ហុងកុង៖មេដឹកនាំថ្មីជាមនុស្សជំនិតរបស់ក្រុងប៉េកាំង
គឺ អ្នកជំនួញម្នាក់ស្និទ្ធនឹងរដ្ឋាភិបាលទីក្រុងប៉េកាំង ដែលបានជាប់ឆ្នោតនៅថ្ងៃ អាទិត្យ ទី២៥ មីនានេះ ជាមេដឹកនាំថ្មីរបស់ក្រុង ហុងកុង។ លោក Leung Chun Ying ត្រូវបាន ជ្រើសតាំងតាមរយៈការបោះឆ្នោតដោយមិនចំពោះមួយ ចូលរួមដោយអ្នកបោះឆ្នោតតំណាង ចំនួន១២០០នាក់ជ្រើសរើសមកពី មជ្ឈដ្ឋាន ហិរញ្ញវត្ថុ ជំនួញ និងសាលាជាន់ខ្ពស់ ។ ឯចំណែកលោក Henry Tang គូប្រជែងលេចធ្លោម្នាក់ទៀត បានអាប់អោនប្រជាប្រិយភាពបន្ទាប់ពីលោកត្រូវបានបរិហារជុំវិញរឿងអាស្រូវជាច្រើនរាប់មិនអស់ ទាក់ទងនឹង អំពើក្បត់ផិតប្រពន្ធ និងការងារខុសច្បាប់មួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
លោក Leung Chun Ying ដែលបច្ចុប្បន្នមានវ័យ ៥៧ឆ្នាំគឺជាកូនរបស់មន្រ្តីប៉ូលិសម្នាក់។ គាត់បានបញ្ចប់ការសិក្សានៅប្រទេសអង់គ្លេស ហើយធ្លាប់កាន់តំណែងជាអគ្គលេខាធិការរបស់អាជ្ញាធរក្រុង ហុងកុង។ អ្នកជំនួញស្និទ្ធនឹងរដ្ឋាភិបាលក្រុងប៉េកាំងរូបនេះ ក៏កំពុងតែដឹកនាំ ការិយាល័យជំនាញ ដីធ្លីមួយដែលទទួលបន្ទុកផ្តល់ប្រឹក្សាស្របច្បាប់ទៅដល់ខេត្តជាច្រើនក្នុងប្រទេសចិនអំពី កំណែទម្រង់ដីធ្លី។
នៅតែពីរខែទៀតទេ លោកនឹងឡើងកាន់តំណែងបន្តពីលោក Donald Tsang ហើយនឹងក្លាយជាប្រមុខដឹកនាំទី៤របស់ ហុងកុង បន្ទាប់ពីតំបន់នេះត្រូវបានប្រទេសអង់គ្លេសសំរេចប្រគល់អោយទៅប្រទេសចិនវិញកាលពីឆ្នាំ ១៩៩៧។ នៅក្នុងការបោះឆ្នោតនៅថ្ងៃអាទិត្យនេះ លោក Leung Chun Ying ទទួលបានសំឡេងគាំទ្រដល់ទៅជាង ៥៧ ភាគរយ ពីអ្នកបោះឆ្នោតតំណាង ចំនួន១២០០នាក់ ដែលគេនិយាយជារួមជាអ្នកមានប្រចាំក្រុង ហុងកុង។
ឯចំណែក លោក Henry Tang គូប្រជែងលេចធ្លោម្នាក់ទៀតដែលមានវ័យច្រើនជាងលោកពីរឆ្នាំ បានទទូលសំឡេងគាំទ្រតែជិត២៤សំឡេងប៉ុណ្ណោះ ដោយសារតែគាត់ជាប់ពាក់ព័ន្ធ នឹងរឿងអាស្រូវជាច្រើន។ ហើយបើគេនិយាយដល់ លោក Albert Ho ដែលជាបេក្ខជនតំណាងអោយលិទ្ធិប្រជាធិបតេយ្យ លោកទទួលបានសំឡេងមិនដល់ ៧ភាគរយផង។
ដោយមិនពេញចិត្តទៅនឹងការបោះឆ្នោតមិនចំពោះរបៀបខាងលើ មនុស្សរាប់ពាន់នាក់បានកែនគ្នាមកជួបជុំនៅពីមុខ អគារសន្និបាត ហុងកុង ជាទីកន្លែងបោះឆ្នោតនៅព្រឹកមិញនេះ ដើម្បីទាមទារអោយមានការបោះឆ្នោតជាសកលដោយចំពោះ និងប្រកបដោយលទ្ធិប្រជាធិបតេយ្យ។ ពួកគេនាំគ្នាស្រែកទាមទាររហូតលឺដល់ក្នុងសាលបោះឆ្នោតថា “សូមកុំបោះឆ្នោតអី”។ ប៉ុន្តែបន្ទាប់ពីប្រកាសថាបានឈ្នះឆ្នោតលោក Leung Chun Ying បានអះអាងតបតទៅវិញថា លោកនឹងធ្វើយ៉ាងណាអោយអ្នកទាំងអស់នោះឈប់មានគំនិតអគតិមកលើរូបលោក។ នៅឯទីក្រុងប៉េកាំងឯណោះវិញ គេលឺល្ហេចល្ហៀងមកថា យ៉ាងហោចណាស់ រហូតដល់ឆ្នាំ២០១៧ ទើបការបោះឆ្នោតដោយចំពោះមួយអាចកើតមាននៅក្នុងការជ្រើសរើសមេដឹកនាំនៅតាមខេត្តក្រុងក្នុងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ