថ្មីនៃវិទ្យាស្ថានសាធារណរដ្ឋអន្តរជាតិ(IRI) លោក ញឹក ប៊ុនឆៃ ប្រធានប្រតិបត្ដិនៃគណបក្សហ៊្វុនស៊ិនប៉ិចបានថ្លែងថា គម្រោងធ្វើសមាជរំលាយបញ្ចូលគ្នារវាងគណបក្សហ្វ៊ុនស៊ិនប៉ិច និងគណបក្សនរោត្ដមរណឫទ្ធិ ដែលគ្រោងនឹងធ្វើឡើងនៅខែកក្កដាឬសីហាខាងមុខនេះនឹងត្រូវផ្អាកសិន។ ប៉ុន្ដែ លោកប្រធានប្រតិបត្តិនៃគណបក្សហ៊្វុនស៊ិនប៉ិច មិនបានបញ្ជាក់លម្អិតពីមូលហេតុនៃការផ្អាកនោះទេ។
លោក ប៉ែន សង្ហា អ្នកនាំពាក្យគណបក្សនរោត្តមរណឫទ្ធិ បានថ្លែងប្រាប់នៅថ្ងៃសៅរិ៍នេះថា លោកមិនទាន់បានទទួលដំណឹងនៃការផ្អាកអង្គសមាជបញ្ចូលគ្នាទេ។ សម្រាប់គណបក្សនរោត្តមរណឫទ្ធិ ជំហរគឺនៅដដែល។ មូលហេតុនៃការផ្អាកអង្គសមាជបញ្ចូលគ្នាមិនត្រូវបានបក្សទាំងពីរបង្ហើបអោយដឹងមែនប៉ុន្តែបើយោងតាមព័ត៌មានមួយចំនួន បញ្ហានេះគឺដោយសារគណបក្សទាំងពីរមានជំហរនយោបាយផ្ទុយគ្នាសម្រាប់ពេលអនាគត។ និងម្យ៉ាងទៀតគឺដោយសារ លទ្ធផលបង្រួបបង្រួមមុនការបោះឆ្នោតឃុំសង្កាត់មិនមានសញ្ញាល្អប៉ុន្មានទេសម្រាប់អនាគតនៃបក្សទាំងពីរនោះ។
សូមបញ្ជាក់ថា គណបក្សហ៊្វុនស៊ិនប៉ិចនិងគណបក្សនរោត្តមរណឫទ្ធិ បានបែកផ្លូវគ្នានៅឆ្នាំ២០០៦ពោលគឺនៅពេលដែលព្រះអង្គម្ចាស់នរោត្តមរណឫទ្ធិត្រូវបានគេទម្លាក់ចេញពីព្រះប្រធានគណបក្សហ៊្វុនស៊ិនប៉ិច។ ក្រោយពីបែកខ្ញែកគ្នាប្រជាប្រិយភាពនៃគណបក្សរាជានិយមទាំងពីរបានស្រុតចុះជាលំដាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ