តើជម្លោះសាសនាកំពុងចាប់រើបឡើងវិញ នៅឥណ្ឌា?
នៅឥណ្ឌា អាជ្ញាធរក្នុងរដ្ឋUttarkahand ប៉ះទង្គិចគ្នាជាមួយក្រុមអ្នកកាន់សាសនាអ៊ីស្លាម ដែលធ្វើបាតុកម្មហិង្សា ប្រឆាំងអាជ្ញាធរ នៅក្នុងរឿងវាយកម្ទេចទីតាំងសាសនារបស់ពួកគេ។ នៅថ្ងៃព្រហស្បតិ៍ម្សិលមិញ អាជ្ញាធរមូលដ្ឋាននៅក្នុងរដ្ឋភាគខាងជើងឥណ្ឌា Uttarkahandបញ្ជាឲ្យគេបំផ្លាញអគារសាលារៀន និងវិហារអ៊ីស្លាម នៅក្នុងហេតុផលថាជាសំណង់ខុសច្បាប់។ ការប៉ះទង្គិចគ្នាដ៏ហិង្សា នៅថ្ងៃសុក្រទី ៩កុម្ភៈ ដែលនៅក្នុងបាតុករដុតបំផ្លាញរថយន្តជាច្រើនគ្រឿង មនុស្សពីរនាក់ស្លាប់ និងជាង១០នាក់រងរបួស ដែលភាគច្រើនជាប៉ូលិសឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៧
មនុស្ស២នាក់ស្លាប់ ចំណែកជាង១០នាក់រងរបួសនៅក្នុងការប៉ះទង្គិចគ្នាដ៏ហិង្សារវាងអ្នកកាន់សាសនាអ៊ីស្លាម និងកងកម្លាំងរក្សាសន្តិសុខ នៅរដ្ឋ Uttarkahandភាគខាងជើងឥណ្ឌា។ ប៉ូលិសមិនបានបញ្ជាក់អត្តសញ្ញាណរបស់ជនរងគ្រោះស្លាប់នៅក្នុងបាតុកម្មហិង្សា ដុតរថយន្តបង្កឡើងដោយអ្នកកាន់សាសនាអ៊ីស្លាមទេ ប៉ុន្តែ គ្រាន់តែ បញ្ជាក់ថា មានប៉ូលិសជាច្រើននាក់ដែលរងរបួសដោយសារការគប់ដុំថ្មរបស់បាតុករ។
មន្រ្តីប៉ូលិសមូលដ្ឋានម្នាក់ បាននិយាយប្រាប់អ្នកកាសែតថា គេបានទទួលបញ្ជាពីថ្នាក់លើឲ្យបាញ់សំដៅកុបករ ដោយមិនបង្អង់ដៃ។
ការប្រឈមដាក់គ្នាដ៏ហិង្សារវាងប៉ូលិស និងបាតុករអ៊ីស្លាម កើតឡើងនៅមួយថ្ងៃក្រោយពីអាជ្ញាធរក្រុង ក្នុងរដ្ឋ Uttarkahandបញ្ជាឲ្យវាយបំផ្លាញ សាលារៀន និងវិហារអ៊ីស្លាមនៅក្នុងហេតុផលថា ជាសំណង់ សង់ឡើងដោយគ្មានសុំការអនុញ្ញាតពីអាជ្ញាធរ។
សម្រាប់សហគមន៍អ៊ីស្លាម នេះជាការធ្វើទុក្ខបុកម្នេញ មួយទៀតរបស់អាជ្ញាធរឥណ្ឌា ទៅលើអ្នកកាន់សាសនាអ៊ីស្លាម។ នៅក្រោមការដឹកនាំរបស់លោកនាយករដ្ឋមន្រ្តីឥណ្ឌា ណារិនដ្រា ម៉ូឌី ដែលជាអ្នកកាន់សាសនាហិណ្ឌូយ៉ាងជោគជាំ សំឡេងទាមទារឲ្យសាសនាហិណ្ឌូ ជាសាសនាកំពូលរបស់ឥណ្ឌាមានកាន់តែច្រើនឡើងៗ។ តាំងពីលោកណារិនដ្រា ម៉ូឌីចូលកាន់តំណែងជានាយករដ្ឋមន្រ្តីនៅឆ្នាំ ២០១៤ ក្រុមហិណ្ឌូជាតិនិយមកាន់តែបានដៃ បើកយុទ្ធនាការប្រឆាំង វាយបំផ្លាញទីតាំងសាសនាជាច្រើនរបស់ប្រជាជនអ៊ីស្លាម នៅឥណ្ឌា។
ហេតុការណ៍ប៉ះទង្គិចនៅថ្ងៃសុក្រនេះ កើតឡើងនៅតែប៉ុន្មានសប្តាហ៍ក្រោយ ដែលលោកនាយករដ្ឋមន្រ្តីឥណ្ឌាបើកសម្ពោធទីសក្ការៈបូជាដ៏ចម្រូងចម្រាសមួយ នៅក្នុងទីក្រុងអាយុធ្យា។ ចម្រូងចម្រាស ព្រោះវិហារហិណ្ឌូមួយនេះ សាងសង់នៅលើទីតាំងដែលធ្លាប់មានវិហាអ៊ីស្លាម សតវត្សរ៍ទី១៦ ប៉ុន្តែ ដែលត្រូវក្រុមអ្នកកាន់សាសនាហិណ្ឌូវាយបំផ្លាញ នៅឆ្នាំ ១៩៩២។ កាលណោះ ការវាយបំផ្លាញវិហារអ៊ីស្លាមបានបណ្តាលឲ្យមានកុបកម្ម ការប៉ះទង្គិចគ្នាដ៏ហិង្សា ដែលបានសម្លាប់មនុស្សប្រមាណ ២០០០នាក់ ដែលភាគច្រើនជាអ្នកកាន់សាសនាអ៊ីស្លាម។
នៅឥណ្ឌា ដែលប្រជាជនឥណ្ឌាសរុប ជាង ១៤០០លាននាក់ អ្នកកាន់សាសនាអ៊ីស្លាម ប្រមាណ២១០លាននាក់ កំពុងរស់នៅក្នុងការភ័យខ្លាច ព្រួយបារម្ភពីអនាគតរបស់ពួកគេ។ ខណៈពេលដែលការបោះឆ្នោតជាតិកាន់តែកៀកខិតចូលមកដល់ នៅខែមេសាខាងមុខ អំពើហិង្សា ការធ្វើទុកម្នេញ និងការដៅបំផ្លាញ ទ្រព្យសម្បត្តិ ទីតាំងគោរពបូជារបស់អ្នកកាន់សាសនាអ៊ីស្លាមមានកាន់តែច្រើនឡើងៗ។
នៅចុងខែមករា អាជ្ញាធរឥណ្ឌាបានបំផ្លាញវិហារអ៊ីស្លាមមួយទៀត ចំណាស់ ៦០០ឆ្នាំ នៅក្នុងទីក្រុងញូវដេលី នៅក្នុងលេសថា វិហារអ៊ីស្លាមស្ថិតនៅដោយខុសច្បាប់ ក្នុងឧទ្យានជាតិ។ ចំណែកនៅរដ្ឋធានី Mumbai អាជ្ញាធរចេញបញ្ជាឲ្យបំផ្លាញហាងទំនិញ ជាច្រើនកន្លែងរបស់អ្នកកាន់សាសនាអ៊ីស្លាម នៅក្រោយពីមានការផ្ទុះអំពើហិង្សាដាក់គ្នារវាងអ្នកកាន់សាសនាហិណ្ឌូ និងអ្នកកាន់សាសនាអ៊ីស្លាម ដោយសារ វិហារហិណ្ឌូ នៅអាយុធ្យា។
នៅក្នុងរដ្ឋ Uttarkahand នៅមុនមានបាតុកម្មតវ៉ារបស់អ្នកកាន់សាសនាអ៊ីស្លាម នៅថ្ងៃសុក្រនេះ ភាពតានតឹងចាប់កើនឡើង តាំងពីថ្ងៃពុធ នៅពេលអាជ្ញាធរអនុម័តច្បាប់ តម្រូវឲ្យគេអនុវត្តក្រមរដ្ឋប្បវេណី ជំនួសច្បាប់អ៊ីស្លាម នៅក្នុងរឿងលែងលះ ការរៀបអាពាហ៍ពិពាហ៍ ឬការផ្ទេរមរតកជាដើម។ អ្នកកាន់សាសនាអ៊ីស្លាមប្រឆាំងតវ៉ាខ្លាំង ព្រោះវាប៉ះពាល់ដល់សិទ្ធិ ការអនុវត្តច្បាប់អ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ