ជប៉ុនដំឡើងថវិកាការពារជាតិនៅក្នុងបរិបទនៃកំណើនភាពតានតឹងជាមួយចិន និងកូរ៉េខាងជើង
នៅថ្ងៃសុក្រ ទី២២ ធ្នូ រដ្ឋាភិបាលជប៉ុនបានបង្ហាញកញ្ចប់ថវិកាប្រចាំឆ្នាំសម្រាប់ការចំណាយពីថ្ងៃទី១ មេសា ឆ្នាំ ២០២៤ ដល់ថ្ងៃទី៣១ មីនា ឆ្នាំ ២០២៥ដែលមានទឹកប្រាក់ប្រមាណ ៧១៦ ០០០លានអឺរ៉ូ។ កញ្ចប់ថវិកាឆ្នាំថ្មីនេះមានការធ្លាក់ចុះបន្តិចបន្តួច បើធៀបនឹងឆ្នាំកន្លងទៅដែលមានទឹកប្រាក់ប្រមាណ ៧៣០ ០០០លានអឺរ៉ូ។ តែអ្វីជាការកត់សម្គាល់នៅក្នុងកញ្ចប់ថវិកាថ្មី គឺខ្ទង់ចំណាយសម្រាប់វិស័យការពារជាតិដែលមានដល់ទៅ ៥០ ៧០០លានអឺរ៉ូ ពោលមានការកើនឡើងជិត ១៧% បើធៀបនឹងឆ្នាំកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
នៅក្នុងកញ្ចប់ថវិកាការពារជាតិសម្រាប់ឆ្នាំថ្មីដែលមានទឹកប្រាក់ ៥០ ៧០០លានអឺរ៉ូ ក្រសួងការពារជាតិគ្រោងចំណាយ ២ ៣៦៣លានអឺរ៉ូសម្រាប់សាងសង់នាវាមុជទឹកថ្មីចំនួន ២គ្រឿងដែលបំពាក់ដោយប្រព័ន្ធការពារប្រឆាំងមីស៊ីល Aegis ដែលផលិតដោយអាមេរិក។ បន្ទាប់មក ក្រសួងការពារជាតិគ្រោងចំណាយប្រមាណ ៤៨០លានអឺរ៉ូដើម្បីធ្វើការអភិវឌ្ឍន៍ប្រព័ន្ធស្ទាក់បាញ់កម្ទេចមីស៊ីលអ៊ីពែរសូនិក។ បន្ទាប់មកទៀត មានទឹកប្រាក់ចំនួន ៤ ៧០០លានអឺរ៉ូត្រូវបានក្រសួងការពារជាតិគ្រោងចំណាយទិញមីស៊ីលបន្ថែម ក្នុងនោះក៏មានមីស៊ីលដែលអាចបាញ់ដល់ផ្ទាំងស៊ីបយោធារបស់ប្រទេសជិតខាងដែរ។ មីស៊ីលប្រភេទនេះជាមីស៊ីល Tomahawk របស់អាមេរិក។
កាលពីខែវិច្ឆិកាកន្លងទៅ ក្រុងវ៉ាស៊ីនតោនបានយល់ព្រមលក់មីស៊ីល Tomahawk ចំនួន ៤០០ដើមឲ្យក្រុងតូក្យូក្នុងទឹកប្រាក់សរុប ២ ៣៥០លានដុល្លារ។ ក្រៅពីការចំណាយដើម្បីសាងសង់នាវាមុជទឹកថ្មី ឬទិញមីស៊ីលបន្ថែម ក្រសួងការពារជាតិក៏គ្រោងចំណាយលើផ្នែកផ្សេងទៀតរួមមាន ការទិញគ្រាប់កាំភ្លើងស្តុកបន្ថែមដើម្បីបង្ការនឹងសេណារីយ៉ូនៃការធ្វើសង្រ្គាមយូរ ពង្រឹងមធ្យោបាយនៅក្នុងវិស័យការពារតាមអ៊ីនធឺនែត និងនៅក្នុងវិស័យអវកាសយោធា។ ទន្ទឹមគ្នានេះ ការចំណាយដើម្បីបំពាក់ដ្រូនបន្ថែម និងប្រព័ន្ធគ្មានមនុស្សបើកផ្សេងទៀតក៏ត្រូវបានក្រសួងការពារជាតិពិចារណាដែរ។
គួរបញ្ជាក់ថា ជម្រើសដំឡើងថវិកាការពារជាតិរបស់រដ្ឋាភិបាលជប៉ុនបានធ្វើឡើងចំនៅក្នុងបរិបទនៃកំណើនភាពតានតឹងជាមួយចិន និងកូរ៉េខាងជើង។ ក្រុងតូក្យូបារម្ភពីអំណាចយោធា និងមហិច្ឆតាតំបន់របស់ក្រុងប៉េកាំង រួមទាំងការពង្រឹងទំនាក់ទំនងរវាងចិន និងរុស្ស៊ី។ ជាមួយកូរ៉េខាងជើង ក្រុងតូក្យូកំពុងបន្តប្រឈមនឹងការបាញ់សាកល្បងមីស៊ីលញឹកញាប់របស់ក្រុងព្យុងយ៉ាង រួមទាំងការរំកិលរកគ្នារវាងកូរ៉េខាងជើង និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ