ប្រជាពលរដ្ឋបុរីកីឡាចំនួន៧នាក់ត្រូវបានដោះលែងអោយនៅក្រៅឃុំបណ្តោះអាសន្ន
ប្រជាពលរដ្ឋបុរីកីឡាចំនួន៧នាក់ដែលត្រូវបានចាប់ខ្លួនកាលពីជាង១ខែមុនដោយសារជម្លោះដីធ្លីនៅក្នុងតំបន់បុរីកីឡាជាមួយក្រុមហ៊ុន ផាន អ៊ី ម៉ិច ត្រូវបានដោះលែងអោយនៅក្រៅឃុំបណ្តោះអាសន្នអស់ហើយនៅថ្ងៃសៅរ៍នេះ។ ប៉ុន្តែបើទោះបីជាយ៉ាងនេះក្តីប្រជាពលរដ្ឋនិងអង្គការក្រៅរដ្ឋាភិបាលអំពាវនាវដល់ស្ថាប័នតុលាការអោយលើកលែងការចោទប្រកាន់តែម្តង ពោលគឺមិនមែនគ្រាន់តែដោះលែងអោយនៅក្រៅឃុំប៉ុណ្ណោះអាសន្នទេ។
ចុះផ្សាយនៅថ្ងៃ៖
ស្តាប់ - ០២:០៩
ប្រជាពលរដ្ឋបុរីកីឡា៥នាក់ត្រូវបានដោះលែងកាលពីយប់មិ្សលមិញនិង២នាក់ផ្សេងទៀតត្រូវបានដោះលែងនៅព្រឹកថ្ងៃសៅរ៍នេះ។ នេះគឺជាការបញ្ជាក់របស់អង្គការការពារសិទ្ធិមនុស្សនិងប្រជាពលរដ្ឋដែលទើបចេញពីពន្ធនាគារ។
កាលពីដើមខែមករាកន្លងមក អាជ្ញាធរមូលដ្ឋានបានរុះរើលំនៅដ្ឋានប្រជាពលរដ្ឋប្រមាណជា៣០០គ្រួសារនៅក្នុងតំបន់បុរីកីឡាដោយសំអាងថា ពួកគេមករស់នៅទីនេះមិនមានច្បាប់ទំលាប់គ្រប់គ្រាន់។
ក្នុងអំឡុងពេលរុះរើ អំពើហិង្សាបានកើតឡើងរវាងប្រជាពលរដ្ឋនិងអាជ្ញាធរដែលបណ្តាលអោយមានការចាប់ខ្លួនមនុស្សចំនួន៧នាក់ក្នុងនោះមានយុវជនអាយុ១៧ឆ្នាំចំនួន២នាក់។ យុវជនអាយុក្រោម១៨ឆ្នាំពីរនាក់នេះត្រូវបានតុលាការដោះលែងនៅព្រឹកថ្ងៃសៅរ៍នេះ។
លោក ពុត សាមាន ប្រជាពលរដ្ឋបុរីកីឡាដែលត្រូវបានអាជ្ញាធរចាប់ខ្លួនបញ្ជូនទៅកាន់ពន្ធនាគារព្រៃសកាលពីខែមករាក្នុងអំពើហិង្សាហើយត្រូវបានដោះលែងកាលពីយប់ម្សិលមិញបាននិយាយប្រាប់នៅព្រឹកថ្ងៃសៅរ៍នេះថា លោកមានទឹកចិត្តរំភើបនិងសប្បាយរីករាយយ៉ាងខ្លាំងបន្ទាប់ពីបានចាកចេញពីពន្ធនាគារព្រៃស។ ចិត្តរំភើបមែនដោយបាននៅក្រៅឃុំបណ្តោះអាសន្នប៉ុន្តែបុរសអាយុ៣១ឆ្នាំរូបនេះបានអំពាវនាវអោយតុលាការលើកលែងការចោទប្រកាន់ទាំងស្រុងមកលើពួកគេ។
មន្រ្តីស៊ើបអង្កេតនៃអង្គការការពារសិទ្ធិមនុស្សលីកាដូ លោក អំ សំអាត បានបញ្ជាក់នៅថ្ងៃសៅរ៍នេះថា ការដោះលែងបណ្តោះអាសន្ននេះគឺជាជំហានល្អមួយសម្រាប់ប្រជាពលរដ្ឋបុរីកីឡាប៉ុន្តែលោកសំណូមពរអោយលើកលែងការចោទប្រកាន់ទាំងស្រុងមកលើប្រជាពលរដ្ឋទាំងនោះតែម្តង។
ប្រជាពលរដ្ឋបុរីកីឡាចំនួន៧នាក់ដែលត្រូវបានចាប់ខ្លួនរងការចោទប្រកាន់ពីបទប្រព្រឹត្តិអំពើហិង្សាដោយចេត្តនានិងការប្រឆាំងនឹងមន្រ្តីរាជ។លោក អំ សំអាត បានបន្តបញ្ជាក់ទៀតថា ប្រជាពលរដ្ឋទាំងនោះទទួលរងទុក្ខទោសដោយសារតែពួកគេការពារផ្ទះសម្បែងពួកគេតែប៉ុណ្ណោះ។ ពួកគេមិនគួរទទួលរងការចោទប្រកាន់ពីតុលាការនោះទេ។
សូមបញ្ជាក់ថា ទំនាស់ដីធ្លីនៅក្នុងតំបន់បុរីកីឡាបានអូសបន្លាយអស់រយៈពេលជាច្រើនឆ្នាំមកហើយរវាងប្រជាពលរដ្ឋនិងក្រុមហ៊ុនឯកជន។ ប្រជាពលរដ្ឋបានចោទប្រកាន់ក្រុមហ៊ុនថាបានរំលោភយកដីរបស់ពួកគេប៉ុន្តែក្រុមហ៊ុនបានបកស្រាយបញ្ច្រសទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ