ភាពតានតឹងនៅសមុទ្ទក្រហម ជាឱកាសរបស់ចោរសមុទ្ទធ្វើសកម្មភាព?
ស្រីលង្កាដែលទើបប្រកាសចូលរួមក្នុងប្រតិបត្តិការអន្តរជាតិការពារចរាចរណ៍ដឹកជញ្ជូននៅសមុទ្ទក្រហម បានអះអាងថានៅថ្ងៃអាទិត្យទី២៨មករា២០២៤ ចោរសមុទ្ទសូម៉ាលី បានចាប់នាវានេសាទរបស់ស្រីលង្កាមួយគ្រឿង ដែលមានផ្ទុកមនុស្ស៦នាក់។
ចុះផ្សាយនៅថ្ងៃ៖
ស្តាប់ - ០២:២៧
នាវានេសាទស្រីលង្កា Lorenzo Putha-4 ទំនងជាត្រូវបានចោរសមុទ្ទចាប់នៅចម្ងាយ៨៤០មាយ ទីរដ្ឋធានីប្រទេសសូម៉ាលី។ ស្រីលង្កាបានជូនដំណឹងទៅកងកម្លាំងជើងទឹកនៃសម្ព័ន្ធអន្តរជាតិទទួលបន្ទុកប្រយុទ្ធប្រឆាំងភេរវកម្មនិងចោរសមុទ្ទរួចហើយ។ នេះបើតាមការអះអាងរបស់អ្នកនាំពាក្យកងនាវិកស្រីលង្កាទៅកាន់ទីភ្នាក់ងារសារព័ត៌មានបារាំងAFP។ បើតាមអ្នកនាំពាក្យដដែល ពេលនេះ យោធាឥណ្ឌា បានបញ្ជូននាវាចម្បាំងទៅអង្កេត ឯចំណែកកងនាវាយោធាស្រីលង្កា ក៏កំពុងត្រៀមលក្ខណៈចេញធ្វើដំណើរទៅកាន់តំបន់កើតហេតុដែរ។
ស្រីលង្កាបានសម្រេចកាលពីដើមខែមករាចូលរួមសហការការងារជាមួយក្រុមនាវឹកអន្តរជាតិដឹកនាំដោយសហរដ្ឋអាមេរិក នៅសមុទ្ទក្រហម ដើម្បីការពារចរាចរណ៍ដឹកជញ្ជូនអន្តរជាតិតាមសមុទ្ទ ពីការវាយប្រហាររបស់ពួកឧទ្ទាមហ៊ូទី។ តែស្រីលង្កាខ្វះខាតគ្មានថវិកា មិនទាន់បានបញ្ជូននាវាទៅផង។ ប្រធានាធិបតីស្រីលង្កាបានអះអាងថា ការវាយប្រហាររបស់ពួកហូទីបានធ្វើឱ្យតម្លៃដឹកជញ្ជូនឡើង និងប៉ះពាល់ខ្លាំងដល់ការនាំចេញសម្លៀកបំពាក់និងតែស្រីលង្កាយ៉ាងខ្លាំង។
ដើម្បីសម្តែងសាមគ្គីភាពជាមួយពលរដ្ឋប៉ាឡេស្ទីន នៅហ្កាហ្សា តាំងពីខែវិច្ឆិកា២០២៣មក ពួកឧទ្ទាមហ៊ូទីនៅយេម៉ែន ដែលគាំទ្រដោយអ៊ីរ៉ង់បានបង្កើនសកម្មភាពវាយប្រហារដោយមីស៊ីលនិងដ្រូនទៅលើនាវាមានពាក់ព័ន្ធនឹងផលប្រយោជន៍អ៊ីស្រាអែល ដែលធ្វើចរាចរណ៍នៅក្នុងសមុទ្ទក្រហម។ ការវាយប្រហារនេះ បានជំរុញឱ្យកងកម្លាំងអន្តរជាតិបង្វែរកិច្ចការល្បាតមកភាគខាងជើង មកតំបន់ឈូងសមុទ្ទអាដេន សមុទ្ទក្រហម ហើយទុកផ្ទៃមហាសមុទ្ទឥណ្ឌា ឱ្យទំនេរជាហេតុធ្វើឱ្យចោរសមុទ្ទអាចឆក់ឱកាសបញ្ចេញសកម្មភាពបានយ៉ាងងាយ។
គិតចាប់ពីឆ្នាំ២០១៧មក ករណីចោរសមុទ្ទវាយប្រហារនៅតាមបណ្តោយប្រទេសសូម៉ាលី ទើបតែចាប់លេចឡើងវិញជាលើកទីមួយនៅឆ្នាំ២០២៣។ នៅថ្ងៃទី ១៦ធ្នូ២០២៣ ចោរសមុទ្ទសូម៉ាលីបាន ស្ទាក់ចាប់នាវាម៉ាល់ត៍ នៅចម្ងាយ៣៨០មាយពីកោះសូកូត្រារបស់យេម៉ែន។ នៅឆ្នាំ២០១១ ចោរសមុទ្ទ បានបញ្ចេញសកម្មភាពខ្លាំងបំផុតដល់កំពូលក្នុងផ្ទៃមហាសាគរតាមបណ្តោយប្រទេសសូម៉ាលី ជួនដល់ទៅ៣៦០០គីឡូម៉ែត្រពីឆ្នេរផង មុននឹងស្ងប់ស្ងាត់យ៉ាងខ្លាំងទៅវិញនារយៈពេលប៉ុន្មានឆ្នាំចុងក្រោយមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ