ក្រុមអ្នកកាសែតភូមាត្រៀមខ្លួនយកព័ត៌មានជុំវិញការបោះឆ្នោត
គឺនៅថ្ងៃទី ១ មេសាស្អែកដែលភូមាត្រូវរៀបចំបោះឆ្នោតជ្រើសរើសសមាជិកសភាចំនួន ៤៨រូប។ ការបោះឆ្នោតដែលលោកស្រីប្រមុខគណបក្សប្រឆំាង អ៊ុង សានស៊ូជីនឹងចូលរួមជាលើកដំបូង។ នេះជាព្រឹត្តិការណ៍មួយដែលសហគមន៍ជាតិ និងអន្តរជាតិកំពុងរង់ចំាឃ្លំាមើលយ៉ាងយកចិត្តទុកដាក់ជាទីបំផុត។ ចំណែកក្រុមអ្នកកាសែតភូមាវិញក៏បានត្រៀមខ្លួនរួចជាស្រេចដើម្បីយកព័ត៌មានជុំវិញការបោះឆ្នោតនេះ និងបញ្ជូនទៅឲ្យអ្នកអានរបស់ខ្លួនដោយប្រើគ្រប់មធ្យោបាយទំាងអស់ មានដូចជា Twitter និង Facebook ជាដើម។
ចុះផ្សាយនៅថ្ងៃ៖
ស្តាប់ - ០១:៥៨
ការបោះឆ្នោតជ្រើសរើសសមាជិកសភាភូមាមួយភាគនៅថ្ងៃអាទិត្យ ទី១ មេសាស្អែក ពិតជាព្រឹត្តិការណ៍ប្រវត្តិសាស្រ្តមួយដែលគ្មាននរណាអាចមើលរំលងបានឡើយ ពិសេស ក្រុមអ្នកសារព័ត៌មានតែម្តង។ ប៉ុន្តែបញ្ហានៅត្រង់ថា ទោះបីជាភូមាបានប្តូរពីរដ្ឋាភិបាលដឹកនំាដោយរបបសឹកមកជារដ្ឋាភិបាលដឹកនំាដោយក្រុមស៊ីវិលក៏ដោយ ក៏អ្នកសារព័ត៌មានក្នុងស្រុកនៅមិនទាន់អាចបង្កើតសារព័ត៌មានប្រចំាថ្ងៃរបស់ខ្លួននៅឡើយទេ។ រីឯសិទ្ធិសេរីភាពក្នុងការបញ្ចេញមតិក៏នៅមានកម្រិតដែរ។ បច្ចុប្បន្ននេះ គេសង្កេតឃើញថា គ្រប់កាសែតប្រចំាថ្ងៃគឺជារបស់រដ្ឋ ចំណែកក្រុមហ៊ុនឯកជនមានសិទ្ធិបោះផ្សាយតែទស្សនាវដ្តី និងកាសែតប្រចំាសប្តាហ៍។
« គ្រប់គ្នាចង់អានកាសែតរៀងរាល់ថ្ងៃច័ន្ទដើមសប្តាហ៍ » នេះជាការអះអាងរបស់លោក ធីហា ស អ្នកនិពន្ធនាយករបស់ទស្សនាវដ្តីប្រចំាសប្តាហ៍មួយឈ្មោះ Open News។ ចំណែកលោកស្រី យេនយេន ណាង អ្នកនិពន្ធនាយករបស់ទស្សនាវដ្តីប្រចំាសប្តាហ៍មួយទៀតឈ្មោះ ៧Day News វិញបានបញ្ជាក់ថា លោកស្រីនឹងព្យាយាមដាក់ព័ត៌មានជុំវិញការបោះឆ្នោតឲ្យបានទាន់ពេលបំផុតដែលអាចធ្វើទៅបាន។ រីឯទស្សនាវដ្តីប្រចំាសប្តាហ៍ផ្សេងៗទៀតត្រៀមខ្លួននឹងបញ្ជូនព័ត៌មានទៅឲ្យអ្នកអានរបស់ខ្លួនតាមរយៈ Twitter និង Facebook។
គួរជម្រាបជូនថា កាលពី១ឆ្នំាមុន គេមិនដែលឃើញ ឬមិនសូវឃើញរូបលោកស្រី អ៊ុង សានស៊ូជីនៅក្នុងទំព័រសារព័ត៌មានទេ តែសព្វថ្ងៃនេះ រូបលោកស្រី អ៊ុង សានស៊ូជីត្រូវបានគេឃើញនៅលើទំព័រមុខតែម្តង។ បើយោងតាមលោកស្រី យេនយេន ណាង សិទ្ធិសេរីភាពរបស់អ្នកសារព័ត៌មាននៅមានកម្រិតនៅឡើយ តែជាមួយនឹងរដ្ឋាភិបាលបច្ចុប្បន្ន អ្នកកាសែតភាគច្រើនហាក់ដូចជាប្រថុយប្រថានហ៊ានសរសេរជាងមុន។ តែយ៉ាងណាក៏ដោយ ក្រុមអ្នកកាសែតនៅតែបារម្ភថា បើទោះបីជារដ្ឋអំណាចមិនអាចរារំាងការបង្ហោះព័ត៌មានតាមប្រព័ន្ធអ៊ីនធ័រណែត Twitter និង Facebook ក្តី ក៏រដ្ឋអំណាចនៅមានមធ្យោបាយបច្ចេកទេសផ្សេងទៀតដើម្បីតាមធ្វើទុក្ខបុកម្នេញ ដូចយ៉ាងកាត់ផ្តាច់ចរន្តអគ្គិសនីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ