អាមេរិក និងអឺរ៉ុបលែងសូវចង់ពឹងផ្អែកចិន ប៉ុន្តែចិននៅតែបង្កើនការងារឧស្សាហកម្មនាំមុខគេក្នុងពិភពលោក
មហាអំណាចិននៅតែបន្តបង្កើតការងារឧស្សាហកម្មពិភពលោក រហូតឈានទៅនាំមុខគេ នៅឆ្នាំ២០៥០។ តាមការសិក្សារបស់មជ្ឈមណ្ឌលអភិវឌ្ឍសកលដែលមានទីតាំងនៅទីក្រុងវ៉ាស៊ីនតោន បើទោះបីអាមេរិក និងអឺរ៉ុបចង់កាត់បន្ថយការពឹងផ្អែកលើឧស្សាហកម្មចិន ប៉ុន្តែការងារដែលវិស័យឧស្សាហកម្មចិនបង្កើតឡើង ក្នុងរយៈពេល៣០ឆ្នាំខាងមុខ នឹងកើនឡើងចំនួន និងតំណាងឲ្យ៤៣%នៃការងារឧស្សាហកម្មសរុប នៅក្នុងពិភពលោក។
ចុះផ្សាយនៅថ្ងៃ៖
ស្តាប់ - ០២:៣០
ទោះបីអាមេរិក និងអឺរ៉ុបមានឆន្ទៈចង់កាត់បន្ថយការពឹងផ្អែកទាំងស្រុងលើវិស័យឧស្សាហកម្មចិនសម្រាប់ការផ្គត់ផ្គង់ក្នុងស្រុក ប៉ុន្តែ វិស័យឧស្សាហកម្មរបស់ចិននៅតែបង្កើត បង្កើនការងារ ក្នុងរយៈពេល៣០ឆ្នាំទៅមុខ។
តាមការសិក្សារបស់មជ្ឈមណ្ឌលអភិវឌ្ឍសកលCenter for Global Development ដែលមានទីតាំងនៅទីក្រុងវ៉ាស៊ីនតោន វិស័យឧស្សាហកម្មចិននឹងនៅបន្តបង្កើនការងារ ទោះបី ជានិន្នាការបង្កើតកាងារជាទូទៅ នៅក្នុងពិភពលោក ស្ថិតនៅទ្រឹង ឬធ្លាក់ចុះ។
ដោយសារវិបត្តិកូវីដដែលបានជំរុញឲ្យមានការបិទខ្ទប់ប្រទេស ជាពិសេស ការផ្អាកសកម្មភាពផលិតនៅប្រទេសចិន ដែលប៉ះពាល់ដល់សង្វាក់ផលិតកម្មនាំចូល ប្រទេសជាច្រើននៅអឺរ៉ុប រួមទាំងអាមេរិកផងបានសើរើនយោបាយរបស់ខ្លួន លែងចង់ពឹងផ្អែកខ្លាំងលើផលិតផលឧស្សាហកម្មរបស់ចិន តាមរយៈការរើទីតាំងរោងចក្រឧស្សាហកម្មយុទ្ធសាស្រ្តរបស់ខ្លួនចេញពីចិន ទៅដាក់នៅប្រទេសផ្សេងទៀតដែលមាននយោបាយស្របគ្នាជាមួយ។ អាមេរិកវិញដែលនៅតែចង់នាំមុខខាងបញ្ញាសិប្បនិម្មិត បានកំណត់ រឹតត្បិតសមត្ថភាពរបស់ចិន នៅក្នុងវិស័យបច្ចេកវិទ្យានាំមុខ ដូចជា ការផលិតសឺមីកុងឌុចទ័រដែលគេត្រូវការចាំបាច់សម្រាប់អភិវឌ្ឍវិស័យបញ្ញាសិប្បនិម្មិត។
ប៉ុន្តែ បើតាមការសិក្សារបស់មជ្ឈមណ្ឌលអភិវឌ្ឍសកល បើទោះអាមេរិក និងប្រទេសនៅអឺរ៉ុបចង់កាត់បន្ថយការពឹងផ្អែកលើឧស្សាហកម្មចិន ក៏ ការងារឧស្សាហកម្មដែលមហាអំណាចចិនបង្កើតឡើង នៅក្នុងពិភពលោក ពីពេលនេះដល់ឆ្នាំ ២០៥០ នៅតែកើនឡើងខ្ពស់ និងតំណាងឲ្យ៤៣%នៃការងារឧស្សាហកម្មសរុប នៅក្នុងពិភពលោក ក្នុងខណៈពេលដែល ក្រុមប្រទេសអ្នកមាន ប្រទេសមហាអំណាចឧស្សាហកម្មផ្សេងទៀតត្រូវប្រឈមជួបបញ្ហាបាត់បង់ការងារឧស្សាហកម្ម ពី ១១,៤% មកនៅ៨,៣%។
ដោយតាមដានសិក្សាលើប្រទេសចំនួន ៥៩ ដែលតំណាងឲ្យ៧៥%នៃផលិតផលសរុបនៅក្នុងពិភពលោក មជ្ឈមណ្ឌលអភិវឌ្ឍសកល បង្ហាញដែរថា នៅប្រទេសកំពុងអភិវឌ្ឍ ឬប្រទេសក្រីក្រ ការបង្កើតការងារឧស្សាហកម្ម ស្ថិតនៅទ្រឹង ក្រោម៨%។ ប៉ុន្តែ មិនមែនមានន័យថា ប្រទេសទាំងនោះមិនអាចចាកផុតពីភាពក្រីក្រនោះទេ។ បើទោះបីជាវិស័យឧស្សាហកម្មរបស់ខ្លួនមិនសូវលូតលាស់ ដូចចិន ឬប្រទេសអ្នកមាន ប៉ុន្តែ ប្រទេសកំពុងអភិវឌ្ឍនឹងអាចក្រឡាស់ខ្លួន ដោះដៃចេញពីភាពក្រីក្រ តាមរយៈ ការដើរចេញពីវិស័យកសិកម្ម ដើម្បីឆ្ពោះទៅចាប់យកវិស័យសកម្មសម្រាប់ជំរុញសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ