របបសឹកភូមាចាប់ឃុំមន្រ្តីយោធាជាន់ខ្ពស់ ក្រោយបាត់បង់ទីក្រុងយុទ្ធសាស្រ្តក្នុងដៃពួកឧទ្ទាម
ឧត្តមសេនីយ៍ទោភូមា៦នាក់ដែលដឹកនាំទាហានប្រយុទ្ធនៅតំបន់ឡូកី Laukkai ជាប់ព្រំដែនចិន ត្រូវរបបសឹកចាប់ឃុំខ្លួន នៅក្នុងមូលហេតុរត់ចោលតួនាទី បោះបង់ទីក្រុងយុទ្ធសាស្រ្តទៅក្នុងដៃរបស់ពួកឧទ្ទាម។ តាមការចុះផ្សាយរបស់ទីភ្នាក់ងារព័ត៌មានបារាំង AFP ដែលដកស្រង់សំដីរបស់អ្នកនាំពាក្យរដ្ឋាភិបាលសឹកភូមា គេនៅមិនទាន់សម្រេចជោគវាសនារបស់មេទាហានរត់ចោលសមរភូមិនៅឡើយទេ ប៉ុន្តែ ច្បាប់អាជ្ញាសឹកភូមាបានចែងរួចហើយថា ទាហានបោះបង់ចោលតួនាទី ដោយគ្មានការអនុញ្ញាតអាចប្រឈមនឹងទោសប្រហារជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៣
បន្ទាប់ពីបរាជ័យបាត់បង់ទីក្រុងយុទ្ធសាស្រ្ត របបសឹកភូមាសម្រេចដាក់ទណ្ឌកម្មមន្រ្តីយោធារបស់ខ្លួន។ តាមការចុះផ្សាយរបស់ទីភ្នាក់ងារព័ត៌មានបារាំង AFP នៅថ្ងៃអង្គារ ឧត្តមសេនីយ៍ទោភូមា ៦នាក់ត្រូវរបបសឹកចាប់ឃុំខ្លួន នៅបន្ទាប់ពីទីក្រុងឡូកី ក្នុងរដ្ឋស្ហាន នៅតាមបណ្តោយព្រំដែនជាមួយចិនធ្លាក់ក្នុងដៃរបស់ក្រុមឧទ្ទាម សម្ព័ន្ធប្រដាប់អាវុធជនជាតិភាគតិច នៅដើមខែមករានេះ។
ទីភ្នាក់ងារព័ត៌មានបារាំងAFP បានដកស្រង់សំដី មន្រ្តីយោធាភូមាសុំមិនបញ្ចេញឈ្មោះ ដែលថា គេមិនទាន់កំណត់បទចោទប្រកាន់ឧត្តមសេនីយ៍ទាំង៦នាក់នៅឡើយទេ ឬក៏ថា តើពួកគេអាចត្រូវតុលាការយោធាជំនុំជម្រះដែរឬទេ។ បើតាមអ្នកនាំពាក្យរបស់របបសឹក លោក ច មីនទុន នៅមិនទាន់មានការសម្រេចណាមួយស្តីពីជោគវាសនារបស់មន្រ្តីយោធាទាំង៦នាក់ នៅឡើយទេ។ តាមប្រភពមន្ត្រីយោធាដែលសុំមិនបញ្ចេញឈ្មោះ ក្នុងចំណោមឧត្តមសេនីយ៍ដែលកំពុងជាប់ឃុំ មានមួយចំនួនជាមនុស្សស្និទ្ធនឹងមេដឹកនាំរបបសឹក លោកមីនអ៊ុងឡាំង។
ឧត្តមសេនីយ៍ទោទាំង៦នាក់ដែលកំពុងជាប់ឃុំ ជាអ្នកមើលការខុសត្រូវលើទីតាំងយោធាដ៏សំខាន់របស់របបសឹក នៅក្នុងទីក្រុងយុទ្ធសាស្រ្ត ឡូកី ក្នុងតំបន់Kokaing រដ្ឋស្ហាន។
ដោយសារបរាជ័យ មិនអាចទប់ទល់នឹងការវាយប្រហាររបស់សម្ព័ន្ធប្រដាប់អាវុធជនជាតិភាគតិច ៣ក្រុម កាលពីដើមខែមករា ឧត្តមសេនីយ៍ទោភូមាទាំង៦នាក់ និងកូនទាហានរាប់រយនាក់បានរត់ចោលទីក្រុងឡូកី។ នៅពេលទីក្រុងឡូកីធ្លាក់ទៅក្នុងដៃរបស់សម្ព័ន្ធប្រដាប់អាវុធ ដឹកនាំដោយកងទ័ពជាតិប្រជាធិបតេយ្យ ភូមា MNDAA កងទ័ពអារ៉ាខាន និងកងកម្លាំងរំដោះជាតិTa’ang ទាហានភូមាប្រមាណ ២០០០នាក់បានទម្លាក់អាវុធ ចុះចាញ់ មុននឹងចាកចេញពីទីក្រុងឡូកី ជាមួយក្រុមគ្រួសាររបស់ពួកគេ។
លើកទង់ជ័យស ព្រមទាំងទម្លាក់អាវុធ បោះបង់ចោលទីក្រុងយុទ្ធសាស្រ្តឡូកី ជាបរាជ័យដ៏អាម៉ាស់មុខទៀតសម្រាប់របបសឹក ដែលឃើញទីក្រុង ទឹកដីរបស់ខ្លួនកាន់តែច្រើនធ្លាក់ទៅក្នុងដៃរបស់ក្រុមឧទ្ទាមជនជាតិភាគតិច និងក្រុមប្រឆាំងប្រដាប់អាវុធ។
បាត់បង់ទីក្រុងឡូកី ទៅក្នុងដៃរបស់ក្រុមឧទ្ទាម គឺជារឿងឈឺចាប់ណាស់សម្រាប់មេដឹកនាំរបបសឹក លោកមីនអ៊ុងឡាំង ព្រោះថា កាលនៅគ្រប់គ្រងតំបន់Kokaing លោកមីន អ៊ុងឡាំងមានកេរ្តិ៍ឈ្មោះល្បី ដោយសារមានស្នាដៃវាយបណ្តេញពួកឧទ្ទាម គឺកងទ័ពជាតិប្រជាធិបតេយ្យភូមា ចេញពីទីក្រុងឡូកី នៅឆ្នាំ២០០៩។
ក្រៅពីមានទាហានរត់ចោលក្រុងឡូកី ជាប់ព្រំដែនជាមួយ ចិន របបសឹកត្រូវអាម៉ាសមុខម្តងទៀត ដែលឃើញទាហានរបស់ខ្លួនបរាជ័យ រត់ចោលសមរភូមិ ឆ្លងចូលទៅជ្រកកោនក្នុងទឹកដីឥណ្ឌា។ តាមភាគីឥណ្ឌា នៅសប្តាហ៍មុន មានទាហានភូមាជិត ៣០០នាក់រត់ឆ្លងដែនចូលទៅក្នុងទឹកដីឥណ្ឌា ដើម្បីគេចចេញពីការតាមវាយប្រហាររបស់ពួកឧទ្ទាមជនជាតិភាគតិចភូមា។ ប្រមុខកងទ័ពឥណ្ឌាធ្លាប់អះអាងថា រយៈពេលតែ២ខែ មានទាហានភូមាជាង៧០០នាក់ ដែលបានឆ្លងចូលទៅឥណ្ឌា ប៉ុន្តែ ជាញឹកញយ ឥណ្ឌាបញ្ជូនពួកគេឲ្យត្រលប់ទៅប្រទេសភូមាវិញ។ នៅថ្ងៃអង្គារ នៅក្នុងបេសកកម្មចេញទៅដឹកយកទាហានភូមាត្រលប់ចូលប្រទេសវិញ យន្តហោះយោធារបស់ភូមាមួយគ្រឿងធ្លាក់ផ្លូវ ពេលចុះចត រហូតបណ្តាលឲ្យមនុស្សរបួសយ៉ាងហោច ៨នាក់។ ប្រឈមនឹងការកើនឡើងនៃទាហាន និងប្រជាជនស៊ីវិលភូមារត់ឆ្លងដែនចូលទឹកដីឥណ្ឌាដើម្បីគេចចេញពីការប្រយុទ្ធគ្នាដ៏ហិង្សា នៅភូមា រដ្ឋមន្រ្តីក្រសួងមហាផ្ទៃឥណ្ឌាប្រកាសនៅថ្ងៃអាទិត្យ គម្រោងសាងសង់លួសបន្លានៅព្រំដែន ឥណ្ឌា ភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ