ម៉ាល់ឌីវ ចុះកិច្ចព្រមព្រៀងយោធាជាមួយចិន បន្ទាប់ពីបានបញ្ជាឲ្យកងទ័ពឥណ្ឌាចាកចេញ
រដ្ឋាភិបាលប្រទេសម៉ាល់ឌីវ បានចុះកិច្ចព្រមព្រៀងយោធាថ្មីមួយ ជាមួយចិន កាលពីថ្ងៃអង្គារ ទី៥មីនា។ កិច្ចព្រមព្រៀងដែលនឹងអនុញ្ញាតឲ្យងកងទ័ពម៉ាល់ឌីវ ទទួលបានការជួយទំនុកបំរុងពីកងទ័ពចិន។ មួយឆ្នាំបនញទាប់ពីបានចូលកាន់អំណាច ប្រធានាធិបតីថ្មីរបស់ម៉ាឌីវ ដែលមានទំនោរទៅរកចិន បានចេញបញ្ជាឲ្យកងទ័ពឥណ្ឌាត្រូវចាកចេញឲ្យអស់ពីទឹកដីម៉ាល់ឌីវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្រសួងការពារជាតិម៉ាល់ឌីវ បានបញ្ជាក់នៅរសៀលថ្ងៃអង្គារទី៥មីនា ម៉ាល់ឌីវបានចុះកិច្ចព្រមព្រៀងយោធា ជាមួយ ចិន ដើម្បីឲ្យភាគីចិនជួយផ្គត់ផ្គង់សម្ភារៈយោធា និងជំនួយផ្សេងៗ។ ដោយមិនលំអិតឲ្យបានច្រើនជាងនេះ ក្រសួងការពារជាតិម៉ាល់ឌីវ បានត្រឹមបញ្ជាក់ថា កិច្ចព្រមព្រៀងនេះ គឺជាកិច្ចព្រមព្រៀងដោយឥតគិតថ្លៃ។ ដោយឡែក នៅតាមបណ្តាញសង្គម X ក្រសួងការពារជាតិម៉ាល់ឌីវ បានបង្ហោះសារ ថាកិច្ចព្រមព្រៀងយោធាជាមួយចិន ត្រូវបានធ្វើឡើងក្នុងកម្មវត្ថុពង្រឹងសហប្រតិបត្តិការទ្វេរភាគី។
ស្របពេល មានការប្រកាសពីកិច្ចព្រមព្រៀងយោធាជាមួយចិននេះដែរ ក្រសួងសុខាភិបាលម៉ាល់ឌីវឯនោះ បានប្រកាសថាគេបានទទួលអំណោយជារថយន្តសង្គ្រោះបន្ទាន់ចំនួន១០គ្រឿងពីរដ្ឋាភិបាលចិន។
គួរបញ្ជាក់ថា ម៉ាល់ឌីវ ដែលជាប្រទេសអ៊ីស្លាម ប្រជុំកោះស្ថិតក្នុងមហាសមុទ្រឥណ្ឌា តាំងតែពីដើមមក គឺតែងស្ថិតក្នុងដែនឥទ្ធិពលរបស់ឥណ្ឌា។ តែយ៉ាងណា ទំនាក់ទំនងរវាងឥណ្ឌានិងម៉ាល់ឌីវ បានល្អក់កករខ្លាំង បន្ទាប់ពីលោកប្រធានាធិបតី Mohamed Muizzu បានចូលកាន់អំណាចកាលពីខែកញ្ញាឆ្នាំ២០២៣។ លោកប្រធានាធិបតីថ្មីរូបនេះ មានទំនោរងាកទៅរកចិន ហើយបានធ្វើឥណ្ឌាកាន់តែបារម្ភ ថាចិនអាចនឹងប្រើប្រាស់ម៉ាល់ឌីវ ដើម្បីតាំងទីកងទ័ពកៀកនឹងឥណ្ឌា។
កាលពីថ្ងៃចន្ទ ទី៤មីនា ប្រធានាធិបតីថ្មីរបស់ម៉ាល់ឌីវ បានប្រកាសថា កងទាហានឥណ្ឌាចំនួន៨៩នាក់ នឹងត្រូវចាកចេញឲ្យអស់ពីទឹកដីម៉ាល់ឌីវ យ៉ាងយូរបំផុត នៅថ្ងៃ១០ឧសភាខាងមុខ។ ទាហានឥណ្ឌាទាំងនេះ គឺត្រូវបានគេបញ្ជូនមក ក្នុងបេសកកម្មប្រើប្រាស់យន្តហោះប្រមូលព័ត៌មានល្បាតសមុទ្រចំនួន៣គ្រឿង។ តាមការគ្រោងទុក ភាគីឥណ្ឌា ត្រូវបញ្ជូនបុគ្គលិកស៊ីវីល មកជំនួសទាហានទាំងនេះ ដើម្បីបន្តបេសកកម្ម។
គួររំលឹកដែរថា ទំនោរខិតទៅរកចិន របស់ម៉ាល់ឌីវ បានធ្វើឲ្យឥណ្ឌាបារម្ភខ្លាំងឡើងៗ។ កាលពីខែកុម្ភៈ ម៉ាល់ឌីវ បានអនុញ្ញាតឲ្យនាវាមួយគ្រឿងរបស់ចិន ឲ្យចូលមកក្នុងដែនទឹកម៉ាល់ឌីវ ដែលគេអះអាងជាផ្លូវការថា ជានាវាស្រាវជ្រាវសមុទ្រ។ នាវាចិនឈ្មោះ Xiang Yang Hong 3 នេះ បានចូលមកចតនៅកំពង់ផែរដ្ឋធានី Malé របស់ម៉ាល់ឌីវ បន្ទាប់ពីត្រូវអាជ្ញាធរស្រីលង្កាបដិសេធមិនឲ្យចូលចត។ ឥណ្ឌាបានដាក់ការសង្ស័យថា នាវាចិននេះ ជានាវាឈ្លបយកការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ