ឥណ្ឌាក្រាលព្រំក្រហមទទួលលោកប្រធានាធិបតីបារាំង អេម៉ានុយអែល ម៉ាក្រុង
នៅប្រទេសឥណ្ឌា ប្រធានាធិបតីបារាំងលោកអេម៉ានុយអែល ម៉ាក្រុងត្រូវបានទទួលស្វាគម ជាភ្ញៀវកិត្តិយសសំខាន់របស់លោកនាយករដ្ឋមន្រ្តី ណារិនដ្រា ម៉ូឌី នៅក្នុងពិធីបុណ្យជាតិឥណ្ឌា នៅថ្ងៃសុក្រទី ២៦មករានេះ។ វត្តមានរបស់ប្រធានាធិបតីបារាំង ក្បែរនាយករដ្ឋមន្រ្តី ឥណ្ឌា នៅក្នុងពិធីបុណ្យជាតិឥណ្ឌា ឆ្លុះបញ្ចាំងឆន្ទៈរបស់ប្រទេសទាំងពីរ ឥណ្ឌា បារាំង ដើម្បីពង្រឹងទំនាក់ទំនងទ្វេភាគី ជាពិសេសនៅក្នុងវិស័យយោធា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
ឥណ្ឌាក្រាលកម្រាលព្រំក្រហមទទួលប្រធានាធិបតីបារាំង នៅក្នុងឱកាសបុណ្យខួប៧៥ឆ្នាំនៃការបង្កើតសាធារណរដ្ឋឥណ្ឌា។ នៅក្នុងពិធីបុណ្យជាតិ នៅថ្ងៃសុក្រទី ២៦មករានេះ លោកនាយករដ្ឋមន្រ្តីឥណ្ឌា ណារិនដ្រា ម៉ូឌី បានទទួលរាក់ទាក់ យ៉ាងស្និទ្ធស្នាល ប្រមុខរដ្ឋបារាំងលោកអេម៉ានុយអែល ម៉ាក្រុង មេដឹកនាំប្រទេសលោកខាងលិចតែម្នាក់គត់ ដែលលោកនាយករដ្ឋមន្រ្តីឥណ្ឌាបានអញ្ជើញជាភ្ញៀវកិត្តិយសធំរបស់លោក។
វត្តមានរបស់ប្រធានាធិបតីបារាំង លោកអេម៉ានុយអែល ម៉ាក្រុងនៅក្នុងពិធីបុណ្យខួប ៧៥ឆ្នាំនៃសាធារណដ្ឋឥណ្ឌា ធ្វើឡើងទៅតាមការអញ្ជើញរបស់លោកនាយករដ្ឋមន្រ្តី ណារិនដ្រា ម៉ូឌី ដែលធ្លាប់លោកម៉ាក្រុង ទទួលជាភ្ញៀវកិត្តិយស នៅក្នុងពិធីបុណ្យជាតិបារាំង កាលពីឆ្នាំមុន។
បន្ទាប់ពីភ្លេងជាតិ និងការបាញ់កាណុង២១គ្រាប់ គឺក្បួនទ័ពបារាំង១៥០នាក់ ដែលដើរបើកក្បួនព្យុហយាត្រា នៅមុនយន្តហោះចម្បាំងបារាំង Rafale ពីរគ្រឿងហោះបង្ហាញរាងលើអាកាស។ ពីលើវេទិកា មេដឹកនាំបារាំង និងឥណ្ឌា តាមមើលក្បួនព្យុហយាត្រាកងទ័ពឥណ្ឌា ដែលបំពាក់ដោយសព្វាវុធរុស្ស៊ី ភាគច្រើន ដូចជា រថក្រោះរុស្ស៊ី T-90 យន្តហោះចម្បាំងSoukhoï -30ជាដើម។
ដើម្បីជៀស កុំពឹងអាស្រ័យតែទៅលើសព្វាវុធរុស្ស៊ី ឥណ្ឌា នៅក្រោមការដឹកនាំរបស់លោកនាយករដ្ឋមន្រ្តី ណារិនដ្រា ម៉ូឌី បានបង្កើនការផលិតក្នុងស្រុកផង និងរកដៃគូផ្គត់ផ្គង់សព្វាវុធបន្ថែមទៀត។ ធ្លាប់ប្រើយន្តហោះចម្បាំងបារាំង Mirage តាំងពីឆ្នាំ ១៩៨០ ឥណ្ឌាបានបញ្ជាទិញ យន្តហោះបារាំង Rafale ចំនួន ៣៦គ្រឿង និងកំពុងចរចា ទិញ២៦គ្រឿងបន្ថែមទៀត ព្រមទាំងនាវាមុជទឹកបារាំង សម្រាប់កងទ័ពជើងទឹកឥណ្ឌា។ នៅក្នុងរយៈពេល ៥ឆ្នាំចុងក្រោយនេះ បារាំងក្លាយជាប្រទេសលក់ផ្គត់ផ្គង់អាវុធធំទី២របស់ឥណ្ឌា បន្ទាប់ពីរុស្ស៊ី ចំណែកអាមេរិកស្ថិតនៅលេខរៀងទី ៣។ តាមរយៈកិច្ចសន្យាទិញសព្វាវុធបារាំង ឥណ្ឌាគ្រោងចង់សហការជាមួយក្រុមហ៊ុនផលិតអាវុធបារាំង ដូចជា Dassault ឬMBDA នៅក្នុងវិស័យឧស្សាហកម្មផលិតអាវុធក្នុងស្រុកឥណ្ឌា។
ចំណែកបារាំងវិញ សង្ឃឹមពង្រឹងចំណងមិត្តភាពជាមួយឥណ្ឌានៅក្នុងវិស័យអវកាសនិងនុយក្លេអ៊ែរ។ ជាក់ស្តែង ជាមហាអំណាចនុយក្លេអ៊ែរ បារាំងចង់លក់គម្រោងសង់ម៉ាស៊ីនរ៉េអាក់ទ័រនុយក្លេអ៊ែរ ចំនួន៦ទៅឲ្យឥណ្ឌា។
ជាប្រទេសដែលមានប្រជាជនច្រើនជាងគេ ប្រមាណ ១៤៣០លាននាក់ និងជាប្រទេសសេដ្ឋកិច្ចធំទី៥ នៅក្នុងពិភពលោក ឥណ្ឌា ជាដៃគូ ដែលបារាំងមិនអាចមើលរំលងបាន។ ប៉ុន្តែ ដោយបង្ហាញមុខឈរជិត នាយករដ្ឋមន្រ្តីឥណ្ឌា លោកណារិនដ្រា ម៉ូឌី ដែលកំពុងរងការរិះគន់ពីអង្គការការពារសិទ្ធិមនុស្សថា កំពុងប្រើអំណាចផ្តាច់ការ សង្កត់សង្កិន បង្ក្រាបអ្នកកាន់សាសនាអ៊ីស្លាម នៅឥណ្ឌា ប្រមុខរដ្ឋបារាំងក៏ត្រូវជាប់ក្នុងបញ្ជីឈ្មោះ មេដឹកនាំដែលបិទភ្នែក មិនអើពើពីបញ្ហារំលោភសិទ្ធិមនុស្ស ដោយសារតែផលប្រយោជន៍សេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ