កូរ៉េខាងជើងបង្ហោះផ្កាយរណបយោធាចារកិច្ចនៅក្នុងតារាវិថីបានជោគជ័យ
កូរ៉េខាងជើងបានអះអាង នៅថ្ងៃពុធទី ២២វិច្ឆិកា ថាបានបាញ់បង្ហោះមីស៊ីលពាំផ្កាយរណបយោធាចារកិច្ចទៅក្នុងគន្លងតារាវិថីដោយជោគជ័យ។ ហើយពេលនេះប្រមុខដឹកនាំរបបព្យុងយ៉ាងលោក គីមជុងអ៊ុន កំពុងសិក្សាពិនិត្យមើលមូលដ្ឋានយោធាអាមេរិកនៅកោះGamដែលផ្កាយរណបផ្តិតបាន។ ជាប្រតិកម្មតបនឹងការរំលោភសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ កូរ៉េខាងត្បូងបានប្រកាសផ្អាកកិច្ចព្រមព្រៀងយោធាមួយផ្នែកជាមួយកូរ៉េខាងជើងភ្លាម។
ចុះផ្សាយនៅថ្ងៃ៖
ស្តាប់ - ០៣:២៦
លោក គីមជុងអ៊ុន កំពុងពិនិត្យមើលមូលដ្ឋានទ័ពអាកាសAnderson Apra Harbour និងមូលដ្ឋានយោធាសំខាន់ៗរបស់កងទ័ពអាមេរិក ដែលថតពីលើអាកាសចំពីលើកោះGuam ដោយផ្កាយរណបយោធាចារកិច្ច និងដែលគេទទួលបាននៅវេលាម៉ោង៩និង២១នាទីម៉ោងនៅក្នុងស្រុក(កូរ៉េខាងជើង) នាថ្ងៃទី២២វិច្ឆិកា២០២៣។ នេះបើតាមសេចក្តីប្រកាសរបស់ទីភ្នាក់ងារសារព័ត៌មានរដ្ឋKCNA។ បើតាមភ្នាក់ងារកូរ៉េខាងជើងដដែល កាំជ្រួចបានបាញ់បង្ហោះចេញនៅល្ងាចថ្ងៃអង្គារ និងតាមគម្រោងគំនូសគន្លងផ្លូវដែលព្រាងទុក ហើយបានពាំផ្កាយរណបចារកិច្ចMalligyong-1 ទៅក្នុងគន្លងតារាវិថី។ ជាមួយនឹងសេចក្តីប្រកាស គ្រោងនឹងបង្ហោះផ្កាយរណបផ្សេងទៀត ក្នុងពេលឆាប់ៗខាងមុខនេះ ដើម្បីពង្រឹងសមត្ថភាពតាមដានកូរ៉េខាងត្បូង ព្យុងយ៉ាងបានគូសបញ្ជាក់ថាការបង្ហោះផ្កាយរណបចារកិច្ចជាសិទ្ធិស្របច្បាប់របស់កូរ៉េខាងជើងក្នុងការពង្រឹងសមត្ថភាពស្វ័យការពារខ្លួន ពីការគំរាមកំហែងរបស់កូរ៉េខាងត្បូងនិងសហរដ្ឋអាមេរិក។
ព្យុងយ៉ាងបានជំនួយបច្ចេកវិទ្យាពីរុស្ស៊ី?
បើតាមការវិភាគរបស់យោធាកូរ៉េខាងត្បូង ផ្កាយរណបចារកិច្ចរបស់កូរ៉េខាងជើងពិតជាចូលក្នុងគន្លងតារាវិថីដូចការអះអាងរបស់ព្យុងយ៉ាងមែន តែគេត្រូវការពេលវេលាទម្រាំកំណត់បានថាផ្កាយរណបនោះមានដំណើរការពិតប្រាកដ។ សម្រាប់អ្នកជំនាញ បង្ហោះផ្កាយរណបទៅក្នុងគន្លងតារាវិថីបានសម្រេច មិនមែនមានន័យថាឧបករណ៍ពិតជាអាចដំណើរការចារកិច្ចបានឡើយ ប៉ុន្តែអ្នកវិភាគ នៅវិទ្យាស្ថានសិក្សានយោបាយយល់ថាព្យុងយ៉ាងរីកចម្រើនលឿនខ្លាំងណាស់។ ល្បឿននេះបញ្ជាក់ថាអំពីសមត្ថភាពយោធារបស់កូរ៉េខាងជើងក្នុងការបាញ់មីស៊ីលពាំក្បាលគ្រាប់នុយក្លេអ៊ែរបាន។ ហើយអ្នកជំនាញជឿទៀតថាជោគជ័យនេះមិនមែនដោយហេតុតែមានរុស្ស៊ីជួយទេ។ ម៉ូស្គូអាចផ្តល់ឱ្យព្យុងយ៉ាងត្រឹមកំរិតកម្មវិធីប៉ុណ្ណោះ។ នេះបើតាមលោក Chang Young-keun សាស្ត្រាចារ្យនៅ សាកលវិទ្យាល័យអវកាសកូរ៉េ។
ប៉ុន្តែសម្រាប់សេអ៊ូលក៏ដូចជាតូក្យូ សហរដ្ឋអាមេរិកនិងអង្គការសហប្រជាជាតិ ការបង្ហោះផ្កាយរណបដោយប្រើបច្ចេកវិទ្យាបាលីស្ទិក ទោះជោគជ័យឬបរាជ័យ គឺជាការរំលោភសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិទាំងអស់។ ជាប្រតិកម្មតប កូរ៉េខាងត្បូងបានប្រកាសផ្អាកកិច្ចព្រមព្រៀងយោធាចុះហត្ថលេខាជាមួយព្យុងយ៉ាងកាលពីឆ្នាំ២០១៨មួយភាគ តែមិនអាចប្រាប់ដោយផ្ទាល់បានឡើយ ដោយកូរ៉េខាងជើងបានកាត់ផ្តាច់បណ្តាញទំនាក់ទំនងគ្នាទៅហើយ។ ចំណែកឯចិនដែលជាសម្ព័ន្ធមិត្តវិញ មិនថ្កោលទោសព្យុងយ៉ាងទេ តែយល់ថាស្ថានភាពស្មុគស្មាញខ្លាំងនិងរសើបខ្លាំងណាស់។
ជាការពិត ប្រសិនបើកូរ៉េខាងជើងសម្រេចបញ្ជូនផ្កាយរណបចារកិច្ចក្នុងគន្លងតារាវិថីបានមែន នោះព្យុងយ៉ាងនឹងអាចមានទិន្នន័យចារកិច្ចសំខាន់ៗនៅពេលមានជម្លោះយោធា។ ចំណែកកូរ៉េខាងត្បូងត្រូវរំពឹងលើសហរដ្ឋអាមេរិកនិងជប៉ុនក្នុងការឃ្លាំមើលកូរ៉េខាងជើង។ សេអ៊ូលគ្រោងនឹងបង្ហោះផ្កាយរណបចារកិច្ច ទីមួយរបស់ខ្លួន នៅថ្ងៃទី៣០វិច្ឆិកាខាងមុខ។ ទាល់តែមានផ្កាយរណបចារកិច្ចក្នុងគន្លងតារាវិថី ទើបកូរ៉េខាងត្បូងអាចប្រមូលព័ត៌មានសម្ងាត់យោធាទាក់ទងនឹងកូរ៉េខាងជើងបាន។ សេអ៊ូលមានមហិច្ឆតាបង្ហោះផ្កាយរណបយោធាដ៏ទំនើបបំផុតចំនួន៥ទៅក្នុងគន្លងតារាវិថីពីពេលនេះដល់ឆ្នាំ២០២៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ