ឥណ្ឌារងខ្យល់ពុលក្នុងបរិយាកាសខ្លាំងជាថ្មី និងប្រកាសបិទសាលារៀន
សាលារៀននៅរដ្ឋធានីញូវដេលី ត្រូវបិទទ្វារទាំងអស់នៅថ្ងៃសុក្រទី ៣វិច្ឆិកា២០២៣នេះ ដោយហេតុតែជាតិពុលក្នុងខ្យល់បរិយាកាសបានឡើងដល់កំរិតដ៏គ្រោះថ្នាក់។ ផ្ទៃបរិយាកាសក្នុងក្រុងឡើងអាប់អួរនិងពុលយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:៤៤
អាចចាត់ទុកជាសោកនាដកម្មដដែលៗ រដ្ឋធានីនៃប្រទេសឥណ្ឌាកំពុងរងគ្រោះខ្យល់ពុល ថប់ដង្ហើម ជាថ្មីនាពេលនេះ។ ហើយជាថ្មីម្តងទៀតសាលារៀនត្រូវបិទ។ អាជ្ញាធរក្រុងញូវដេលីបានប្រកាស នៅយប់ជ្រៅថ្ងៃព្រហស្បតិ៍ទី ២វិច្ឆិកា បិទសាលាបឋមសិក្សាទាំងអស់ ទាំងសាលារដ្ឋសាលាឯកជន នៅថ្ងៃសុក្រទី៣វិច្ឆិកានិង សម្រាប់រយៈពេលយ៉ាងហោចពីរថ្ងៃទៀត ពីព្រោះពេលនេះកំរិតជាតិពុលក្នុងបរិយាកាសបានឡើងដល់កំរិតដ៏គ្រោះថ្នាក់សម្រាប់សុខភាព។ បើតាមស្ថាប័នស្វីសផ្នែកតាមដានគុណភាពខ្យល់បរិយាកាស IQAir បរិមាណធាតុល្អិតឆ្មារៗPM2.5 ដ៏មហាគ្រោះថ្នាក់នោះ បានឡើងហួសកំរិតអតិបរិមាកំណត់ដោយអង្គការសុខភាពពិភពលោកដល់ទៅ៣៥ដង។
តូចឆ្មារខ្លាំង ធាតុពុលដ៏ល្អិតPM2.5 នៅពេលស្រូបចូលក្នុងសរីរាង្គកាយមនុស្សតាមផ្លូវដង្ហើមហើយ អាចជ្រាបឆ្លងចូលដល់ក្នុងសរសៃឈាមតូចៗ និងតោងរត់តាមចរន្តឈាមពេញខ្លួន។ បើតាមការសិក្សារបស់The Lancet ទស្សនាវដ្តីសុខភាពអង់គ្លេស ចេញផ្សាយកាលពីឆ្នាំ២០២០ ខ្យល់ពុលនេះអាចជាដើមហេតុនៃការស្លាប់របស់ពលរដ្ឋឥណ្ឌាចំនួនជាង១លាន៦សែន៧ម៉ឺននាក់ នៅមួយឆ្នាំ២០១៩ ក្នុងនោះ១៧៥០០នាក់នៅក្រុងញូវដេលី។
ញូវដេលីជាក្រុងប្រជុំជនដ៏ធំជាងគេមួយនៅលើផែនដី ប៉ុន្តែរដ្ឋធានីដ៏ធំចង្អៀតមួយនេះតែងជាប់ចំណាត់ជាញឹកញាប់ជាក្រុងដ៏ពុលខ្លាំងជាងបំផុតដែរនៅលើពិភពលោក។ ដូចជារៀងរាល់ឆ្នាំ ឱ្យជិតចូលដល់រដូវរងារ ខ្យល់បរិយាកាសក្នុងរដ្ឋធានីចាប់ឡើងពុលខ្លាំង ដោយហេតុតែមានពិធីបុណ្យសាសនាផង និងប្រពៃណីកសិកម្មបែបបំពុលបរិស្ថានកើតឡើងស្ទើរចំពេលតែមួយ។ ខ្យល់បរិយាកាសបានឡើងអួរអាប់ ដោយផ្សែងយានយន្ត ផ្សែងរោងចក្រឧស្សាហកម្ម តាំងពីពីរបីថ្ងៃមកហើយ ត្រូវបន្ថែមដោយផ្សែងហុយមកពីបុណ្យសាសនា និងការដុតស្បូវដុតស្រែ ដែលជាទំនៀមទម្លាប់របស់កសិករឥណ្ឌារាប់សិបពាន់នៅតំបន់ភាគខាងជើងប្រទេសទៀត។
ទំនៀមទម្លាប់នេះជាដើមហេតុមួយក្នុងចំណោមមូលហេតុផ្សេងទៀតដែលនាំឱ្យក្រុងញូវដេលីរងខ្យល់ពុលស្ទើរថប់ដង្ហើមជារៀងរាល់ឆ្នាំ និងប្រារព្វធ្វើមិនដែលខាន បើទោះបីជាអាជ្ញាធរឥណ្ឌាប្រឹងបញ្ចុះបញ្ចូលឱ្យកសិករប្រើវិធីផ្សេងនិងគំរាមចាត់វិធានការដាក់ទណ្ឌកម្មក៏ដោយ។ អាជ្ញាធរឥណ្ឌាបានប្រកាសផែនការកាត់បន្ថយខ្យល់ពុលជារឿយៗ ក្នុងអំឡុងពេលនេះ ដូចជាផ្អាកការដ្ឋានសំណង់ ប៉ុន្តែគ្មានបានលទ្ធផលសោះ។ រំពឹងយ៉ាងខ្លាំងលើ ថាមពលធ្យូងថ្ម ឥណ្ឌាបញ្ចេញឧស្ម័នបំពុលបរិយាកាសច្រើនឡើងជាលំដាប់ និងក្នុងកំរិត២៩%ក្នុងរយៈពេល៧ឆ្នាំចុងក្រោយនេះ ហើយមិនសូវខ្វល់នឹងការអនុវត្តនយោបាយកាត់បន្ថយចំហេះផូស៊ីលជាបណ្តើរៗឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ