បាតុកម្មពេទ្យកម្មសិក្សា៖ រដ្ឋាភិបាលកូរ៉េខាងត្បូងផ្តើមបែបបទព្យួរសញ្ញាប័ត្រកូដករ
បន្ទាប់ពីព្រមាន រដ្ឋាភិបាលកូរ៉េខាងត្បូងបានចាប់ផ្តើមដំណើរបែបបទដាក់ទណ្ឌកម្ម ព្យួរក្រុមពេទ្យកម្មសិក្សាទាំងជាង៤៩០០នាក់ ដែលធ្វើកូដកម្មមិនមកបំពេញតួនាទីកម្មសិក្សានៅតាមមន្ទីរពេទ្យ។ វិធានការនេះអាចនឹងធ្វើឱ្យនិស្សិតពេទ្យខាតពេលដល់មួយឆ្នាំ និងមិនអាចទទួលសញ្ញាប័ត្រជាវេជ្ជបណ្ឌិតពេញសិទ្ធិបាន។
ចុះផ្សាយនៅថ្ងៃ៖
ស្តាប់ - ០២:៤៥
និស្សិតថ្នាក់កម្មសិក្សាបាននាំគ្នាធ្វើកូដកម្ម បោះបង់តួនាទីជាគ្រូពេទ្យមិនមកធ្វើការ តាំងពីថ្ងៃទី២០កុម្ភៈមក ជាហេតុធ្វើឱ្យមន្ទីរពេទ្យមានដំណើរការយ៉ាងរអាក់រអួលបំផុត កម្មវិធីព្យាបាល -វះកាត់ ជាងពាក់កណ្តាលត្រូវលើកពេល ព្រោះប្រព័ន្ធសុខាភិបាល(មន្ទីរពេទ្យកូរ៉េខាងត្បូង) ពឹងផ្អែកយ៉ាងខ្លាំងលើកម្លាំងពលកម្មរបស់គ្រូពេទ្យកម្មសិក្សា។
ស្ថានភាពមន្ទីរពេទ្យយ៉ាប់យឺនខ្លាំង បានជំរុញឱ្យរដ្ឋាភិបាលកោះប្រមូលនិងបញ្ចេញពេទ្យយោធាមកជាជំនួយ។ ទន្ទឹមពេលជាមួយគ្នានេះ ក្រោយពីបានព្រមាននិងបញ្ជាឱ្យប៉ូលិសបើកអង្កេត នៅថ្ងៃចន្ទនេះរដ្ឋាភិបាលបានផ្តើមដំណើរបែបទដាក់ទណ្ឌកម្មនិស្សិតកម្មសិក្សាជាកូដករ។ ក្នុងដំណាក់កាលទីមួយ ក្រសួងសុខាភិបាលបានផ្ញើលិខិតរដ្ឋបាលទៅកាន់កូដករទាំងជាង៤៩០០នាក់ ឱ្យក្រុមនិស្សិតបាតុករត្រលប់មកបំពេញការងារនៅមន្ទីរពេទ្យវិញ ព្រោះតាមច្បាប់គ្រូពេទ្យ ជាការងារដ៏សំខាន់ ដែលមិនអាចធ្វើកូដកម្មបានទេ។ បន្ទាប់មក បើពេទ្យកម្មសិក្សានៅតែបន្តមិនចូលធ្វើការទេ នោះអាជ្ញាធរនឹងព្យួរសញ្ញាប័ត្ររបស់ពួកគេសម្រាប់រយៈពេលបីខែ ដែលជាស្វ័យប្រវត្តិពួកគេនឹងត្រូវខាតពេលយ៉ាងហោចមួយឆ្នាំសិក្សាតែម្តង ពោលគឺពួកគេមិនអាចទទួលសញ្ញាប័ត្របញ្ចប់ការសិក្សាក្លាយជាវេជ្ជបណ្ឌិត ជាអ្នកឯកទេសបានទេ សម្រាប់និស្សិតកូដករត្រូវបញ្ចប់ឆ្នាំនៅឆ្នាំនេះ។ ក្រសួងសន្យាថានឹងរាល់និស្សិតកូដករដែលសុខចិត្តត្រលប់មកចូលធ្វើការវិញភ្លាម នឹងបានរួចខ្លួនពីទណ្ឌកម្មនេះ។
ប៉ុន្តែនិស្សិតកម្មសិក្សាចំនួន១២០០០នាក់ ពោលគឺ៩៣% បានអវត្តមាននៅថ្ងៃចន្ទ ដើម្បីផ្គើនសេចក្តីសម្រេចចិត្តរបស់រដ្ឋាភិបាលទៅវិញ។ គ្រូពេទ្យកម្មសិក្សាបាននាំគ្នាធ្វើបាតុកម្មមិនចូលធ្វើការ ដើម្បីតវ៉ាប្រឆាំងនឹងគម្រោងកំណែទម្រង់ប្រព័ន្ធសិក្សាវេជ្ជសាស្ត្រ ដែលគ្រោងនឹងដំឡើងចំនួននិស្សិតចូលរៀន៦៥% ឬ២០០០នាក់បន្ថែមក្នុងមួយឆ្នាំចាប់ពីឆ្នាំក្រោយទៅ។
ប្រឈមនឹងកំណើនប្រជាពលរដ្ឋវ័យចំណាស់ និងកង្វះគ្រូពេទ្យដែលអាចដល់ទៅ១៥០០០នាក់នៅឆ្នាំ២០៣៥ រដ្ឋាភិបាលកូរ៉េខាងត្បូងចាំបាច់ត្រូវធ្វើកំណែទម្រង់ដំឡើងចំនួននិស្សិតឱ្យបានចូលរៀនពេទ្យ។ រដ្ឋាភិបាលព្យាករថាប្រទេសនឹងមានពលរដ្ឋអាយុលើសពី៦៥ឆ្នាំចំនួនដល់ទៅ៤៤%នៅឆ្នាំ២០៥០។ បច្ចុប្បន្ននេះ កូរ៉េខាងត្បូងមានគ្រូពេទ្យជាមធ្យមតែ២,៦នាក់ប៉ុណ្ណោះសម្រាប់មើលពលរដ្ឋ១ពាន់នាក់ ទល់នឹងមធ្យមភាគ៣,៧% បើប្រៀបទៅនឹង៣៧រដ្ឋជាសមាជិកអង្គការប្រទេសអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ