ភូមា៖ ចាប់ជំរិតជនជាតិចិនពីរនាក់បង្ខំឲ្យក្រុមហ៊ុនចិនបញ្ឈប់ការធ្វើអាជីវកម្មរ៉ែ
ជនជាតិពីរនាក់ ដែលបម្រើការឲ្យក្រុមហ៊ុនរ៉ែដ៏ចម្រូងចម្រាសមួយ នៅក្នុងប្រទេសភូមា ត្រូវបានសកម្មជន និងព្រះសង្ឃភូមាចាប់ជំរឹត។ នេះបើយោងតាមការអះអាងរបស់ក្រុមហ៊ុន កាលពីថ្ងៃចន្ទ ដោយបានបញ្ជាក់ថា សកម្មជនគំរាមថានឹងសម្លាប់ជនជាតិចិនទាំងពីរនាក់នេះចោល ហើយទាមទារឲ្យក្រុមហ៊ុនបញ្ឈប់គម្រោងអាជីវកម្មរ៉ែទាំងស្រុង។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមហ៊ុនចិន ឈ្មោះ Wanbao ដែលកំពុងរកស៊ីធ្វើអាជីវកម្មរ៉ែទង់ដែង នៅក្នុងប្រទេសភូមា បានឲ្យដឹងថា បុគ្គលិក ៣នាក់របស់ខ្លួន ក្នុងនោះ មានជនជាតិចិន ២នាក់ និងជនជាតិភូមាម្នាក់ ត្រូវបានសកម្មជន ដោយមានព្រះសង្ឃផង ចាប់ជំរិត កាលពីព្រឹកថ្ងៃអាទិត្យ។ ប៉ុន្តែ ក្រោយមក បុគ្គលិកជនជាតិភូមាត្រូវបានដោះលែងមកវិញ។
នៅក្នុងសេចក្តីថ្លែងការណ៍ កាលពីថ្ងៃចន្ទ ក្រុមហ៊ុន Wanbao ក្រៅពីបានថ្កោលទោសការចាប់ជំរឹតនេះ ក៏បានបញ្ជាក់ឲ្យដឹងផងដែរថា សកម្មជនបានធ្វើការទាមទារឲ្យអាជ្ញាធរដោះលែងគ្នាគេមួយចំនួន ដែលត្រូវបានប៉ូលិសចាប់ខ្លួន កាលពីព្រឹកថ្ងៃអាទិត្យ ព្រមទាំងទាមទារឲ្យក្រុមហ៊ុនបញ្ឈប់ការធ្វើរបងព័ទ្ធយកដីរបស់អ្នកភូមិ។ ក្រោយមកទៀត សកម្មជនបានទាមទារឲ្យក្រុមហ៊ុនបញ្ឈប់សកម្មភាពធ្វើអាជីវកម្មរ៉ែទាំងស្រុង ហើយបានគំរាមថានឹងសម្លាប់ជនជាតិចិនទាំងពីរនាក់ ប្រសិនបើប៉ូលិសព្យាយាមចូលទៅរំដោះពួកគេ។
គួររំឭកឡើងវិញថា គម្រោងអាជីវកម្មរ៉ែទង់ដែង ដោយក្រុមហ៊ុនចិន Wanbao នេះ ត្រូវបានសហគមន៍ធ្វើការតវ៉ាជំទាស់យ៉ាងខ្លាំងក្លា ដោយចោទថា ក្រុមហ៊ុននេះបានរឹបអូសដីរបស់អ្នកភូមិ ព្រមទាំងបានធ្វើឲ្យខូចខាតដល់បរិស្ថាន។ បាតុកម្មប្រឆាំងនឹងគម្រោងអាជីវកម្មរ៉ែនេះត្រូវបានអ្នកភូមិ និងសកម្មជនរៀបចំធ្វើជាច្រើនលើកច្រើនសា រហូតដល់មានការបង្រ្កាបដោយហិង្សា ពីសំណាក់ប៉ូលិសភូមា កាលពីចុងឆ្នាំ២០១២កន្លងទៅ។ សូម្បីតែលោកស្រីអ៊ុង សានស៊ូជី ប្រមុខដឹកនាំប្រឆាំងដ៏ល្បីល្បាញរបស់ភូមា ក៏ធ្លាប់ត្រូវបានអ្នកភូមិ និងសកម្មជនធ្វើការរិះគន់យ៉ាងខ្លាំងក្លាដែរ នាពេលកន្លងមក នៅពេលដែលលោកស្រីប្រកាសគាំទ្រឲ្យក្រុមហ៊ុនរ៉ែចិននេះបន្តធ្វើអាជីវកម្មរ៉ែ នៅក្នុងតំបន់ចម្រូងចម្រាស តទៅទៀត។
ហេតុការណ៍ចាប់ជំរិតជនជាតិចិន នៅភូមានេះ បានកើតមានឡើង នៅក្នុងពេលដែល រដ្ឋាភិបាលក្រុងប៉េកាំងកំពុងតែជម្លៀសពលរដ្ឋរបស់ខ្លួនចេញពីប្រទេសវៀតណាម ក្រោយពីជម្លោះដែនសមុទ្របានរាលដាលទៅជាអំពើកុប្បកម្មប្រឆាំងនឹងក្រុមហ៊ុន និងជនជាតិចិន រហូតបណ្តាលឲ្យជនជាតិចិនត្រូវស្លាប់ និងរបួសជាច្រើននាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ