ចិន និងរុស្ស៊ីរួមគ្នាចោទប្រទេសមួយចំនួនថា ជាអ្នកសាបព្រួសបង្កើតបញ្ហាក្នុងពិភពលោក
នៅក្នុងវេទិកាសន្តិសុខ ស្ហាងស្ហាន Xiangshan លើកទី១០ នៅទីក្រុងប៉េកាំង អ្នកទទួលខុសត្រូវជាន់ខ្ពស់របស់ប្រទេសចិន និងរុស្ស៊ី បានរិះគន់ខ្លាំងៗ ប្រទេសលោកខាងលិចថា ជាអ្នកចង់ សាង បង្កើតបញ្ហានៅតំបន់អាស៊ី និងនៅកន្លែងដទៃក្នុងពិភពលោក។ ប្រមូលផ្តុំទៅដោយរដ្ឋមន្រ្តីការពារជាតិ និងអ្នកទទួលខុសត្រូវមកពីប្រទេសចំនួន ៩០ក្នុងពិភពលោក វេទិការបស់ចិន ស្តីពីសន្តិសុខក្នុងពិភពលោក រៀបចំឡើង ដោយគ្មានវត្តមានរបស់រដ្ឋមន្រ្តីការពារចិន លោកលី ស្ហាំងហ្វូ Li Shangfu ដែលទើបត្រូវដកចេញពីតំណែង កាលពីសប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៩
ចិនបើកវេទិកាស្តីពីសន្តិសុខលើកទី១០ ដោយគ្មានវត្តមានរដ្ឋមន្រ្តីការពារជាតិ របស់ខ្លួន នៅបន្ទាប់ពីរដ្ឋមន្រ្តីការពារជាតិ លោក Li Shangfuត្រូវដកចេញពីតំណែង ដោយគ្មានមូលហេតុកាលពីសប្តាហ៍មុន។ នៅក្នុងវេទិកាស្តីពីសន្តិសុខ Xiangshan ដែលបើកទ្វារតាំងពីថ្ងៃអាទិត្យ នៅទីក្រុងប៉េកាំង គឺអនុប្រធានគណៈកម្មការកងទ័ពមជ្ឈិមបក្សកុម្មុយនិស្តចិន លោក Zhang Youxia ដែលជាអ្នកឡើងបើកសម្ពោធសន្និសីទ នៅថ្ងៃចន្ទ ទី៣០តុលានេះ។
នៅក្នុងសុន្ទរកថាថ្លែងទៅកាន់ រដ្ឋមន្រ្តីការពារជាតិ និងអ្នកទទួលខុសត្រូវកងទ័ព មកពីប្រទេសចំនួន៩០ក្នុងពិភពលោក លោក Zhang Youxia ដែលជាអ្នកទទួលខុសត្រូវជាន់ខ្ពស់របស់កងទ័ពចិន បន្ទាប់ពីលោកប្រធានាធិបតី ស៊ី ជីនពីងបាននិយាយរិះគន់ ដោយមិនចំឈ្មោះ ប្រទេសមួយចំនួនថា ជាអ្នកសាង បង្កើតបញ្ហាឡើងដើម្បីផលប្រយោជន៍ផ្ទាល់ខ្លួន។
បើតាមអនុប្រធានគណៈកម្មការកងទ័ពចិន នៅក្នុងពិភពលោកសព្វថ្ងៃនេះ ចំណុចក្តៅបានផ្ទុះឡើងបន្តបន្ទាប់គ្នា។ ការឈឺចាប់ដោយសារសង្រ្គាម ភាពវឹកវរ ចលាចល រួមទាំងការបាត់បង់ជីវិតមនុស្សបានកើតឡើងសឹងគ្រប់ទិសទី។ ដោយមិននិយាយចំឈ្មោះអាមេរិក ឧត្តមសេនីយ៍ ចិន លោក Zhang Youxiaបន្ថែមថា ប្រទេសមួយចំនួនដែលខ្លាចពិភពលោកជួបស្ថិរភាព បានបង្កើតបញ្ហា ដោយចេតនា និងជ្រៀតជ្រែកក្នុងបញ្ហាថ្នាក់តំបន់ លូកដៃចូលកិច្ចការផ្ទៃក្នុងប្រទេសដទៃ និងបង្កើតបដិវត្តន៍ពណ៌។ ព្រោះតែអត្មានិយម ប្រយោជន៍ផ្ទាល់ខ្លួន ប្រទេសមួយចំនួនបានបង្កើតជម្លោះភូមិសាស្រ្តនយោបាយជាច្រើនកន្លែង បន្ទាប់មក ចេញមុខកាន់ជើងភាគីតែម្ខាង ដែលជាហេតុធ្វើឲ្យស្ថានភាពក្នុងតំបន់កាន់តែស្មុគស្មាញ ពិបាកដោះស្រាយ។
ឡើងថ្លែងបន្ទាប់ពីឧត្តមសេនីយ៍ Zhang Youxia រដ្ឋមន្រ្តីការពារជាតិរុស្ស៊ី លោក Sergueï Choïgou មិនរារែកនឹងនិយាយចំៗឈ្មោះ អាមេរិក និងក្រុមប្រទេសលោកខាងលិចមួយចំនួនទៀត ថា ជាអ្នកចង់ធ្វើឲ្យតំបន់អាស៊ី ជួបអស្ថិរភាព។ តាមប្រមុខការពារជាតិរុស្ស៊ី បន្ទាប់ពីបង្កើតវិបត្តិនៅអឺរ៉ុប ដែលកំពុងមានសង្រ្គាមអ៊ុយក្រែន បស្ចិមលោកប៉ុនប៉ងពង្រីកវិបត្តិចូលដល់តំបន់អាស៊ីប៉ាស៊ីហ្វិក។ សម្រាប់រដ្ឋមន្រ្តីការពារជាតិរុស្ស៊ី ជម្លោះដែលមានការចូលរួមពាក់ព័ន្ធប្រទេសដែលមានអាវុធនុយក្លេអ៊ែរនឹងអាចបង្កឲ្យមានគ្រោះមហន្តរាយដ៏ធ្ងន់ធ្ងរ។
នៅក្នុងវេទិកាស្តីពីសន្តិសុខ Xiangshan អាមេរិក និងប្រទេសលោកខាងលិច ដែលជាផ្ទាំងស៊ីបរិះគន់ មិនបានបញ្ជូនរដ្ឋមន្រ្តីការពារជាតិរបស់ខ្លួន ប៉ុន្តែបានត្រឹមបញ្ជូនមន្រ្តីតូចតាចរបស់ក្រសួងការពារជាតិទៅចូលរួមតែប៉ុណ្ណោះ។
បញ្ហាកោះតៃវ៉ាន់ បូកផ្សំនឹងជម្លោះពាណិជ្ជកម្ម បានធ្វើឲ្យចិន និងអាមេរិកតានតឹងនឹងគ្នាខ្លាំង នៅប៉ុន្មានឆ្នាំចុងក្រោយនេះ។ ប៉ុន្តែ នៅក្នុងសារ បិទបញ្ចប់សុន្ទរកថារបស់ខ្លួន លោកឧត្តមសេនីយ៍ Zhang Youxia បញ្ជាក់ថា ចិននៅតែចង់អភិវឌ្ឍទំនាក់ទំនងយោធាជាមួយអាមេរិក ដោយឈរលើគោលការណ៍ គោរពគ្នាទៅវិញ ទៅមក ដើម្បីសន្តិភាព និងការសហការដើម្បីឈ្នះទាំងអស់គ្នា។ ប៉ុន្តែ នៅក្នុងពេលជួបប្រាស្រ័យមួយភ្លែតជាមួយ រដ្ឋមន្រ្តីការពារជាតិរុស្ស៊ី អនុប្រធានគណៈកម្មការកងទ័ពចិនបញ្ជាក់ពីសារៈសំខាន់ និងការពង្រឹងសហប្រតិបត្តិការយុទ្ធសាស្រ្តយោធាចិន និងរុស្ស៊ី ដែលបានខិតចូលជិតគ្នាជាងពេលណាៗទាំងអស់ ដោយសារសង្រ្គាមអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ