ចិនកាត់ទោសប្រហារជីវិតអ្នកនិពន្ធជាតិអូស្ត្រាលីដើមកំណើតចិន ពីបទចារកិច្ច
លោក យ៉ាង ហឺនជីន អ្នកនិពន្ធនិងជាសាស្ត្រាចារ្យសកលវិទ្យាល័យជាតិអូស្ត្រាលីដើមកំណើតចិន ដែលប៉េកាំងចាប់ឃុំឃាំងតាំងពីឆ្នាំ២០១៩មក ពីបទជាប់ចោទធ្វើចារកិច្ច ត្រូវបានតុលាការចិនកាត់ទោសប្រហារជីវិតដោយព្យួរ។ នេះបើតាមសេចក្តីថ្លែងការណ៍របស់ក្រសួងការបរទេសអូស្ត្រាលី នៅថ្ងៃទី ៥កុម្ភៈ២០២៤។
ចុះផ្សាយនៅថ្ងៃ៖
ស្តាប់ - ០២:២៤
កើតនៅប្រទេសចិនក្នុងឆ្នាំ១៩៦៥ ជាអ្នកនិពន្ធប្រលោមលោក ជាអ្នកសរសេរប្លុក ជាសកម្មជនប្រជាធិបតេយ្យចិន និងជាអតីតអ្នកការទូតចិន លោក យ៉ាង ជីន បានក្លាយជាពលរដ្ឋសញ្ជាតិអូស្ត្រាលីនៅឆ្នាំ២០០២។ ល្បីក្រោមឈ្មោះ យ៉ាង ហឺនជីន និងរស់នៅសហរដ្ឋអាមេរិក លោកយ៉ាង ជីន ត្រូវបានអាជ្ញាធរប៉េកាំងចាប់ខ្លួន នៅខែមករាឆ្នាំ២០១៩ ពេលធ្វើដំណើរមកប្រទេសចិន ពីបទសង្ស័យធ្វើចារកិច្ច។ តុលាការចិនធ្លាប់បានបើកសវនាការកាត់ទោស លោក យ៉ាង ដោយបិទទ្វារ កាលពីឆ្នាំ២០២១ ដោយគ្មានធ្លាយសាលក្រមចេញជាសាធារណៈទេ។ កាលណោះក្នុងខែឧសភា២០២១ លោកបានអះអាងថាទទួលរងទារុណកម្ម នៅក្នុងកន្លែងឃុំឃាំងសម្ងាត់។ នៅខែសីហា២០២៣ លោកយ៉ាង បានបង្ហាញក្តីព្រួយបារម្ភចំពោះអាយុជីវិតក្នុងពន្ធនាគារ ដោយហេតុតែលោកមានរោគាដុះដុំសាច់នៅក្នុងក្រលៀន។
ទើបតែនៅថ្ងៃចន្ទទី៥កុម្ភៈ២០២៤នេះ ដែលអ្នកនាំពាក្យក្រសួងការបរទេសចិន Wang Wenbin ចេញមុខផ្តល់ព័ត៌មាន។ ជាមួយទោសប្រព្រឹត្តបទចារកិច្ច តុលាការក្រុងប៉េកាំងបានសម្រេចកាត់ទោសប្រហារជីវិតលោក យ៉ាងជីន ដោយព្យួររយៈពេលពីរឆ្នាំ ព្រមទាំងរឹបអូសយកទ្រព្យសម្បត្តិផ្ទាល់របស់លោកទាំងអស់។ នេះបើតាមអ្នកនាំពាក្យក្រសួងបរទេសចិនដដែល។
នៅចិន ពាក្យថា មានទោសប្រហារជីវិតដោយព្យួររយៈពេលពីរឆ្នាំមានន័យថាជាការសម្រាលទោស ផុតរយៈពេលព្យួរពីរឆ្នាំ អ្នកទោសត្រូវជាប់ក្នុងពន្ធនាគារអស់មួយមួយជីវិត។
សូមបញ្ជាក់ថា នៅមុនសេចក្តីប្រកាសរបស់អាជ្ញាធរចិន លោកស្រីរដ្ឋមន្ត្រីក្រសួងការបរទេសអូស្ត្រាលីបានជូនដំណឹងស្តីអំពីការកាត់ទោសប្រហារជីវិតលោកសាស្ត្រាចារ្យ យ៉ាង ជន និងអះអាងថារដ្ឋាភិបាលអូស្ត្រាលីភ្ញាក់ផ្អើលនឹងសាលក្រមចិនខ្លាំងណាស់។ លោកស្រីប្រមុខការទូតបានសន្យាបញ្ចេញប្រតិកម្មដោយសក្តិសម និងបានកោះហៅឯកអគ្គរដ្ឋទូតចិនប្រចាំទីក្រុងកង់បេរ៉ាមកបំភ្លឺរួចហើយនៅថ្ងៃចន្ទនេះ។
ការសម្រេចប្រហារជីវិតអ្នកនិពន្ធនិងសាស្ត្រាចារ្យសាកលវិទ្យាល័យជាតិអូស្រ្តាលីនេះ ប្រព្រឹត្តទៅក្នុងខណៈដែលទំនាក់ទំនងចិនអូស្ត្រាលីហាក់បានធូរស្បើយស្គាល់ភាពប្រសើរឡើងបន្តិច តាំងពីខែតុលា២០២៣មកក្រោយពេលប៉េកាំងសម្រេចដោះលែងអ្នកកាសែតជាតិអូស្រ្តាលីអ្នក ឆេង លៃ ជាប់ឃុំនៅចិនពីបទចារកិច្ចដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ