ឥណ្ឌា៖ សមាជិកម្នាក់នៃគណៈកម្មការជាតិរៀបចំការបោះឆ្នោត ប្រកាសលាឈប់ ខណៈការបោះឆ្នោតសភាជិតមកដល់
នៅឥណ្ឌា តាមការគ្រោងទុក ការបោះឆ្នោតសភាអាណត្តិថ្មី នឹងត្រូវធ្វើនៅរវាងខែមេសា និងឧសភាខាងមុខនេះ។ ស្របពេលដែលកាលបរិច្ឆេទនៃការបោះឆ្នោត នៅមិនទាន់ត្រូវបានគេប្រកាស ស្រាប់តែកាលពីថ្ងៃសៅរ៍ ទី៩មីនា សមាជិកម្នាក់នៃគណកម្មការជាតិរៀបចំការបោះឆ្នោតឥណ្ឌា បានប្រកាសលាលែងពីតំណែង។ ក្រុមគណបក្សប្រឆាំងឥណ្ឌា បានលើកឡើងពីការព្រួយបារម្ភ ថាគណកម្មការរៀបចំការបោះឆ្នោត ពិតជាបានរងសំពាធពីរដ្ឋាភិបាលរបស់លោក ណារិន្ទ្រ ម៉ូឌី។
ចុះផ្សាយនៅថ្ងៃ៖
ស្តាប់ - ០២:៤៦
ការបោះឆ្នោតសភាកាន់តែខិតជិតមកដល់ តែគណកម្មការជាតិរៀបចំការបោះឆ្នោតឥណ្ឌា ដែលមានសមាជិកជាន់ខ្ពស់ចំនួន៣នាក់នោះ គឺនៅសល់សមាជិកតែ១នាក់គត់ បន្ទាប់ពីលោក Arun Goel បានប្រកាសលាឈប់ពីមុខងារ កាលពីថ្ងៃសៅរ៍ទី៩មីនា។ ចំណែកសមាជិកម្នាក់ទៀត បានឈប់ពីមុខងារដែរ ដោយដល់អាយុចូលនិវត្ត តែមកទល់ពេលនេះ មិនទាន់មាននរណាមកជំនួសឡើយ។
ផ្អែកតាមក្រសួងយុត្តិធម៌ឥណ្ឌា លោកស្រីប្រធានាធិបតីឥណ្ឌា Droupadi Murmu បានទទួលយកលិខិតសុំលាឈប់ របស់លោក Arun Goel ហើយ តែដោយមិនបានបញ្ជាក់ឲ្យដឹងថា ការសុំលាឈប់នេះ មានមូលហេតុអ្វីនោះទេ។ ដោយឡែក បណ្តាញទូរទស្សន៍ NDTV ដោយមិនបញ្ជាក់ប្រភព បានផ្សាយថា លោក Arun Goel បានលាឈប់ពីគណៈកម្មការជាតិរៀបចំការបោះឆ្នោត ដោយមូលហេតុផ្ទាល់ខ្លួន។
សូមបញ្ជាក់ថា យោងតាមបណ្តាញផ្សព្វផ្សាយឥណ្ឌា កាលបរិច្ឆេទនៃការបោះឆ្នោតសភា នឹងត្រូវប្រកាសនៅសប្តាហ៍ក្រោយនេះហើយ ដោយគណៈកម្មការជាតិរៀបចំការបោះឆ្នោត។ ប្រជាជនឥណ្ឌាប្រមាណជិត១០០០លាននាក់ នឹងត្រូវទៅបោះឆ្នោត ជ្រើសរើសសមាជិកសភាជាន់ទាប ដែលមានឈ្មោះថា Lok Sabha ដែលការបោះឆ្នោតនេះនឹងត្រូវធ្វើច្រើនដំណាក់កាល តាមរដ្ឋនីមួយៗរបស់សហព័ន្ធឥណ្ឌា។ ពោលវាគឺជាការបោះឆ្នោតតាមបែបប្រជាធិបតេយ្យ ដ៏ធំបំផុតនៃពិភពលោក។
លោក Venugopal អគ្គលេខានៃគណបក្ស Congrès ដែលជាបក្សប្រឆាំងធំបំផុតនៅឥណ្ឌា បានលើកឡើងថា ការលាចុះពីតំណែងទាន់ហន់របស់ Arun Goel គឺពិតជាគួរឲ្យព្រួយបារម្ភធំណាស់។ នៅលើបណ្តាញសង្គម លោក Venugopal បានសរសេរថា សុខភាពនៃលទ្ធិប្រជាធិបតេយ្យឥណ្ឌា ដែលជាប្រទេសប្រជាធិបតេយ្យធំជាងគេបង្អស់នៃពិភពលោក កំពុងតែជួបគ្រោះថ្នាក់ បន្ទាប់ពីសមាជិកគណៈកម្មការជាតិរៀបចំការបោះឆ្នោត លាឈប់ពីតំណែងនៅមុនពេលនិងការបោះឆ្នោតបែបនេះ។ លោកបន្ថែមថា ស្ថាប័នចាត់ចែងការបោះឆ្នោតនេះ គ្មានតម្លាភាពទេ ហើយជាងនេះទៀត គឺវាបានបង្ហាញថា ស្ថាប័ននេះពិតជាបានរងនូវការដាក់សំពាធផ្សេងៗ ពីរដ្ឋាភិបាលរបស់លោកណារិន្ទ្រ ម៉ូឌី។
គួរបញ្ជាក់ថា លោកណារិន្ទ្រ ម៉ូឌី បានប្រកាសថានឹងឈរឈ្មោះ ជានាយករដ្ឋមន្ត្រីក្នុងអាណត្តិទី៣។ យោងតាមការស្ទាបស្ទង់មតិ គណបក្សBharatiya Janata Party (BJP) របស់លោកណារិន្ទ្រ ម៉ូឌី អាចទទួលបានជ័យជំនះយ៉ាងងាយ នៅក្នុងការបោះឆ្នោត។ ការសិក្សាមួយរបស់ Pew Research នៅឆ្នាំ២០២៣ បានបង្ហាញថា ៨០%នៃប្រជាជនឥណ្ឌា មានគំនិតយល់ឃើញវិជ្ជមាន លើលោកនាយករដ្ឋមន្ត្រីហិណ្ឌូជាតិនិយមរូបនេះ។ ចំណែកការស្ទាបស្ទង់មតិមួយទៀត ធ្វើឡើងដោយ YouGov បង្ហាញថា គណបក្ស Bharatiya Janata Party របស់លោកម៉ូឌី អាចទទួលបានការគាំទ្រលើសគណបក្សប្រឆាំងផ្សេងទៀត ពីសំណាក់ប្រជាជនឥណ្ឌាគ្រប់ស្រទាប់វណ្ណៈ ដែលគេបានចោទសួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ