ចិនបណ្តេញមេទាហាន៩នាក់ចេញពីសភា និងតែងតាំងរដ្ឋមន្ត្រីការពារជាតិថ្មី
អ្នកទទួលខុសត្រូវយោធា៩នាក់ ក្នុងនោះបួននាក់ជាឧត្តមសេនីយ៍ទទួលបន្ទុកផ្នែកមីស៊ីលយុទ្ធសាស្ត្រ ត្រូវបានបណ្តេញចេញពីសភា។ នេះជាសេចក្តីសម្រេចរបស់គណៈកម្មាធិការមជ្ឈិមបក្ស ក្រោយពីបានសម្រេចប្រកាសតែងតាំងលោក ដុង ជន ជារដ្ឋមន្ត្រីក្រសួងការពារជាតិថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
បើការផ្សព្វផ្សាយរបស់ភ្នាក់ងារសារព័ត៌មានផ្លូវការចិននៅយប់ថ្ងៃសុក្រទី២៩ធ្នូ២០២៣ គណៈកម្មាការមជ្ឈិមបក្សកុម្មុយនិស្ត បានសម្រេចនៅក្នុង សម័យប្រជុំពេញអង្គ បណ្តេញអ្នកទទួលខុសត្រូវជាន់ខ្ពស់យោធា៩រូបពីសភា ក្នុងនោះមានបួននាក់ជាឧត្តមសេនីយ៍ទទួលបន្ទុកផ្នែកមីស៊ីលយុទ្ធសាស្ត្រ។ អ្នកទទួលខុសត្រូវយោធាទាំងនោះមានអាសនៈក្នុងសភាក្នុងនាមជាតំណាងដែលមិនឆ្លងកាត់ការបោះឆ្នោត។ ប៉ុន្តែគណៈកម្មាធិការមជ្ឈិមបក្សចិន មិនបានពន្យល់អំពីមូលហេតុនៃការបណ្តេញចេញនេះទេ។
តាមការពិតក្បាលម៉ាស៊ីនដឹកនាំយោធាចិន បានស្គាល់ភាពរង្គោះរង្គើយ៉ាងខ្លាំង តាំងពីរដ្ឋមន្ត្រីការពារជាតិជាប់តំណែងថ្មីថ្មោងនៅខែមីនា លោក លី ចង់ហ្វូ Li Shangfu ស្រាប់តែបាត់មុខឈឹងពីទីសាធារណៈនៅខែសីហា ហើយទាល់តែដល់ខែតុលាទើបលេចដំណឹងដកចេញតំណែង ដោយគ្មានបញ្ជាក់ហេតុផលអ្វីទាំងអស់។ តាំងពីពេលនោះមក ចិនដែលជាមហាអំណាចមានកូនទាហានច្រើនជាងគេនៅលើពិភពលោក គ្មានរដ្ឋមន្ត្រីក្រសួងការពារជាតិទេ ហើយមិនដែលនិយាយចំថានរណាជារដ្ឋមន្ត្រីស្តីទីឡើយ។ អាជ្ញាធរបានត្រឹមអះអាងថាមានការគ្រប់គ្រងថ្មី ដោយមានអ្នកទទួលខុសត្រូវផ្នែកមីស៊ីលយុទ្ធសាស្ត្រ (នុយក្លេអ៊ែរ)។ ចំណែកសារព័ត៌មានបានព្រលយថាជាដំណាក់កាលអង្កេតប្រឆាំងនឹងអំពីពុករលួយលើអតីតប្រមុខយោធា។
គឺទើបតែនៅថ្ងៃសុក្រទី ២៩ធ្នូម្សិលមិញ និងមុនការប្រកាសបណ្តេញប្រមុខយោធាជាន់ខ្ពស់ចេញពីសភាបន្តិច ដែលចិនសម្រេចតែងតាំងរដ្ឋមន្ត្រីការពារជាតិថ្មី គឺលោក ដុន ជន ដើម្បី បិទបញ្ចប់រាល់គ្រប់ចម្ងល់ទាក់ទងនឹងការចំហចោលតំណែងយោធាដ៏កំពូល។
សម្រាប់អ្នកវិភាគអាមេរិក មេដឹកនាំយោធាជាន់ខ្ពស់ចិនរងការបណ្តេញចេញពីសភាប្រជាជន ច្បាស់ជាមានជាប់អង្កេត ដូចពាក្យចចាមអារាម ព្រមទាំងការពាក់ព័ន្ធរវាងនាយទាហានទាំងនោះជាមួយអតីតរដ្ឋមន្ត្រីការពារជាតិ លី ចង់ហ្វូ។ ចំណែកការតែងតាំងលោក ដុង ជន រដ្ឋមន្ត្រីក្រសួងការពារជាតិថ្មី ជាដំណឹងគួរឱ្យភ្ញាក់ផ្អើល គ្មាននរណានឹកស្មានដល់ទេ។ បើតាមសារព័ត៌មានរដ្ឋ នេះជាសេចក្តីសម្រេចរបស់គណៈកម្មាធិការអចិន្ត្រៃយ៍សភា។ កើតនៅឆ្នាំ១៩៦១ លោក ដុង ជន ធ្លាប់ជានាយកដេប៉ាតឺម៉ង់បណ្តុះបណ្តាលទ័ពជើងទឹក ជាមេបញ្ជាការរងកងទ័ពជើងទឹកតំបន់ភាគខាងត្បូង ដែលរាប់មានសមុទ្ទចិនខាងត្បូង ដែនដីជាប់ជម្លោះជាមួយប្រទេសជិតខាង។ ហើយតាំងពីឆ្នាំ២០២១ មកដល់ពេលបច្ចុប្បន្ន លោកដុងជនជាមេបញ្ជាការទ័ពម៉ារីន។ ការតែងតាំងលោកដុងជន ជារដ្ឋមន្ត្រីការពារជាតិ ជាសញ្ញាបញ្ជាក់ថាចិនចាត់ទុកសមុទ្ទចិនខាងត្បូងជាតំបន់អាទិភាពថ្មី។ នេះបើតាមអ្នកវិភាគនយោបាយជាតិអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ